Малакия 4 - Библия удмурт кылын

4-тӥ ЛЮКЕТ

¹ Уго тани, вуоз гур кадь ӝуась нунал, соку вань вылтӥяськисьёсты, сьӧлыклэсь кышкатэк улӥсьёсты куроез кадь вуоно нунал сутоз, – шуэ Саваоф Кузё-Инмар, – выжызы но, вайёссы но уз кыльы.

² Нош тӥ понна, Мынэсьтым нимме гажаса-яратыса улӥсьёс понна, шонерлыко улонлэн Шундыез ӝужалоз, Солэн тылсиосыз бурмон сёто, соку тӥ потоды но куаем кунянъёс кадь шумпотыса тэтчалоды.

³ Сьӧлыклэсь кышкасьтэмъёсты пыд улады лёгалоды, уго соос Мынам лэсьтон нуналам пыдтыш улады сюй-тузон луозы, – шуэ Саваоф Кузё-Инмар.

⁴ Аслам ляльчиелэсь, Моисейлэсь, законзэ – курон-косонъёсты, пуктон-косонъёсты – тодады вае, кудзэ Мон со пыр Хоривысен быдэс Израильлы сӥзи.

⁵ Тани, Кузё-Инмарлэн быдӟым но кышкыт нуналэз вуон азьын тӥ доры Илия пророкез ысто.

⁶ Со атайёслэсь сюлэмъёссэс пиоссы пала, пиоссылэсь сюлэмъёссэс атайёссы пала берыктоз, Мон лыктӥ ке, музъемез каргаса быдтоно медам луы вал.