Лука 4 - Библия удмурт кылын

4-тӥ ЛЮКЕТ

¹ Иисус Иордан дурысь Святой Духен тыр луыса бертӥз. Дух Сое кыр дуннее нуиз.

² Отын ньыльдон нунал ӵоже диавол Солэсь визьзэ сынаса улӥз. Со номыр но ӧз сиы, та нуналъёс ортчем бере, бӧрысь кӧтыз сюмаз.

³ Диавол Солы шуиз: «Инмар Пи ке Тон, та изэз нянь луыны кос».

⁴ Солы ответ сётыса, Иисус шуиз: «Гожтэмын, нянен гинэ уз улы адями, Инмарлэн котькуд кылыныз со улоз».

⁵ Сое ӝужыт гурезь йылэ тубытыса, диавол Солы син куспын дунне вылысь вань эксэйлыкъёсты возьматӥз,

⁶ Диавол Солы шуиз: «Вань та эксэйлыкъёсын кивалтыны Тынад кияд кужым сёто, соослэсь данзэс но, уго соос мыным сётэмын, нош мон кинлы сётэме потэ, солы сое сётӥсько.

⁷ Озьыен, Тон мыным йыбырттӥд ке, ваньмыз Тынад луоз».

⁸ Иисус солы ответ сётыса шуиз: «Кошкы Мон дорысь, шайтан; гожтэмын ук: ”Инмаредлы Кузё-Инмарлы йыбыртъя, Солы Огназлы гинэ ужаса-тыршыса ул”».

⁹ Соку диавол Иисусэз Иерусалиме нуиз, храмлэн липет йылаз Сое султытӥз но шуиз: «Инмар Пи ке Тон, татысен уллань тэтчы.

¹⁰ Гожтэмын ук: ”Тонэ Ас Кылчинъёсызлы утьыны косоз.

¹¹ Ки йылазы Тонэ нуозы, пыдыныд из борды медад канжаськы”».

¹² Иисус солы ответ сётыса шуиз: «Верамын: ”Инмаредлэсь Кузё-Инмарлэсь визьзэ эн сына”».

¹³ Вань визь сынанъёссэ быдтэм бераз диавол Со дорысь огдырлы кошкиз.

¹⁴ Духлэн кужмыныз тыр луыса, Иисус Галилеяе берытскиз. Со сярысь вераськонъёс котыр ёросъёсы вӧлмизы.

¹⁵ Соосты Иисус сӥнагогаязы дышетӥз, ваньзы Сое данъязы.

¹⁶ Быдэ вуэм городаз, Назаретэ, лыктӥз. Со суббота нуналэ, огдышем сяменыз, сӥнагогае пыриз но лыдӟыны султӥз.

¹⁷ Солы Исаия пророклэсь книгазэ сётӥзы. Иисус книгаез усьтӥз но тазьы гожтэм интызэ шедьтӥз:

¹⁸ «Кузё-Инмарлэн Духез Мон вылын улэ: Кузё-Инмар Монэ вӧйын зырӟыса пуктӥз; куанеръёслы Ӟеч Ивор вераны, сюлмынызы чигиськыса улӥсьёсты бурмытыны, тушмон киулэ сюремъёслы мозмытскон сярысь тодытыны, синтэмъёсты адӟись карыны, курадӟытэмъёсты эрике лэзьыны Монэ ыстӥз,

¹⁹ Кузё-Инмарлэсь ӟечлыко арзэ тодытыны Со Монэ ыстӥз».

²⁰ Книгазэ ворсаз, отын ужасьлы сётӥз но пуксиз. Сӥнагогаын ваньзылэн синъёссы Со шоры мертчиськизы.

²¹ Иисус соослы вераны кутскиз: «Та гожтэм, кудзэ тӥ кылӥды, туннэ быдэсмиз».

²² Ваньзы Со сярысь умоен гинэ веразы. Солэн ымысьтыз потэм кылъёслэн дэлетсылы паймизы. Соку соос куспазы вераськизы: «Та Иосифлэн пиез ӧвӧл-а?»

