Лука 9 - Библия удмурт кылын

9-тӥ ЛЮКЕТ

¹ Дас кыксэ ик дышетскисьёссэ ӧтиз но вань периосты улляса поттаны, висёнъёсты бурмытъяны соослы кужым, эрик сётӥз,

² соосты Инмар Эксэйлыкез тодытыны, висисьёсты йӧнатыны ыстӥз.

³ Соослы шуиз: «Сюрес вылэ номыр но эн басьтэ: боды но, пуйы но, нянь но, азвесь но, кык пумо дӥськутты но медаз луы.

⁴ Кыӵе корка пыриды, отчы кыле, отысен сюрес вылэ потэ.

⁵ Ӧз ке пыртэ тӥледыз, соку со городысь потыкуды, соослэсь янгышъёссэс шарае поттон понна пыдысьтыды сюйзэ курткыса кельтэ».

⁶ Соос мынӥзы но, гуртъёстӥ Ӟеч Ивор вераса, котькытӥ но йӧнатыса ветлӥзы.

⁷ Ньылетӥ люкетэн кивалтӥсь Ирод ваньмыз сярысь, мар лэсьтэ Иисус, кылӥз но абдраз: уго огъёсыз верало вал со, пе, Иоанн улӟыса султэм,

⁸ мукетъёсыз – Илия лыктэм, нош куд-огъёсыз шуизы вашкала пророкъёс пӧлысь одӥгез, пе, улӟыса султэм.

⁹ Ирод шуиз: «Иоаннлэсь йырзэ ӵогыса басьтӥ. Кин бен Со, Кин сярысь мон таӵе ивор кылӥсько?» Ирод Иисусэз адӟыны турттыса, Сое адӟемез потыса улӥз.

¹⁰ Апостолъёс берытскыса Иисуслы мар лэсьтэмзы сярысь веразы. Со, соосты сьӧраз басьтыса, Вифсаида шуон городлы матысь чик калыктэм интые кошкиз.

¹¹ Нош калык тодӥз но Иисус бӧрсьы мынӥз. Соосты Со бордаз кутӥз но Инмар Эксэйлык сярысь соослы вераз, йӧнатыны курисьёсты йӧнатылӥз.

¹² Нунал ӝыт пала кыстӥськыны кутскиз. Со доры лыктыса, дас кык дышетскисьёсыз Солы веразы: «Калыкез артысь гуртъёсы, починкаосы кӧлыны, сиён утчаны лэзь, асьмеос кыр интыын уго».

¹³ Нош Иисус соослы шуиз: «Тӥ соослы сиён сётэлэ». Соос шуизы: «Милям вить няньмы но кык чорыгмы сяна, номырмы но ӧвӧл. Вань калыклы мыныса сиён басьтоно ке шат?»

¹⁴ Отын ог вить сюрс пиосмурт вал. Со дышетскисьёсызлы шуиз: «Пуктэлэ соосты витьтон муртэн, чурен-чурен».

¹⁵ Озьы каризы, ваньзэс пуктылӥзы.

¹⁶ Нош Иисус вить нянез но кык чорыгез басьтыса, ин пала учкиз, соосты бакель кариз, тӥялтӥз но, калыклы мед люкылозы шуыса, дышетскисьёсызлы сётъяз.

¹⁷ Сиизы, ваньзылэн кӧтсы тыриз. Соос бере кылем юдэсъёсты дас кык кудые тыраз бичазы.

¹⁸ Одӥг пол, шыпыт интыын вӧсяськыса улыкуз, бордаз дышетскисьёсыз вал. Соослэсь Со юаз: «Калык Монэ кин шуыса лыдъя?»

¹⁹ Соос ответ сётыса шуизы: «Иоанн Пылатӥсь, куд-огез Илия шуэ; мукетъёсыз шуо вашкала пророкъёс пӧлысь, пе, одӥгез улӟем».

²⁰ Соослэсь Иисус юаз: «Нош тӥ асьтэос Монэ кин шуыса лыдъяськоды?» Петр ответ сётыса шуиз: «Инмарлэн Христосэз шуыса».

