Лыдпусъёс 1 - Библия удмурт кылын

1-тӥ ЛЮКЕТ

¹ Египет музъемысь потэмзы бере кыкетӥ араз Кузё-Инмар Сӥнай луоё кыр дуннеысен, вӧсяськон скинияысен, кыкетӥ толэзьлэн нырысетӥ [нуналаз], Моисейлы тазьы шуиз:

² «Вань израиль калыкез выжыосынызы, семьяосынызы ӵош, нимын-нимын лыдъялэ, вань пиосмуртъёсты, одӥгзэс но кельтытэк, ваньзэс гожъялэ;

³ кызь аресъемъёссэ но, солэсь бадӟымъёссэ но, Израильысь ожмаськыны ярамон муртъёсты, полкен-полкен соосты лыдъялэ – та ужез тон Ааронэн ӵош лэсьты;

⁴ котькуд выжыысь одӥг мурт, аслаз улы-бечеезлэн кузёйырыз, тӥледын ӵош луыны кулэ.

⁵ Тани тӥледын ӵош луоно пиосмуртъёслэн нимъёссы: Рувим выжыысь Шедеурлэн Елицур пиез;

⁶ Симеон выжыысь Цуришаддайлэн Шелумиил пиез,

⁷ Иуда выжыысь Аминадавлэн Наассон пиез;

⁸ Иссахар выжыысь Цуарлэн Нафанаил пиез;

⁹ Завулон выжыысь Хелонлэн Елиав пиез;

¹⁰ Иосифлэн пиосыз пӧлысь: Ефремлэн выжыысьтыз Аммиудлэн Елишама пиез; Манассиялэн выжыысьтыз Педацурлэн Гамалиил пиез;

¹¹ Вениамин выжыысь Гидеонийлэн Авидан пиез;

¹² Дан выжыысь Аммишаддайлэн Ахиезер пиез;

¹³ Асир выжыысь Охранлэн Пагиил пиез;

¹⁴ Гад выжыысь Регуиллэн Елиасаф пиез;

¹⁵ Неффалим выжыысь Енанлэн Ахира пиез.

¹⁶ Таос луо калыклэн быръем воргоронъёсыз, атайёссылэн выжыысьтызы кивалтӥсь йыръёс, Израильысь сюрс муртъёсын кивалтӥсьёс».

¹⁷ Моисеен Аарон та нимын-нимын вылӥ верам воргоронъёсты бордазы кутӥзы,

¹⁸ кыкетӥ толэзьлэн нырысетӥ [нуналаз] соос вань калыкез огазе люказы но соосты выжыен-выжыен, семьяен-семьяен, кызь аресъем пиосмуртъёсты но солэсь бадӟымъёссэ, одӥгзэс но кельтытэк, ваньзэс нимын-нимын гожтӥзы,

¹⁹ кызьы Кузё-Инмар Моисеез лэсьтыны косӥз. Калыкез лыдъян-ӵотанэз Моисей Сӥнай луоё кыр дуннеын ортчытӥз.

²⁰ Израильлэн нырысь вордскем Рувим пиезлэн пиосыз выжыосынызы, улы-бечеосынызы, семьяосынызы ӵош, одӥгзэс но кельтытэк, ваньзы нимын-нимын гожтэмын – вань пиосмуртъёс, кинъёслы кызь яке тросгес арес ини, кинъёс оже мыныны ярамонэсь вал.

²¹ Рувимлэн выжыяз лыдъямын-ӵотамын ньыльдон куать сюрс вить сю мурт.

²² Симеонлэн пиосыз выжыосынызы, улы-бечеосынызы, семьяосынызы ӵош, одӥгзэс но кельтытэк, вань пиосмуртъёс, кызь арес тырмемъёс но солэсь бадӟымъёсыз, оже мыныны ярамонъёс – ваньзы нимын-нимын гожтэмын,

²³ Симеонлэн выжыяз лыдъямын-ӵотамын витьтон укмыс сюрс куинь сю адями.

²⁴ Гадлэн пиосыз выжыосынызы, улы-бечеосынызы, семьяосынызы ӵош, [одӥгзэс но кельтытэк – вань пиосмуртъёс,] кинъёслы кызь арес тырмемын ни, солэсь но бадӟымъёсыз, оже мыныны ярамонъёс – ваньзы нимын-нимын гожтэмын,

²⁵ Гадлэн выжыяз лыдъямын-ӵотамын ньыльдон вить сюрс куать сю витьтон адями.

²⁶ Иудалэн пиосыз выжыосынызы, улы-бечеосынызы, семьяосынызы ӵош, нимын-нимын, [одӥгзэс но кельтытэк – вань пиосмуртъёс,] кинъёслы кызь арес тырмемын ни, солэсь но бадӟымъёсыз, оже мыныны ярамонъёс,

²⁷ Иудалэн выжыяз лыдъямын-ӵотамын сизьымдон ньыль сюрс куать сю мурт.

²⁸ Иссахарлэн пиосыз выжыосынызы, улы-бечеосынызы, семьяосынызы, [одӥгзэс но кельтытэк – вань пиосмуртъёс,] кинъёслы кызь арес тырмемын ни, солэсь но бадӟымъёсыз, оже мыныны ярамонъёс – ваньзы нимын-нимын гожтэмын,

²⁹ Иссахарлэн выжыяз лыдъямын-ӵотамын витьтон ньыль сюрс ньыль сю адями.

³⁰ Завулонлэн пиосыз выжыосынызы, улы-бечеосынызы, семьяосынызы ӵош, [одӥгзэс но кельтытэк, ваньзы] нимын-нимын гожтэмын – [вань пиосмуртъёс,] кинъёслы кызь арес тырмемын ни, солэсь но бадӟымъёсыз, оже мыныны ярамонъёс,

³¹ Завулонлэн выжыяз лыдъямын-ӵотамын витьтон сизьым сюрс ньыль сю адями.

