Лука 8 - Библия удмурт кылын

8-тӥ ЛЮКЕТ

¹ Собере Иисус, Инмар Эксэйлыкез тодытыса, Ӟеч Ивор вераса, городъёстӥ, гуртъёстӥ ветлӥз. Соин ӵош дас кык дышетскисьёсыз ветлӥзы,

² нош озьы ик куд-ог кышномуртъёс но Со сьӧрын ветлӥзы, соосты Со периослэсь мозмытӥз, висёнъёслэсь бурмытӥз: пушкысьтыз сизьым периос потэм Магдалина шуон Мария;

³ Иродлэсь юртъерзэ утьыса улӥсь Хузалэн кышноез Иоанна, озьы ик Сусанна но трос мукетъёсыз. Соос Иисуслы асьсэлэн ваньбуренызы юрттӥськыса улӥзы.

⁴ Трос калык люкаськиз, вань городъёсысь калык Иисус котыре лыктӥз. Со мадён пыр вераны кутскиз:

⁵ «Кизись кидыссэ кизьыны потэм. Кизьыкуз куд-огез сюрес дуре усем но лёгаськем, ин тылобурдоос сое кокчаса быдтӥллям.

⁶ Куд-огез из вылэ усем, потэм но шуям, малы ке шуоно мускытэз вылымтэ.

⁷ Куд-огез бышкись будосъёс куспы усем, бышкись будос ӝужам но ӝокатэм сое.

⁸ Куд-огез ӟеч музъеме усем – будэм но сю полэс емыш ваем». Тае верам бераз бадӟым куараен ялӥз: «Кылыны пельыз вань мурт – мед кылоз!»

⁹ Дышетскисьёсыз Солэсь юазы: «Та мадён мае возьматэ?»

¹⁰ Со шуиз: «Тӥледлы Инмар Эксэйлыклэсь ватӥськыса улӥсь зэмлыксэ тодон сётэмын, нош мукетъёслы – мадёнъёс пыр, соин ик соос учко, но уг адӟо, кыло, но уг валало.

¹¹ Тани мае та мадён возьматэ: кидыс – со Инмарлэн кылыз.

¹² Сюрес кузя усемез – со сыӵе кылзӥсьёс, кинъёс доры бӧрысь диавол лыктэ но, медаз оске, медаз утиське шуыса, соослэн сюлмысьтызы Инмар кылэз нуэ.

¹³ Из вылэ усемез – со сыӵеос, кинъёс кылэз кыло но шумпотыса кабыл басьто, но выжызы ӧвӧл: огдырын оско, нош визь сынаськон вуэ ке, усё.

¹⁴ Бышкись будосъёс пӧлы усемез – со сыӵеос, кинъёс кылэз кылзо, но сюлмаськонъёсын, узырлыкен, майбыръяськыса улонэн нюртӥсько, соин ик емыш уг ваё.

¹⁵ Нош ӟеч музъеме усемез – со сыӵеос, кинъёс Инмар кылэз кыло но лякыт, чылкыт сюлмазы возё, чиданэнызы емыш ваё». Тае вераз но бадӟым куараен шуиз: «Кылыны пельыз вань мурт – мед кылоз!

¹⁶ Нокин но сюсьтылэз ӝуатыса посудаен уг шобырты яке кровать улэ уг пукты, пырисьёс югытэз мед адӟозы шуыса, сюсьтыл пуктонэ пукто.

¹⁷ Уго ӧвӧл нокыӵе но лушкем маке, кудӥз шарае потытэк уг кыльы, нокыӵе ватӥськемлэн но тодмо луытэк, шарае потытэк кылемез уг луы.

¹⁸ Чаклалэ, мае тӥ кылзӥськоды, уго кинлэн вань, солы сётэмын луоз; кинлэн ӧвӧл, солэсь, мае вань карыны малпа, соиз но басьтэмын луоз».

¹⁹ Иисус доры Анаез, братъёсыз лыктӥзы но калык тросысь Со доры пырыны ӧз быгатэ.

²⁰ Солы ивортӥзы: «Анаед но братъёсыд, Тонэ адӟемзы потыса, педлон сыло».

²¹ Соослы ответ сётыса, Иисус шуиз: «Мынам анае, Мынам братъёсы соос, кинъёс Инмар кылэз кылзо но сое быдэсъяло».

²² Одӥг нуналэ Иисус дышетскисьёсыныз ӵош пыже пыриз но соослы шуиз: «Зарезьлэн тупалаз выжоме». Собере соос кошкизы.

²³ Уякузы Со умме усиз. Зарезь вылын кужмо тӧл ӝутскиз но соосты тулкымен пылатъяны кутскиз, соос секыт учыре сюризы.

²⁴ Дораз лыктыса, Сое сайкатӥзы но шуизы: «Дышетӥсь! Дышетӥсь! Быриськомы». Нош Со султыса, тӧллы но вулэн тулкымъяськонэзлы алыса вераз. Соку тӧл дугдӥз, ву вылын чус луиз.

²⁵ Собере дышетскисьёсызлы Иисус шуиз: «Кытын тӥляд осконды?» Нош соос кышкаса но паймыса огзылы огзы веразы: «Кин Та, тӧллы но, вулы но косыса вера но, соос Солэсь кылзӥсько?»

²⁶ Галилеялы ваче пумитэ интыяськем Гадара шаере вуизы.

²⁷ Ярдуре потэм бераз городысь кемалась дырысен периосын ёртэм, дӥськут дӥсятэк, коркан улытэк, шайгу пещераосын улӥсь одӥг адями Сое пумитаз.

