Лука 5 - Библия удмурт кылын

5-тӥ ЛЮКЕТ

¹ Огпол Инмар кылэз кылон понна калык Иисус борды ӝиптӥськыса улӥз. Со Геннисарет зарезь дурын сылӥз.

² Зарезь вылын сылӥсь кык пыжъёсты адӟиз. Чорыгасьёс, пыжысьтызы потыса, калтонъёссэс гылъяло вал.

³ Соку Со Симонлэн пыжаз пыриз но ярдурысь ӧжытак палэнэгес полысаны куриз. Со пуксьыса пыжысен калыкез дышетыны кутскиз.

⁴ Дышетыса дугдэм бераз Симонлы шуиз: «Мур азегес полыса, чорыг кутылыны калтондэс вуэ лэзе».

⁵ Солы ответ сётыса, Симон шуиз: «Дышетӥсь! Ми уйбыт тыршимы, нош номыр но ӧм кутэ; но Тынад косонэдъя калтонэз лэзё».

⁶ Тае лэсьтэм беразы туж трос чорыг кутӥзы, калтонзы ик ӟезиськылӥз.

⁷ Соослы юрттӥськыны мед лыктозы шуыса, мукет пыжысь эшъёссылы тодмет возьматӥзы. Лыктыса кыксэ ик пыжез тырмытӥзы, пумен выйыны кутскизы.

⁸ Тае адӟыса, Симон Иисус азе пыдес вылаз уськытскыса шуиз: «Кузё-Инмаре! Пот мон дорысь, мон сьӧлыко адями уго».

⁹ Со но, ваньзы соин ӵош вылэмъёс, калтыса кутэм чорыгзы трос луэмысь, туж куалектӥзы;

¹⁰ озьы ик Симонлэн эшъёсыз, Зеведей пиос, Иаков но Иоанн. Иисус Симонлы шуиз: «Эн курда; та дырысен тон адямиосты кутылод».

¹¹ Кыксэ но пыжъёсты ярдуре поттӥзы; собере марзы вань, ваньзэ кельтыса, Со сьӧры мынӥзы.

¹² Иисус одӥгаз городын улыку, быдэс мугорзэ гижло басьтэм мурт лыктӥз но, Иисусэз адӟыса, пыдесъяськиз, сюлворыса Солэсь куриз: «Кузёе! Чылкытатэмед потӥз ке, Тынад монэ чылкытатэмед луоз».

¹³ Иисус, кизэ ӝутыса, со мурт борды йӧтӥськыса шуиз: «Мынам чылкытатэме потэ – чылкыта». Соку ик солэн гижлочерез быриз.

¹⁴ Иисус нокинлы но та сярысь вераны ӧз лэзьы, священник доры мыныны но, кызьы косӥз Моисей, чылкытамез понна курбон сётыны косӥз, – соослы тодытон понна.

¹⁵ Озьы ке но Иисус сярысь ивор паськыт вӧлмиз, Сое кылзыны но асьсэлэн висёнъёссылэсь йӧнатӥськыны туж трос калык Со котыре лыктӥз.

¹⁶ Нош Со, калыктэм интыосы кошкыса, отын вӧсяськыса улӥз.

¹⁷ Одӥг нунал, дышетыса улыкуз, татын пукизы Галилеялэн вань гуртъёсысьтыз, Иудеяысь, Иерусалимысь лыктэм фарисейёс но законлы дышетӥсьёс. Кузё-Инмарлэн кужымез висисьёсты бурмытъяку возьматскылӥз.

¹⁸ Тани, кинъёс ке но валес вылын пери шуккем муртэ вайизы но, корка пыртыса, Иисус азе поныны тыршизы.

¹⁹ Трос калык люкаськемен сэрен пыртон инты шедьтытэк, корка йылэ тубизы но липет пыр валесэныз валче коркалэн шораз Иисус азе лэзизы.

²⁰ Соослэсь осконзэс адӟыса, со муртлы Иисус шуиз: «Тынад сьӧлыкъёсыд куштӥсько».

²¹ Книга тодӥсьёс, фарисейёс куспазы вераськыса шуизы: «Кин со Инмарез сантэмась? Одӥг Инмар сяна, кин сьӧлыкъёсты куштыны быгатэ?»

²² Соослэсь малпанзэс шӧдӥз но, соослы ответ сётыса, Иисус шуиз: «Мар тӥ сюлмады малпаськоды?

²³ Мае капчигес вераны: ”Тынад сьӧлыкъёсыд куштӥсько” яке шуыны: ”Султы но ветлы”?

²⁴ Адями Пилэсь музъем вылын сьӧлыкъёсты куштыны кужым ваньзэ тӥ мед тододы шуыса, – пери шуккем муртлы Со шуиз: «Тыныд верасько: султы, басьты валестэ но гуртад берт».

²⁵ Соку ик соос азьын со султӥз, валессэ басьтӥз но, Инмарез данъяса, дораз бертӥз.

²⁶ Ваньзы туж кышказы, Инмарез данъязы; кышканэз адӟем муртъёс шуизы: «Паймымон ужъёсты ми туннэ адӟимы».

²⁷ Та бере Иисус потӥз но, выт бичан интыын пукись Левий нимо выт бичасез адӟыса, солы шуиз: «Мон сьӧры мын».

²⁸ Со маиз вань, ваньзэ кельтӥз, султӥз но Со сьӧры кошкиз.

²⁹ Иисус понна Левий аслаз корказ бадӟым сиён-юон ортчытӥз. Отын трос выт бичасьёс, мукет адямиос но вал, ваньзы соосын ӵош сиськизы.

³⁰ Нош фарисейёс но книга тодӥсьёс ӟургетыса улӥзы, Иисуслэн дышетскисьёсызлы шуизы: «Малы тӥ выт бичасьёсын, сьӧлыкоосын ӵош сииськоды, юиськоды?»

³¹ Иисус соослы ответ сётыса шуиз: «Висисьтэмъёслы эмъясь кулэ ӧвӧл, висисьёслы кулэ.

³² Шонер улӥсьёсты ӧтьыны Мон ӧй лыкты, сьӧлыкоосты ӧпкельыса сьӧлыкъёссылэсь куштӥськонэ ӧтьыны лыктӥ».

³³ Иисуслы шуизы: «Малы Иоаннлэн дышетскисьёсыз ӵем визяло, вӧсясько, озьы ик фарисейёслэн но, нош Тынадъёсыз сиё но, юо но?»

³⁴ Иисус соослы шуиз: «Эмеспи соос пӧлын улон дыръя быгатӥськоды-а сюанчиосты визяса пукытыны?

³⁵ Но вуозы нуналъёс, – соос дорысь эмеспи басьтӥськоз, соку, со нуналъёсы, соос визялозы но».

³⁶ Иисус соослы мадён вераз: «Нокин но выль дӥськут бордысь ӟезьыса вуж дӥськут вылэ кышъет уг пукты: уго соку со выльзэ ӟезёз, вужез борды но вылез бордысь кышъет уз тупа.

³⁷ Выль винаез но нокин вужмем сепысъёсы уз лэзьы, малы ке шуоно выль вина сепысъёсыз кесёз но ачиз кисьтӥськоз, сепысъёс но арам луозы.

³⁸ Выль винаез выль сепысъёсы лэзьыны кулэ; соку соиз но, таиз но быдэс кылёзы.

³⁹ Вуж винаез юэм бераз нокинлэн но выль винаез юэмез уз поты, уго со шуоз: ”Вужез ӟечгес”».