²¹ Та сярысь нокинлы но медаз вералэ шуыса, соосты юн алӥз.

²² Вераз, Адями Пилы трос курадӟонэз чидано луоз, тӧроос, архиерейёс, книга тодӥсьёс Сое палэнтозы, Сое виёзы, куинетӥ нуналаз улӟыса султоз шуыса.

²³ Нош ваньмызлы шуиз: «Кин Мон сьӧры мыныны малпа, аслэсьтыд ачид куштӥськы, киростэ басьты но Мон сьӧры мын.

²⁴ Уго кинлэн лулзэ утемез потэ, со сое ыштоз, нош кин Мон понна лулзэ ыштоз – со лулзэ утёз.

²⁵ Адямилы мар пайдаез быдэс дуннеез аслыз басьтӥз ке, нош ачиз быриз яке аслыз изъян лэсьтӥз ке?

²⁶ Уго кин Мынэсьтым, Мынам кылъёсылэсь возьдаськиз ке, Аслаз пиштӥсь данлыкеныз, Атаезлэн, святой Кылчинъёслэн пиштӥсь данлыкенызы лыктыкуз, со муртлэсь Адями Пи но возьдаськоз.

²⁷ Зэм ик тӥледлы верасько: татын сылӥсьёс пӧлын вань куд-ог адямиос, соос кулыса уз вуэ, Инмар Эксэйлыкез адӟозы».

²⁸ Та кылъёс бере, ог тямыс нунал ортчыса, Петрез, Иоаннэз но Иаковез басьтыса, Иисус вӧсяськыны гурезе тубиз.

²⁹ Вӧсяськыкуз Солэн ымнырыз воштӥськиз, дӥсянэз пиштӥсь тӧдьы луиз.

³⁰ Тани кык пиосмуртъёс Соин вераськыса улӥзы, со Моисеен Илия вал.

³¹ Данлыкен лыктыса, Солэн кошконэз сярысь вераськизы, кудзэ Со Иерусалимын быдэстыны кулэ луоз.

³² Петрез но соин ӵош луэмъёсты ум нюртыса возиз. Сайказы но Солэсь пиштӥсь данлыксэ, Соин огазьын сылӥсь кык пиосмуртъёсты адӟизы.

³³ Соос дорысь кошкыкузы, Петр Иисуслы шуиз: «Дышетӥсь! Милемлы татын улыны ӟеч; ваелэ куинь тылыс пуктоме, одӥгзэ Тыныд, одӥгзэ Моисейлы, одӥгзэ Илиялы», – мар верамзэ валатэк.

³⁴ Тае веракуз, пилем лыктыса соосты шобыртӥз; пилем пушкы пырем беразы кышкатскизы.

³⁵ Пилем пушкысь тазьы верась куара кылӥськиз: «Та Мынам Яратоно Пие; Солэсь кылзӥське».

³⁶ Та куара бере Иисус огназ кылиз. Нош соос шып улӥзы, со нуналъёсы ма адӟемзы сярысь нокинлы но ӧз вералэ.

³⁷ Мукет нуналаз, гурезьысь васькем беразы, Иисусэз трос калык пумитаз.

³⁸ Шӧдтэк шорысь калык пӧлысен кин ке но черектӥськиз: «Дышетӥсь! Тэльмырыса Тонэ пиме учкыны курисько, со мынам одӥг гинэ:

³⁹ Сое пери кутэ но, соку ик со черектӥське, курадӟытэ сое, шукыез ик вия; катьтэммытэм бераз гинэ мырдэм со дорысь кошке.

⁴⁰ Тынэсьтыд дышетскисьёстэ кури вал перизэ улляса поттыны; нош соос ӧз быгатэ».

⁴¹ Иисус ответ сётыса шуиз: «Эй, оскисьтэм, азэм выжы! Кема уло на-а тӥ пӧлын, кема-а чидало на тӥледыз? Вай татчы пидэ».

⁴² Со лыктэ вал ай, нош пери сое уськытыса тышканы кутскиз. Иисус периез алӥз но пинал пиез йӧнатӥз, сое атаез кие сётӥз.