²³ Иисус соослы шуиз: «Зэм ик, тӥ Мыным та визькылэз вералоды: ”Йӧнатӥсь! Астэ Ачид йӧнаты, татын но, Аслад вордӥськем шаерад, лэсьты сое, мар вал Капернаумын, кудӥз сярысь ми кылӥмы”».

²⁴ Собере шуиз: «Зэм ик тӥледлы верасько: одӥгзэ но пророкез аслаз вордӥськем шаераз кабыл уг басьто.

²⁵ Зэмзэ тӥледлы верасько: Израильын трос вал Илия дыръя палкышноос, куке куинь ар но куать толэзь ӵоже ин ворсаськыса улӥз; соин сэрен быдэс музъем вылын секыт сютэм ар луиз.

²⁶ Огзы доры но, Сӥдон Сарепта карысь палкышно доры сяна, Илия лэземын ӧй вал.

²⁷ Елисей пророк дыръя Израильын трос вал гижлочерен висись адямиос, нош огез но, Сирияысь Нееман сянаез, ӧз чылкыта».

²⁸ Сӥнагогаысь ваньзы, тае кылыса, туж йыркуръяськизы.

²⁹ Султӥзы но Сое городысьтызы улляса лэзизы. Городзы гурезь бамалын интыяськемын вал; Сое гурезь йылэ тубытӥзы отысен куштыса лэзён вылысь.

³⁰ Нош Иисус пӧлтӥзы потыса кошкиз.

³¹ Иисус Галилеяысь Капернаум каре вуиз. Отын суббота нуналэ соосты дышетыса улӥз.

³² Паймизы Солэн дышетонэзлы, Солэн верам кылаз кужымез шӧдӥське вал уго.

³³ Сӥнагогаын перияськем адями вал, со бадӟым куараен кеськиз:

³⁴ «Назаретысь Иисус, ми бордын Тынад мар ужед? Кошкы! Тон милемыз быдтыны лыктӥд; мон тодӥсько, кин Тон, Инмарлэн Святоез».

³⁵ Иисус сое дугдытыса шуиз: «Чалмытскы. Пот со пушкысь». Пери со адямиез сӥнагога шоры погыртӥз но солэн пушкысьтыз чик вӧсь карытэк потӥз.

³⁶ Ваньзы ик туж зол кышкатскизы но куспазы вераськизы: «Мар таӵе та, Со Аслаз эрикеныз, кужыменыз периосты потыны косэ но, соос пото?»

³⁷ Иисус сярысь ивор котыр интыосы вӧлмиз.

³⁸ Сӥнагогаысь потыса, Иисус Симонлэн корказ пыриз. Симонлэн вармумиез пӧськылен туж курадӟыса кылле вал. Сое юрттыны куризы.

³⁹ Кышномуртлэн матаз лыктыса, пӧськыльлы алыса вераз но, солэн пӧськылез быриз. Соку ик кышномурт султӥз но соослы юрттӥськыса улыны кутскиз.

⁴⁰ Шунды пуксён вадес пӧртэм висёнъёсын висисьёссэс Иисус доры вайылӥзы. Котькудзы вылэ кизэ поныса, соосты Со бурмытъяз.

⁴¹ Тросэз пушкысь периос кесяськыса потылӥзы но шуизы: «Тон Христос, Инмарлэн Пиез». Аслэсьтыз Христос луэмзэ Со периослы вераны ӧз лэзьы.

⁴² Нунал вордӥськиз; Со калыктэм интые потыса кошкиз. Калык Сое утчаз но, матаз лыктыса, дорысьтызы медаз кошкы шуыса, ӝегатыса возизы.

⁴³ Нош Иисус соослы шуиз: «Мукет городъёслы но Инмар Эксэйлык сярысь Ӟеч Иворез Мон вераны кулэ, со понна ик Мон ыстэмын уго».

⁴⁴ Галилеяысь сӥнагогаосын тодытыса-дышетыса улӥз.