³² Иосифлэн Ефрем пиезлэн пиосыз выжыосынызы, улы-бечеосынызы, семьяосынызы ӵош, [одӥгзэс но кельтытэк, ваньзы – вань пиосмуртъёс,] кинъёслы кызь арес тырмемын ни, солэсь но бадӟымъёсыз, оже мыныны ярамонъёс – нимын-нимын гожтэмын,

³³ Ефремлэн выжыяз лыдъямын-ӵотамын ньыльдон сюрс вить сю мурт.

³⁴ Манассиялэн пиосыз выжыосынызы, улы-бечеосынызы, семьяосынызы ӵош, [одӥгзэс но кельтытэк, ваньзы] нимын-нимын гожтэмын – [вань пиосмуртъёс,] кинъёслы кызь арес тырмемын ни, солэсь но бадӟымъёсыз, оже мыныны ярамонъёс,

³⁵ Манассиялэн выжыяз лыдъямын-ӵотамын куамын кык сюрс кык сю адями.

³⁶ Вениаминлэн пиосыз выжыосынызы, улы-бечеосынызы, семьяосынызы ӵош, [одӥгзэс но кельтытэк, ваньзы] нимын-нимын гожтэмын – [вань пиосмуртъёс,] кинъёслы кызь арес тырмемын ни, солэсь но бадӟымъёсыз, оже мыныны ярамонъёс.

³⁷ Вениаминлэн выжыяз лыдъямын-ӵотамын куамын вить сюрс ньыль сю адями.

³⁸ Данлэн пиосыз выжыосынызы, улы-бечеосынызы, семьяосынызы ӵош, [одӥгзэс но кельтытэк, ваньзы] нимын-нимын гожтэмын – [вань пиосмуртъёс,] кинъёслы кызь арес тырмемын ни, солэсь но бадӟымъёсыз, оже мыныны ярамонъёс,

³⁹ Данлэн выжыяз лыдъямын-ӵотамын куатьтон кык сюрс сизьым сю адями.

⁴⁰ Асирлэн пиосыз выжыосынызы, улы-бечеосынызы, семьяосынызы ӵош, [одӥгзэс но кельтытэк, ваньзы – вань пиосмуртъёс,] кинъёслы кызь арес тырмемын ни, солэсь но бадӟымъёсыз, оже мыныны ярамонъёс – нимын-нимын гожтэмын,

⁴¹ Асирлэн выжыяз лыдъямын-ӵотамын ньыльдон одӥг сюрс вить сю адями.

⁴² Неффалимлэн пиосыз выжыосынызы, улы-бечеосынызы, семьяосынызы ӵош, [одӥгзэс но кельтытэк, ваньзы – вань пиосмуртъёс,] кинъёслы кызь арес тырмемын ни, солэсь но бадӟымъёсыз, оже мыныны ярамонъёс – нимын-нимын гожтэмын,

⁴³ Неффалимлэн выжыяз лыдъямын-ӵотамын витьтон куинь сюрс ньыль сю мурт.

⁴⁴ Тани та Моисеен Ааронлэн, Израильлэн кивалтӥсь йыръёсызлэн – дас кык адямилэн, котькуд выжыысь быдэн одӥг адями вал соос, – лыдъям-ӵотамзы пӧлы пыремъёс.

⁴⁵ Семьяен-семьяен израиль пиос, кинъёслы кызь арес тырмемын ни вал, солэсь но бадӟымъёсыз, Израильлэн ожмаськыны ярамон муртъёсыз, ваньзы лыдъян-ӵотан пӧлы пыризы,

⁴⁶ лыдъян-ӵотан пӧлы ваньмыз-ӧвӧлэз пыриз куать сю куинь сюрс вить сю витьтон мурт.

⁴⁷ Нош левитъёс атайёссылэн выжыенызы ӵош лыдъян-ӵотан пӧлы пыртэмын ӧй вал.

⁴⁸ Соку Кузё-Инмар Моисейлы тазьы вераз, тазьы шуиз:

⁴⁹ «Левитлэсь выжызэ гинэ лыдъян-ӵотан пӧлы эн пырты, израиль пиосын огазьын соосты эн лыдъялэ;

⁵⁰ сӥзён-косонэн скинияез но солэн пушкысьтыз, бордысьтыз вань арбериоссэ левитъёс кие сёт: скинияез но со пушкысь, со бордысь вань арбериосты соос мед нуллозы, скинияын вӧсяськонъёсты мед ортчытъялозы, со котыре станзэс мед пуктозы;

⁵¹ скинияез мукет интые выжытоно луиз ке, левитъёс сое мед ӝутозы; нош скиниялы кытчы ке дугдоно луиз ке, левитъёс сое мед пуктозы; кин ке но левит луисьтэм мурт со борды йӧтӥськиз ке, виемын луоз.

⁵² Вань израиль пиос котькудзы асьсэлэн станазы дугдыны кулэ, котькудӥз аслаз знамяез вӧзы, аслаз полкез пушкы интыяськыны кулэ;

⁵³ нош левитъёс станзэс интыяны кулэ сӥзён-косонэн скиния вӧзы, израиль калык вылэ вожпотон медаз усьы шуыса; левитъёс сӥзён-косонэн скиния дорын возьмаськыса сылозы».

⁵⁴ Израиль пиос тазьы лэсьтӥзы; кызьы Кузё-Инмар Моисей пыр косон сётӥз, озьы ик соос лэсьтӥзы.