Лука 6 - Библия удмурт кылын

6-тӥ ЛЮКЕТ

¹ Пасха бере одӥгаз суббота нуналэ Иисуслы кизем ю бусы вамен потоно луиз, Солэн дышетскисьёсыз ю шепъёсты чигылӥзы но киынызы куадаса сиизы.

² Фарисейёс пӧлысь куд-огез соослы шуизы: «Малы суббота нуналэ лэсьтыны ярантэм ужез лэсьтӥськоды?»

³ Иисус соослы ответ сётыса шуиз: «Ӧд лыдӟе шат, мар кариз Давид, куке солэн аслаз но, соин ӵош луэмъёслэн но кӧтсы сюмаз?

⁴ Кызьы со Инмар корка пыриз но курбон нянез басьтӥз, кудзэ священникъёслы сяна, нокинлы но сиыны уг яра вал, – ачиз но сииз, асэныз валче ветлӥсьёслы но сётӥз».

⁵ Собере Иисус соослы шуиз: «Адями Пи субботалы но кузё луэ».

⁶ Мукетаз субботае Иисус, сӥнагогае пырыса, дышетыны кутскиз. Отын бур киыз куасьмем мурт вал.

⁷ Иисусэз янгыше уськытон вылысь книга тодӥсьёс но фарисейёс Со сьӧрын чакласа улӥзы: суббота нуналэ уз бурмыты-а?

⁸ Соослэсь малпанзэс тодыса, киыз куасьмем муртлы Иисус шуиз: «Султы, пот шораз». Со султӥз но шораз потӥз.

⁹ Соку Иисус соослы шуиз: «Тӥлесьтыд Мон юало: суббота нуналэ мар лэсьтыны яра? Ӟеч уж яке урод уж? Лулэз утьыны яке быдтыны?» Соос шып улӥзы.

¹⁰ Ваньзы шоры учкиз но со муртлы шуиз: «Кидэ шонер кар». Со озьы ик кариз; киыз мукетыз кадь ик йӧн луиз.

¹¹ Соос урмизы, мар меда Иисусэн кароно шуыса, куспазы вераськизы.

¹² Со нуналъёсы Иисус гурезь йылэ вӧсяськыны тубиз, быдэс уй Инмарлы вӧсяськыса улӥз.

¹³ Нунал вуэм бере Аслэсьтыз дышетскисьёссэ Со ӧтиз но соос пӧлысь дас кыксэ бырйиз, соосты апостолъёс шуыса нимаз:

¹⁴ Симонэз Петр шуыса нимаз, солэсь Андрей вынзэ, Иаковез но Иоаннэз, Филиппез но Варфоломеез,

¹⁵ Матфеез но Фомаез, Алфейлэсь Иаков пизэ но Зӥлот шуон Симонэз,

¹⁶ Иаковлэсь Иуда пизэ но Искариот Иудаез. Таиз Инмар Пиез вузаса сётӥсь луиз.

¹⁷ Соосын ӵош васькыса, Иисус ӵошкыт интые султӥз. Тросэз дышетскисьёсыз, озьы ик быдэс Иудеяысь но Иерусалимысь, зарезь котырысь Тир но Сӥдон ёросъёсысь лачак калык отын вал.

¹⁸ Сое кылзӥськыны, висёнъёссылэсь йӧнатскыны соос лыктӥзы. Перияськем муртъёсты но Со бурмытылӥз.

¹⁹ Вань калык Со борды йӧтӥськыны тыршиз, малы ке шуоно Со бордысь кужым потыса, ваньзэс бурмытъяз.

²⁰ Синъёссэ дышетскисьёсыз пала ӝутыса, Иисус шуиз: «Покчи мылкыдоос шудоесь: тӥляд Инмар Эксэйлыкты вань.

²¹ Али сютэм улӥсьёс шудоесь: тӥляд кӧтты тыр луоз. Али бӧрдӥсьёс шудоесь: тӥ серекъялоды.

²² Шудоесь тӥ, куке тӥледыз Адями Пи понна адямиос адӟонтэм каризы ке, куке тӥледыз люкизы ке, курлазы ке, нимдэс саптаса куштӥзы ке.

²³ Шумпотэлэ со нуналэ, шулдыръяськелэ, уго Инмын басьтоно медды-кузьымды туж бадӟым. Соослэн атайёссы но пророкъёсты тазьы ик карылӥзы.

²⁴ Куректон-кайгу тӥледлы, узыръёс! Шумпотыса улондэс тӥ басьтӥды ни.

²⁵ Куректон-кайгу тӥледлы, али тыр улӥсьёс! Сиемды потоз уго. Куректон-кайгу тӥледлы, али серекъяса улӥсьёс! Бӧрдоды, викышъялоды ай.

²⁶ Куректон-кайгу тӥледлы, куке вань адямиос тӥ сярысь ушъяса вералозы. Соослэн атайёссы озьы каризы ӧрекчи пророкъёсын.