²⁸ Иисусэз адӟыса черектӥськиз но, Со азе пыдесъяськыса, бадӟым куараен вераз: «Иисус, Вылысь Инмарлэн Пиез, Тынад мон бордын мар ужед? Тэльмырыса Тонэ курисько, эн курадӟыты монэ».

²⁹ Уго Иисус перилы та адями пушкысь потыны косӥз, уго со кема дыр ӵоже сое курадӟытыса возиз. Сое утён понна думылыса, жильыяса возизы. Нош со думетъёсты тӥялляз, пери сое кыр дуннеосы улляса нуллӥз.

³⁰ Иисус солэсь юаз: «Кызьы тынад нимыд?» Со шуиз: «Легион», малы ке шуоно со пушкы трос периос пыремын вал.

³¹ Пыдэстэм гуэ соосты медаз улля вал шуыса, соос Иисусэз куризы.

³² Татын ик гурезьын бадӟым парсь уллё возьмаське вал. Периос Сое куризы, соос пушкы пырыны мед лэзёз вал шуыса. Соосты Со парсьёс пушкы пырыны лэзиз.

³³ Адями пушкысь потыса, периос парсьёслэн пушказы пыризы; соку парсь уллё меӵ ярысен зарезе тэтчаз но вуэ выйиз.

³⁴ Мар луэмез адӟыса, парсь возьмасьёс бызьыса кошкизы, городын но, гуртъёсын но та сярысь ивортӥзы.

³⁵ Луэм учырез адӟыны потӥзы. Иисус доры лыктыса адӟизы Иисуслэн пыд выжыяз дӥсяськыса, визьмын пукись адямиез, кудӥз пушкысь периос потӥзы. Соос туж куалектӥзы.

³⁶ Адӟисьёс соослы веразы перияськем муртлэсь кызьы бурмемзэ.

³⁷ Гадара ёросысь вань калык Иисусэз дорысьтызы кошкыны куриз, уго соосты туж бадӟым куалектон ёртӥз. Со пыже пыриз но потэм интыяз берытскиз.

³⁸ Периосыз потэм мурт Иисусэз куриз Соин огазьын луыны. Нош Иисус сое бертыны косыса шуиз:

³⁹ «Аслад дорад берт но вера, мар тыныд Инмар лэсьтӥз». Со мыныса быдэс городэтӥ Иисуслэсь соин мар каремзэ тодытыса ветлӥз.

⁴⁰ Иисус берытскем бере калык Сое ӟеч пумитаз, уго ваньзы Сое возьмало вал.

⁴¹ Соку сӥнагогалэн Иаир нимо кивалтӥсез лыктӥз. Иисуслэн азяз пыдесъяськыса, Сое аслаз корказ пырыны куриз, –

⁴² солэн ог дас кык аресъем одӥг гинэ нылыз вал, со но кулоно кадь черлам. Со мыныку, калык Сое ӝиптӥз.

⁴³ Соку вирыз кошкыса дас кык ар ӵоже курадӟыса улӥсь кышномурт, кудӥз вань юртъерзэ врачъёслы тырыны быдтӥз, нош йӧнатыны огез но сое ӧз быгаты,

⁴⁴ бертӥз лыктыса, Иисуслэн дӥсянэзлэн сӧзы бордаз йӧтӥськиз. Со куспын ик вирыз виямысь дугдӥз.

⁴⁵ Иисус шуиз: «Кин Мон борды йӧтӥськиз?» Куке ваньзы «ӧм» шуизы, Петр но Соин ӵош луэмъёс веразы: «Дышетӥсь! Калык Тонэ котыртэ, ӝиптэ, нош Тон шуиськод: ”Кин Мон борды йӧтӥськиз?”»

⁴⁶ Соку Иисус шуиз: «Кин ке но Мон борды йӧтӥськиз. Мон шӧдӥ пушкысьтым кужымлэсь потэмзэ».

⁴⁷ Ватыны луымтэзэ адӟыса, кышномурт куалектыса лыктӥз но, Со азе пыдесъяськыса, вань калык азьын Солы ялӥз, кыӵе муген Со борды йӧтӥськиз но кызьы со куспын ик бурмиз.

⁴⁸ Иисус шуиз: «Сэзь лу, нылмурт! Осконэд тонэ утиз. Каньылэн берт».

⁴⁹ Тае веран куспетӥз кин ке но, сӥнагогалэн кузёез дорысь лыктыса, солы шуиз: «Нылыд кулӥз. Эн ни раньӟыты Дышетӥсез».

⁵⁰ Та кылъёсыз кылыса, Иисус солы шуиз: «Эн кышка, оскы гинэ, утемын луоз».

⁵¹ Корказы вуыса, Петрез, Иоаннэз, Иаковез но ныллэсь атаеныз анайзэ сяна, нокинэ но бӧрсязы пырыны ӧз лэзьы.

⁵² Со ныл понна ваньзы бӧрдӥзы, викышъязы, нош Иисус шуиз: «Эн бӧрдэ, со кулэмын ӧвӧл, со изе гинэ».

⁵³ Ныллэсь кулэмзэ тодыса, Сое серем каризы.

⁵⁴ Нош Со ваньзэс педло поттӥз, нылмуртэз китӥз кутӥз но солы бадӟым куараен вераз: «Нылаш! Султы».

⁵⁵ Ныллэн лулыз берытскиз; соку ик со султӥз. Иисус солы сиён сётыны косӥз.

⁵⁶ Анай-атайёсыз паймизы. Нош Иисус та луэм учыр сярысь нокинлы но вераны ӧз косы.