Лука 2 - Библия удмурт кылын

2-тӥ ЛЮКЕТ

¹ Со нуналъёсы быдэс дуннеысь калыкез гожъян сярысь Август кесарьлэн косонэз потӥз.

² Квириниялэн Сирияен кивалтыса улон дыръяз та нырысетӥез калыкез гожъян вал.

³ Ваньмыз, котькудӥз адями, аслаз городаз гожтӥськыны мынӥз.

⁴ Галилеяысь Назарет карысь Иосиф но Иудеяе, Давидлэн Вифлеем шуон городаз, мынӥз. Уго со Давидлэн юртысьтыз, выжыысьтыз вал.

⁵ Кышноеныз, Марияен, со гожтӥськыны мынӥз. Соку Мария секытэн вал.

⁶ Соос отын луон дыръя Солы нуны вайыны дыр вуиз.

⁷ Нырысетӥ Пиез вордскиз но, Сое кутэтэн бинялтыса, турын тыронэ понӥз, кунокуаын соослы инты ӧз сюры уго.

⁸ Со шаерын пудо возьмасьёс уйин бусыын пудо уллёзэс возьмаса пуко вал.

⁹ Шӧдтэк шорысь соослы Кузё-Инмарлэн Кылчинэз возьматскиз но, Кузё-Инмарлэн пиштӥсь данлыкез соосты югдытӥз. Соос вераны луонтэм кышказы.

¹⁰ Нош Кылчин соослы шуиз: «Эн курдалэ; мон тӥледлы быдӟым шумпотон ивортӥсько, со вань адямиос понна луоз:

¹¹ тӥ понна туннэ Давидлэн городаз Утись вордӥськиз, Со – Христос Кузё-Инмар.

¹² Тани тӥледлы тодмет: турын тыронысь кутэтэн бинялтэм Нуныез тӥ шедьтоды».

¹³ Инмарез данъяса, Кылчинэн валче лыдъянтэм трос ин кужымъёс шуак вуыса вазиськизы:

¹⁴ «Дан вылӥысь Инмарлы, музъем вылын каньыллык, адямиослы ӟеч эрик».

¹⁵ Кылчинъёс соос дорысь Инме кошкем бере пудо возьмасьёс ог-огзылы шуизы: «Вифлееме мыныса учкоме, мар отын луиз, кудӥз сярысь асьмелы Кузё-Инмар ивортӥз».

¹⁶ Дыртыса вуизы но Марияен Иосифез, турын тыронын кыллись Нуныез шедьтӥзы.

¹⁷ Адӟем беразы веразы, мар ивортэмын вал соослы та Нуны сярысь.

¹⁸ Ваньзы кылзӥськем муртъёс пудо возьмасьёслэн верамзылы паймизы.

¹⁹ Нош Мария вань та кылъёсты сюлмаз утьыса возиз.

²⁰ Пудо возьмасьёс ваньмыз понна, мае кылӥзы, мае адӟизы, кызьы соослы верамын вал, Инмарез данъяса, ушъяса, асьсэ доры бертӥзы.

²¹ Тямыс нунал ортчыса, Нунылы вандӥськон сямез ортчытон дыр вуиз. Соку Солы Иисус ним сётӥзы. Анай пушкын кылдэмезлэсь азьвыл ик Кылчин Солы та нимез сётӥз вал.

²² Чылкытатскон нуналъёс ортчем бере Моисейлэн законэзъя Сое Иерусалиме Кузё-Инмар азе султытыны вайизы.

²³ Кузё-Инмарлэн законаз гожтэмын: анай пушкысь нырысь потэм котькудӥз пи нуны Кузё-Инмарлы сӥземын луыны кулэ.

²⁴ Кузё-Инмарлэн законаз верамын на, кык кыр дыдыкъёсты яке кык дыдыкпиосты курбон сётыны кулэ шуыса.

²⁵ Соку Иерусалимын Симеон нимо адями улӥз. Со шонер улӥсь, Инмарлы туж оскыса, Израильлэсь буйгатсконзэ витись мурт вал. Святой Дух со вылын улӥз.

²⁶ Солы Святой Дух пыр верамын вал, Кузё-Инмарлэсь Христоссэ адӟытэк, кулонэз уд адӟы шуыса.

