Лука 7 - Библия удмурт кылын

7-тӥ ЛЮКЕТ

¹ Кылзӥськисьёслы вань верано кылзэ вераса быдтэм бераз Иисус Капернауме пыриз.

² Огезлэн сю солдатъёсын кивалтӥсьлэн яратоно ляльчиез кулоно кадь ик висе вал.

³ Иисус сярысь кылӥз но иудей тӧроосты Со доры, солэсь ляльчизэ лыктыса мед бурмытоз вал шуыса, Солэсь курыны ыстӥз.

⁴ Иисус доры лыктыса, туж куризы: «Тон солы юртты вал, со ярамон адями,

⁵ со асьмелэсь калыкмес яратэ, асьмелы сӥнагога но пуктӥз ук».

⁶ Иисус соосын ӵош мынӥз. Коркалы матэ вуэм бераз сю солдатэн кивалтӥсь Иисус доры эшъёссэ Солы вераны ыстӥз: «Кузёе! Эн сюлэмшугъяськы. Тон мынам коркам пырон понна мон ярамон адями ӧвӧл.

⁷ Соин ик асме ачим Тон доры мыныны ярамон адями ӧвӧл шуыса лыдъяй; кыл гинэ вера но, мынам ляльчие бурмоз.

⁸ Мон уго ачим но мурт киулын ужась адями. Но мынам киулам солдатъёс вань, огезлы шуисько: ”Мын”, – со мынэ; мукетызлы: ”Лыкты”, – со лыктэ; ляльчиелы шуисько: ”Лэсьты сое”, – со лэсьтэ».

⁹ Тае кылыса, Иисус паймиз но сьӧраз лыктӥсьёслы шуиз: «Тӥледлы верасько: Израильысь но таӵе осконэз Мон ӧй шедьты».

¹⁰ Ыстэм муртъёс корказы берытскыку, ляльчи бурмемын вал ни.

¹¹ Та бере Иисус Наин шуон городэ мынӥз; Соин ӵош тросэз дышетскисьёсыз, туж уно калык мынӥзы.

¹² Со кар капкалы матэ вуыку, кулэм муртэ потто вал. Анаезлэн со одӥг гинэ пиез вал, анаез – палкышно; трос калык келяськыса мынӥз.

¹³ Кузё-Инмар сое адӟиз но жаляса шуиз: «Эн бӧрды».

¹⁴ Матаз лыктыса, кулэм мурт нуон маке борды йӧтӥськиз; нуисьёс дугдӥзы. Со шуиз: «Пияш! Тыныд верасько: султы».

¹⁵ Кулэм пи ӝутӥськыса пуксиз но вераськыны кутскиз; Иисус сое анаезлы сётӥз.

¹⁶ Ваньзы ик туж куалектӥзы но Инмарез данъяса шуизы: «Асьме куспысь быдӟым пророк султӥз. Инмар Ас калыкез доры вуылӥз».

¹⁷ Иисус сярысь таӵе ивор быдэс Иудеяе, котыр ёросъёсы вӧлмиз.

¹⁸ Та сярысь дышетскисьёсыз ваньзэ Иоаннлы веразы.

¹⁹ Иоанн кыксэ дышетскисьёссэ ӧтиз, соосты со Иисус доры юаны ыстӥз: «Тон-а Со, Кудӥз лыктыны кулэ, яке милемлы мукетсэ-а витёно?»

²⁰ Иисус доры лыктыса шуизы: «Иоанн Пылатӥсь милемыз Тон доры юаны ыстӥз: ”Тон-а Со, Кудӥз лыктыны кулэ, яке милемлы мукетсэ-а витёно?”»

²¹ Нош та вадесын Со трос муртэ висёнъёссылэсь, курадӟонъёссылэсь, периослэсь мозмытӥз, троссэ синтэмъёсты адӟись кариз.

²² Соослы ответ сётыса, Иисус шуиз: «Мар адӟиды, кылӥды, мынэлэ но Иоаннлы вералэ: синтэмъёс адӟыны кутско, чутъёс ветло, гижлочерен висисьёс чылкытало, пельтэмъёс кыло, кулэмъёс улӟо, куанеръёс Ӟеч Ивор тодыто.

²³ Мон пумысен визь сынаськонлы сётскисьтэм мурт шудо».

²⁴ Иоаннлэн ыстэм муртъёсыз кошкем бере Иоанн сярысь калыклы вераны кутскиз: «Кыр дуннее мае учкыны ветлӥды? Тӧл шорын веттаськись камыш бодыез-а?

²⁵ Мае бен тӥ учкыны ветлӥды? Небыт дӥськутэн дӥсяськем адямиез-а? Небыт дуно дӥськут нуллӥсьёс, узыр улӥсьёс эксэйёслэн юртазы уло.