⁴³ Инмарлэн быдӟымлыкезлы ваньзы паймыса улӥзы. Ваньзы соос Иисуслэн вань лэсьтэмъёсызлы паймыса улыку, Со дышетскисьёсызлы шуиз:

⁴⁴ «Пеляды понэ та кылъёсыз: Адями Пи адямиослэн киулазы сётэмын луоз».

⁴⁵ Но та верам кылэз соос ӧз валалэ; уго сое медаз валалэ шуыса, со кыл соослэсь ватӥськемын вал. Нош Солэсь со кыл сярысь юаны кышказы.

⁴⁶ Соослэн сюлмазы малпан лыктӥз: соос пӧлысь кин меда ваньмызлэсь бадӟымез?

⁴⁷ Иисус, соослэсь сюлэм малпанзэс тодыса, пичи пиналэз кутӥз но Аслаз азяз султытӥз.

⁴⁸ Собере соослы шуиз: «Кин Мынам нимы понна та пиналэз кабыл басьтэ, со Монэ кабыл басьтэ; нош кин Монэ кабыл басьтэ, со Монэ Ыстӥсез кабыл басьтэ. Уго тӥ пӧлысь кин ваньмызлэсь покчи, со ваньмызлэсь быдӟым луоз».

⁴⁹ Соку Иоанн шуиз: «Дышетӥсь! Тынад нимыныд периосты уллясь адямиез ми адӟимы, но ӧм ни лэзе со ужен вырыны, малы ке шуоно со асьмемын уг ветлы».

⁵⁰ Иисус солы шуиз: «Эн алэ; уго кин тӥледлы пумит ӧвӧл, со – тӥ палан».

⁵¹ Дунне вылысь басьтӥськон нуналъёсыз матэ вуыны кутскем бере Иисус Иерусалиме мыныны потӥз.

⁵² Аслаз азяз ивортӥсьёсты лэзиз. Соос мыныса самарян гуртэ пыризы, – Солы ваньзэ дасян понна.

⁵³ Но отын Сое кабыл ӧз басьтэ, малы ке шуоно Солэн вылтусыз Иерусалиме мынӥсь муртлэн кадь вал.

⁵⁴ Тае адӟыса, дышетскисьёсыз Иаков но Иоанн шуизы: «Кузё-Инмаре! Кулэ-а Тыныд, ми вералом, Инмысь тыл мед васькоз но соосты мед быдтоз шуыса, кызьы Илия лэсьтӥз вал?»

⁵⁵ Нош Иисус, соос пала берытскыса, соосты алыса шуиз: «Уд тодӥське, кыӵе духен тӥ.

⁵⁶ Адями Пи адями лулъёсты быдтыны ӧз лыкты, утьыны Со лыктӥз ук». Отысен соос мукет гуртэ кошкизы.

⁵⁷ Луиз озьы: сюрес вылын дыръязы кин ке но Солы шуиз: «Кузёе! Кытчы гинэ Тон уд мыны, мон Тон сьӧры мыно».

⁵⁸ Иисус солы шуиз: «Ӟичыослэн гутёзы вань, ин тылобурдоослэн – карзы; нош Адями Пилэн йырзэ понон интыез но ӧвӧл».

⁵⁹ Мукетызлы адямилы Со шуиз: «Мон сьӧры мын». Соиз шуиз: «Кузё-Инмаре! Нырысь лэзь вал монэ аслэсьтым атайме ватыны мыныны».

⁶⁰ Иисус солы шуиз: «Кулэмъёс асьсэлэсь кулэмъёссэс мед ватозы, нош тон мын но Инмар Эксэйлык сярысь Ӟеч Иворез тодытыса ветлы».

⁶¹ Эшшо мукетыз адями Солы шуиз: «Мон Тон сьӧры мыно, Кузёе! Но азьвыл лэзь монэ гуртоосыным люкиськыны».

⁶² Иисус солы шуиз: «Нокудӥз но геры вылэ кизэ поныса берланяз утчаськись мурт Инмар Эксэйлыклы оскиськымон адями уг луы».