Мадёнъёс 1 - Библия удмурт кылын

1-тӥ ЛЮКЕТ

¹ Израильысь Давид эксэйлэн Соломон пиезлэн мадёнъёсыз,

² соос гожтэмын визьлыкез, дышетонэз-нодъянэз тодон понна, визьлыклэсь веранъёссэ валан понна;

³ визьнодо улонлэсь курон-косонъёссэ кабыл басьтон вылысь, шонер суд ортчытон вылысь, шонерлыко, зэмлыко улонэз тодон понна;

⁴ огшоры муртъёслы – нодлык, егит пилы тодон, визьлыко улон сётон понна;

⁵ визьлыко мурт кылзӥськоз но тодон-валанзэ будэтоз, нодо мурт визьлыко визь-кенешъёс шедьтоз,

⁶ мадёнэз но, котыръяса веранэз но, визьлыко муртъёслэсь кылъёссэс но соослэсь мадиськонъёссэс но валаны кутскоз.

⁷ Визьлыклэн кутсконэз Кузё-Инмарлэсь кышканэн улон бордысь потэ; [ваньмызлэн ӟеч валанэз, кин сое уте; нош Инмарлы тэрытскон – валанлэн кутсконэз;] укылтэмъёс гинэ визьлыкез, дышетонэз-нодъянэз синазькыль каро.

⁸ Пие, атаедлэсь нодъямзэ кылзы, анаедлэсь дышетэмзэ кулэтэм эн кары,

⁹ малы ке шуоно со – йырдэ туж чебер карись тугоко, чыртыдэ чебер карись маке.

¹⁰ Пие! Сьӧлыкоос асьсэ пала берыктыны выризы ке, соосын огкылысь эн кариськы;

¹¹ шуизы ке: «Ойдо ми сьӧры, янгыштэм, дун-шектэм муртэз виыны ватӥськон инты дасяломе, лушкемен возьмаса уломы;

¹² пыдэстэм дунне кадь улэпкын соосты ньыломы, шайгуэ васькисьёсты кадь быдэскынызы ньыломы;

¹³ пӧртэм пумо дуно ваньбуръёс люкаломы, таласа поттэм ваньбурен юртъермес тырмытомы;

¹⁴ милемын ӵош пус чӧлтод, асьмелэн ваньмылэн ваньбур возён кеносмы огазьын луоз».

¹⁵ Пие! Соосын одӥг сюрестӥ эн ветлы, соослэн сюрес вылазы султонлэсь пыддэ уть,

¹⁶ уго соослэн пыдъёссы лек уж доры бызё, вир кисьтыны дырто.

¹⁷ Вань тылобурдоослэн син азязы юнме казь кыско,

¹⁸ нош сьӧлыкоос соослэсь вирзэс поттон понна ватӥськон инты дасяло, соослэсь лулзэс кутыны возьмаськыса уло.

¹⁹ Ваньмызлэн, муртлэсь ваньбурзэ басьтэмез потӥсь муртлэн, таӵе сюресэз: муртлэсь ваньбурзэ киултӥсьлэсь со улонзэ тала.

²⁰ Визьлык ульчаысен шара ивортэ, падвожъёсысен куаразэ будэтэ,

²¹ калык люкаськон интыосын тодытэ, кар капкаосы пырон доръёсын со вераське:

²² «Укылтэмъёс, укылтэм улонэз кема-а яратоды на? Керетӥсь-даллашисьёс, керетон-даллашон пӧлазы кема-а шумпотыса улозы на? Вакчи визьёс, тодон-валанэз синазькыль карыса, кема-а улозы на?

²³ Сьӧлыкъёстэс шарае поттэмме кылзӥське: тани, мон тӥ вылэ духме лэзё, верано кылъёсме иворто.

²⁴ Мон ӧти, нош тӥ ӧд кылзӥське; киме мычыса улӥ, но монэ санэ понӥсь ӧй вал.

²⁵ Мынэсьтым вань визь-кенешъёсме палэнтӥды, сьӧлыкъёстэс-шекъёстэс шарае поттэмме кабыл ӧд басьтэ.

²⁶ Со понна курадӟон тӥ вылэ вуиз ке, мон серекъяло; шимес адӟонъёс тӥ доры вуизы ке, шумпото.

²⁷ Тӥ доры сильтӧл кадь шимес адӟон лыктоз, тӧлпери кадь шугадӟон тӥ доры вуоз. Куректон-кайгу, ӝикаса улон тӥ доры вуизы ке,

²⁸ соку тӥ монэ, визьлыкез, ӧтьыны кутскоды, но мон тӥледыз уг кылы; ӵукнаысен ик монэ утчалоды, но уд шедьтэ.

²⁹ Со понна уго со: тодон-валанэз синазькыль каремды понна, Кузё-Инмарлэсь кышканэз бырйымтэды понна,

³⁰ мынэсьтым визь-кенешъёсме кабыл басьтымтэды понна, сьӧлыкъёстэс-шекъёстэс шарае поттэмме кулэтэм каремды понна;

³¹ ас ужъёстылэсь емышъёссэс сиёды, малпанэныды-мылкыдыныды кӧттэс тыроды,

³² малы ке шуоно укылтэмъёсты вогъяськыса улэмзы виёз, вакчи визьёсты сюлмаськытэк-тыршытэк улэмзы быдтоз,

³³ нош мынэсьтым верамме кылзӥськыса улӥсь мурт уродлэсь кышкатэк, куалекъятэк, каньылэн улоз».