²⁶ Мае бен тӥ учкыны ветлӥды? Пророкез-а? Тӥледлы верасько: бен, пророклэсь но вылӥысьсэгес.

²⁷ Та со ук, кин сярысь гожтэмын: ”Тани, Мон Тынад азьтӥд Кылчинме лэзисько, со Тынад азяд Тыныд сюрес дасялоз”.

²⁸ Тӥледлы верасько: кышномуртлэсь вордӥськемъёс пӧлысь Иоанн Пылатӥсьлэсь бадӟымез одӥг но пророк ӧвӧл; нош Инмар Эксэйлыкын покчиез но солэсь бадӟымгес».

²⁹ Сое кылзӥськыса улэм вань калык, выт бичасьёс но, кудъёсыз Иоанн дорын пылатӥськизы, Инмарез данъязы.

³⁰ Нош фарисейёс но закон тодӥсьёс, со дорын пылатӥськытэк, Инмарлэсь соос понна чаклам эриксэ палэнтӥзы.

³¹ Соку Кузё-Инмар шуиз: «Та выжыысь адямиосты кинэн ӵошатом? Кинлы соос укшало?

³² Соос укшало ульчаын пукись, ог-огзылы вазиськись нылпиослы, кинъёс шуо: ”Ми тӥледлы чипчирган шудӥмы, нош тӥ ӧд эктэ; ми тӥледлы ӝож гуръёс кырӟамы, нош тӥ ӧд бӧрдэ”.

³³ Иоанн Пылатӥсь лыктӥз, нянь но уг сиы, вина но уг юы, но тӥ шуиськоды: ”Со пушкын пери”.

³⁴ Адями Пи лыктӥз, Со сие но, юэ но, но тӥ шуиськоды: ”Таиз адями сиськыны, вина юыны яратэ, выт бичасьёслэн, сьӧлыкоослэн эшсы Со”.

³⁵ Визьлыклэн вань нылпиосыз визьлыклэсь шонер луонзэ возьмато».

³⁶ Фарисейёс пӧлысь одӥгез Иисусэз дораз сиськыны ӧтиз. Со фарисейлэн корказ пырыса пуксиз.

³⁷ Тани, та городысь одӥг сьӧлыко кышномурт Солэсь фарисей дорын сиськыса улэмзэ тодӥз но алавастр посудаен миро вайыса лыктӥз.

³⁸ Бертӥз Солэн пыд дораз кариськиз но бӧрдыса Солэсь пыдъёссэ синкылиен гылтӥз, ас йырысьтыз йырсиеныз ӵушылыны кутскиз. Солэсь пыдъёссэ чупаз но мироен зыраз.

³⁹ Тае адӟыса, Сое ӧтем фарисей ас понназ ачиз шуиз: «Со пророк ке луысал, тодысал – кин но кыӵе кышномурт Со борды йӧтӥське, – сьӧлыко мурт ук со».

⁴⁰ Солы вазиськыса, Иисус шуиз: «Симон! Мынам тыныд маке но веранэ вань». Со шуиз: «Вера, Дышетӥсь».

⁴¹ Иисус шуиз: «Одӥг пунэм сётъясьлэн кык пунэм тыроно муртэз вал: огез вить сю динарий, нош мукетыз – витьтон.

⁴² Тырыны номырзы но ӧвӧлысь, кыксылэсь но тыронзэс куштӥз. Вера, соос пӧлысь кудӥз сое юнгес яратоз?»

⁴³ Симон ответ сётӥз: «Малпасько, кудӥзлэсь троссэгес куштӥз». Со шуиз: «Шонер тон малпаськод».

⁴⁴ Кышномурт пала берыктӥськыса, Симонлы шуиз: «Адӟиськод-а тон та кышномуртэз? Мон тынад коркад лыктӥ но, тон Мынам пыдам вудэ ӧд сёты, нош со Мынэсьтым пыдъёсме синкылиен гылтӥз но йырысьтыз йырсиеныз ӵушылӥз.

⁴⁵ Тон Монэ ӧд чупа, нош со Мон лыктэм дырысен уг дугды Мынэсьтым пыдъёсме чупамысь.

⁴⁶ Тон Мынэсьтым йырме вӧйын ӧд зыра, нош со Мынэсьтым пыдъёсме мироен зыраз.

⁴⁷ Соин ик тыныд шуисько: трос яратэмез понна солэн трос сьӧлыкъёсыз куштӥсько. Кинлы ӧжыт куштӥське, со ӧжыт яратэ».

⁴⁸ Кышномуртлы шуиз: «Тынад сьӧлыкъёсыд куштӥсько».

⁴⁹ Соин ӵош сиськисьёс асьсэ понна вераськыны кутскизы: «Кин со, сьӧлыкъёсты но куштэ?»

⁵⁰ Нош Со кышномуртлы шуиз: «Осконэд тонэ утиз. Каньылэн мын».