²⁷ Духен тыр луыса, со храме лыктӥз. Анай-атаез Иисус Нуныез законын гожтӥськем сямез быдэстон понна храме ваем бере

²⁸ Симеон Сое кияз басьтӥз но Инмарлы тау карыса шуиз:

²⁹ «Аслад верам кылыдъя, Инмар Атае, ляльчиедлы каньыллык сётыса, туннэ лэзиськод.

³⁰ Тынэсьтыд мозмытондэ мынам синъёсы адӟизы ни,

³¹ Тон сое вань калыкъёслэн син азязы дасяд уго:

³² Со язычникъёсты югдытӥсь луоз, Израиль калыкедлы данлык луоз».

³³ Со сярысь верамлы Иосиф но, Солэн Анаез но паймизы.

^34-35 Симеон соосты бакель кариз но Солэн Анаезлы, Мариялы, шуиз: «Тани, Та Нуны пыр Израильысь тросэз погралоз, тросэз ӝутӥськоз. Тросэзлэн сюлэм малпанъёссы мед усьтӥськозы шуыса, Со котырын трос ченгешонъёс луозы. Тынад аслад но лул пыртӥд палаш потоз».

³⁶ Татын вал на Анна нимо нылкышно пророк. Со Асир выжыысь Фануиллэн нылыз вал, туж бадӟым арлыдэ вуэм, ныл дыръяз бызьыса картэныз сизьым ар улэм мурт.

³⁷ Ог тямыстон ньыль аресъем палкышно, со храм дорысь кошкылытэк, уй но нунал визяса, вӧсяськыса, Инмарлы ужаса-тыршыса улӥз.

³⁸ Соку со матэ лыктӥз но, Кузё-Инмарез данъяса, Иерусалимын мозмытсконэз возьмаса улӥсьёслы ваньзылы Иисус сярысь вераса улӥз.

³⁹ Кузё-Инмарлэн законэзъя ма кулэ вал лэсьтыны ваньзэ лэсьтэм беразы соос Галилеяысь Назарет городазы берытскизы.

⁴⁰ Нуны будӥз, лулыныз-сюлмыныз юнмаз, визьмын тыр луиз; Инмарлэн дэлетэз Со вылын улӥз.

⁴¹ Арлы быдэ Солэн анай-атаез Пасха празднике Иерусалиме ветлӥзы.

⁴² Солы дас кык арес тырмон аре, азьло сямен ик, соос праздниклы Иерусалиме лыктӥзы.

⁴³ Праздник нуналъёс ортчем бере бертыкузы, пинал Пи Иисус Иерусалиме кылиз. Тае Иосиф но, Солэн Анаез но ӧз шӧдэ,

⁴⁴ Со мукетъёсын ӵош бертэ, кожазы. Нунал сюресэз ортчем беразы гинэ Сое ӵыжы-выжыоссы, тодмооссы пӧлысь утчаны кутскизы,

⁴⁵ но ӧз шедьтэ. Сое утчаса, Иерусалиме берытскизы.

⁴⁶ Куинь нунал ортчыса, Сое храмысь дышетӥсьёс пӧлысь шедьтӥзы. Соослэсь кылзӥськыса, юалляськыса Со пуке вал.

⁴⁷ Ваньзы кылзӥськисьёс Солэн визьмызлы но, ответ сётэмъёсызлы но паймизы.

⁴⁸ Сое адӟыса, чабкиськизы, Анаез Солы шуиз: «Пие! Мар Тон милемын лэсьтӥд? Тани Тынад атаед но, мон но, туж куректыса, Тонэ утчамы».

⁴⁹ Соослы Со шуиз: «Малы тӥледлы Монэ утчаны кулэ вал? Оло, тӥ ӧд тодэ, Мыным отын луыны кулэ вал, кытын Мынам Атаелэн киыз улэ?»

⁵⁰ Нош соос Солэсь верам кылзэ ӧз валалэ.

⁵¹ Соосын ӵош Со кошкиз, Назаретэ вуиз; соослэсь кылзӥськыса улӥз. Солэн Анаез ваньзэ та кылъёсты аслаз сюлэмаз возиз.

⁵² Иисус визьмын но, арлыдын но будӥз; Инмарлы но, адямиослы но Со яратыны ярамон вал.