Лука 3 - Библия удмурт кылын

3-тӥ ЛЮКЕТ

¹ Тиверий кесарьлэн кивалтонэзлэн дас витетӥ араз, Иудеяын кузёяськыса Понтий Пилат улон аре, Галилеяын ньылетӥ люкетыныз кивалтӥсь луыса Ирод улӥз. Солэн Филипп братэз Итуреяын но Трахонит ёросын, нош Лисаний Авилинеяын ньылетӥ люкетыныз кивалтыса улӥзы.

² Соку, Анна но Каиафа архиерейёс дыръя, Захариялэн пиезлы Иоаннлы кыр дуннеысен Инмарлэсь веран вал.

³ Сьӧлыкъёсты куштон понна ӧпкельыса пылатӥськон сярысь тодытыса, со котыр Иордан ёростӥ ветлӥз.

⁴ Исаия пророклэн кыл книгаяз гожтэмын: «Кыр дуннеын кеськисьлэн куараез: Кузё-Инмарлы сюрес дасялэ, шонертэлэ Солы сюресэз.

⁵ Котькыӵе нёжал но пачыл мед луоз, котькыӵе гурезь но выр мед лапегалозы, кырыж интыос мед шонералозы, выро-гопо сюресъёс мед ӵошкыталозы.

⁶ Инмарлэсь утёнзэ вань адямиос ас синмынызы адӟозы».

⁷ Со доры пылатӥськыны лыктэм калыклы Иоанн шуиз: «Сьӧд кыйлэн вордосъёсыз! Вуоно вожпоттонлэсь пегӟыны кин тӥледлы валэктӥз?

⁸ Ӧпкельыса сьӧлыкъёстэс быдтыны ярамон емышъёс будэтэлэ ук, эн но малпалэ асьтэлы асьтэос вераны: ”Атаймы милям Авраам”. Тӥледлы мон верасько: Инмар та изъёсты Авраамлы нылпи карыны быгатоз.

⁹ Тӥр но писпуос выжыын кылле ини: ӟеч емыш вайисьтэм котькудзэ но писпуэз корало но тылэ кушто».

¹⁰ Калык солэсь юаз: «Мар бен милемлы кароно?»

¹¹ Соослы ответ сётыса, со шуиз: «Кинлэн кык дӥсянэз, одӥгзэ ӧвӧлтэм муртлы сёт; кинлэн сиёнэз вань, озьы ик кар».

¹² Выт бичасьёс но пылатӥськыны лыктӥзы. Соос солы шуизы: «Дышетӥсь! Мар милемлы кароно?»

¹³ Соослы со ответ сётӥз: «Тӥледлы мар сётэмын, солэсь номыр но мултэссэ эн куре».

¹⁴ Солэсь солдатъёс но юазы: «Милемлы нош мар кароно?» Соослы со шуиз: «Нокинэ но эн ултӥялэ, эн урттылӥське, сётэм уждунэныды тыр луэ».

¹⁵ Калык возьмаськыса улон дыръя ваньзы Иоанн сярысь, та Христос ӧвӧл меда шуыса, сюлмазы малпанэн улӥзы.

¹⁶ Иоанн ваньзылы ответ сётӥз: «Мон тӥледыз вуэн пылатӥсько, но лыктэ мынэсьтым Кужмоез, Солэсь пыдкутчан езэ пертчыны но мон ярамон ӧвӧл. Со тӥледыз Святой Духен но тылын пылатоз.

¹⁷ Солэн сускичез но кияз ини, Со Аслэсьтыз итымзэ сузялоз, чабейзэ кеносаз люкалоз, нош курозэ кысылӥсьтэм тылын сутоз».

¹⁸ Калыкез дышетыса, трос мукет ӟеч иворъёс со вераз соослы.

¹⁹ Иоанн Иродэз, ньылетӥ люкетэн кивалтӥсез, аслаз вынызлэн кышноеныз Иродиадаен азыса улэмез, нош озьы ик Иродлэн вань урод ужъёсыз понна, сое шара куаретылэмез понна, –

²⁰ ваньмыз борды Ирод тае ватсаз на – Иоаннэз пытсэтэ ворсатӥз.

²¹ Вань калык пылатӥськиз. Иисус но пылатӥськиз; пылатӥськем бераз, вӧсяськыса улыкуз, ин усьтӥськиз,

²² Со вылэ дыдык выллем мугорын Святой Дух лэзиськиз. Инмысен куара кылӥськиз: «Тон Мынам Яратоно Пие. Тон бордын Мынам ӟеч эрике!»

²³ Тодытыны кутскыкуз, Иисуслы ог куамын арес котырын вал. Малпало вал, Со Иосифлэн пиез шуыса, нош таиз Илийлэн,

²⁴ Матфатлэн, Левийлэн, Мелхийлэн, Ианнайлэн, Иосифлэн,

²⁵ Маттафийлэн, Амослэн, Наумлэн, Еслимлэн, Наггейлэн,

²⁶ Маафлэн, Маттафийлэн, Семейлэн, Иосийлэн, Иудалэн,

²⁷ Иоаннанлэн, Рисайлэн, Зоровавельлэн, Салафиильлэн, Нирийлэн,

²⁸ Мелхийлэн, Аддийлэн, Косамлэн, Елмодамлэн, Ирлэн,

²⁹ Иосиялэн, Елиезерлэн, Иоримлэн, Матфатлэн, Левийлэн,

³⁰ Симеонлэн, Иудалэн, Иосифлэн, Ионанлэн, Елиакимлэн,

³¹ Мелеайлэн, Маинанлэн, Маттафайлэн, Нафанлэн, Давидлэн,

³² Иессейлэн, Овидлэн, Воозлэн, Салмонлэн, Наассонлэн,

³³ Аминадавлэн, Арамлэн, Есромлэн, Фареслэн, Иудалэн,

³⁴ Иаковлэн, Исааклэн, Авраамлэн, Фаралэн, Нахорлэн,

³⁵ Серухлэн, Рагавлэн, Фалеклэн, Еверлэн, Салалэн,

³⁶ Каинанлэн, Арфаксадлэн, Сӥмлэн, Нойлэн, Ламехлэн,

³⁷ Мафусаллэн, Енохлэн, Иаредлэн, Малелеиллэн, Каинанлэн,

³⁸ Енослэн, Сӥфлэн, Адамлэн, Инмарлэн шуыса.