²⁷ Тӥледлы, кылзӥськисьёслы, верасько: тушмонъёстэс яратэлэ, тӥледыз кӧтвеськантэм карисьёстылы ӟеч каре,

²⁸ тӥледыз каргасьёсты бакель каре, тӥледыз ултӥясьёс понна вӧсяськелэ.

²⁹ Бамад чабкись муртлы мукет палзэ но пукты. Выл дӥсьтэ талась муртлы эн люкеты дэремдэ но басьтыны.

³⁰ Котькинлы, курись муртлы, сёт, тынэсьтыд басьтэм муртлэсь берен эн кур.

³¹ Адямиослы озьы лэсьтэ, кызьы асьтэлы соослэсь лэсьтэмзэс кулэ кариськоды.

³² Асьтэдыз яратӥсьёсты яратӥськоды ке, со понна тӥледлы кыӵе берекет луоз! Сьӧлыкоос но уго соосты яратӥсьёсты ярато.

³³ Асьтэлы ӟеч лэсьтӥсьёслы ӟеч лэсьтӥськоды ке, со понна тӥледлы кыӵе берекет? Сьӧлыкоос но уго озьы ик каро.

³⁴ Пунэмен сётӥськоды ке сыӵеослы, кинъёслэсь пунэм тыронзэс берен басьтом шуыса оскиськиськыса улӥськоды ке, со понна кыӵе тӥледлы берекет? Уго сьӧлыкоос но сьӧлыкоослы пунэмен сёто берен сомында ик басьтон вылысь.

³⁵ Нош тӥ тушмонъёстэс яратэлэ, ӟеч уж лэсьтэлэ, пунэмен сётэ, берен номыр но басьтыны малпатэк. Тӥляд туж бадӟым медды-кузьымды луоз, Вылысь Инмарлэн нылпиосыз луоды. Со уго тау карисьтэмъёслы но, лекъёслы но ӟеч.

³⁶ Кыӵе тӥляд атайды жалясь сюлэмо, тӥ но жалясь сюлэмоесь луэлэ.

³⁷ Судить эн каре, тӥ но судить каремын уд луэ. Эн курлалэ, тӥ но курламын уд луэ. Простить каре, тӥ но простить каремын луоды.

³⁸ Сётэлэ, тӥледлы но сётӥськоз: тыр мертэтэн мертаса, сэзъяса, туйылыса, пачыл карыса тӥледлы, тӥляд кияды сётӥськоз. Уго кыӵе мертэтэн мерталоды, сыӵеен ик тӥледлы но мертаськоз».

³⁹ Соослы мадён но вераз: «Быгатэ-а синтэм мурт синтэмез валтыса нуыны? Кыксы ик гуэ уз усе-а?

⁴⁰ Дышетскись дышетӥсезлэсь вылынгес уг луы; пумен визь люкаса но, дышетскись дышетӥсез кадь гинэ луоз.

⁴¹ Малы тон мукет муртлэн синмысьтыз жагез шоры учкиськод, нош аслад синмысьтыд корзэ уд шӧдӥськы?

⁴² Яке, кызьы тон мукет муртлы шуыны быгатод: ”Братэ! Вай синмысьтыд жагзэ потто”, куке аслад синмысьтыд корзэ уд адӟиськы? Чеберъяськись! Нырысь аслад синмысьтыд корзэ потты, соку адӟод, кызьы мукет муртлэн синмысьтыз жагзэ поттоно.

⁴³ Ӟеч писпу урод емыш уг сёты; урод писпу но ӟеч емыш уг сёты.

⁴⁴ Котькыӵе но писпуэз емышезъя тодманы луэ, малы ке шуоно смоква емышез тёрнпуысь уг бичало, виноградэз но емыш сётӥсьтэм куакысь уг окто.

⁴⁵ Ӟеч адями ас сюлмызлэн ӟеч шыкысысьтыз ӟечсэ поттэ, нош лек адями сюлмызлэн лек шыкысысьтыз лексэ поттэ. Уго сюлэм пачылмыку, кыл вера.

⁴⁶ Малы тӥ Мыным вазиськиськоды: ”Кузё-Инмаре! Кузё-Инмаре!”, нош асьтэос Мынэсьтым косэмме уд лэсьтӥське?

⁴⁷ Котькудӥз Мон доры лыктӥсь, Мынэсьтым кылме кылзӥськись но соосты быдэсъясь мурт, тӥледлы верало, кинлы со укша, –

⁴⁸ гу гудӟыса пыдло пырем но коркаезлэсь инъетсэ из вылэ пуктэм муртлы со укша. Ву будыса та корка вылэ урдскем но вырӟытэмез луымтэ, малы ке шуоно со из вылэ пуктэмын вылэм.

⁴⁹ Нош кылзӥськись но быдэсъясьтэм адями корказэ сюй вылэ инъеттэк пуктэм муртлы укша. Корка вылэ ву урдскем но, соку ик со куашкам; та коркалэн куашкамез туж шимес вылэм».