Лука 11 - Библия удмурт кылын

11-тӥ ЛЮКЕТ

¹ Луиз озьы: одӥг интыын вӧсяськыса дугдэм бераз дышетскисьёсыз пӧлысь одӥгез Иисуслы шуиз: «Кузё-Инмаре! Милемыз вӧсяськыны дышеты, кызьы Иоанн аслэсьтыз дышетскисьёссэ дышетӥз».

² Соослы Со шуиз: «Вӧсяськыкуды тазьы вералэ: ”Инмысь Атаймы! Тынад нимыд дано мед луоз; Тынад Эксэйлыкед мед лыктоз; Тынад эрикедъя мед луоз музъем вылын но, инмын кадь ик;

³ Милемлы нуналлы быдэ улымон няньмес сёты;

⁴ Милесьтым сьӧлыкъёсмес но кушты, милемлы вань пунэмо луисьёслэсь ми но куштӥськом уго; милемыз визь сынаськонлэсь но утьы, уродлэсь но мозмыты милемыз”».

⁵ Соослы Иисус шуиз: «Кин ке но тӥ пӧлысь, кудӥзлэн эшез вань, уйшор уйин со доры лыктоз но солы шуоз: ”Эше! Вай мыным пунэмен куинь няньдэ.

⁶ Мон доры сюрес вылысь эше пыриз, нош мынам солы ӵектыны номыри но ӧвӧл”.

⁷ Нош соиз пуш паласен солы ответ сётыса шуоз: ”Эн раньӟыты монэ, ӧсъёс ӵогамын ни, нылпиосы но монэн огазьын валесын кыллё, уг быгатӥськы султыса тыныд нянь сётыны”.

⁸ Тӥледлы верасько, эш луыса вылысь но султыса ӧз ке сёты, соиз куремысь ӧз ке дугды, султоз но, кӧня куре, сомында сётоз.

⁹ Мон тӥледлы верало: курелэ, тӥледлы сётэмын луоз; утчалэ – шедьтоды; йыгаське – тӥледлы усьтозы.

¹⁰ Уго котькудӥз курись мурт басьтэ, утчась мурт шедьтэ, йыгаськисьлы – усьтозы.

¹¹ Тӥлесьтыд кыӵе атай луоз, пиед нянь куриз ке, нош тон солы из сётӥд ке? Яке, чорыг куриз ке, чорыг интые тон солы кый сётӥд ке?

¹² Яке, курегпуз куроз но, тон солы скорпион сётӥд ке?

¹³ Озьыен, тӥ, уродэсь-лекесь луыса но, асьтэлэн нылпиостылы ӟечесь кузьымъёс сётъяны быгатӥськоды ке, уката но Инмысь Атай Солэсь курисьёслы Святой Духез сётоз».

¹⁴ Одӥг пол Иисус кылтэм периез улляса поттӥз. Пери потэм бере кылтэм вераськыны кутскиз. Калык паймиз.

¹⁵ Соос пӧлысь куд-огез вераськизы, Со периосты периослэн эксэйзылэн веельзевуллэн кужыменыз улляса потта.

¹⁶ Нош мукетъёсыз, визьзэ сынаса, инмысь тодмет мед возьматоз шуыса, Солэсь куризы.

¹⁷ Нош Иисус, таослэсь малпанъёссэс тодыса, соослы шуиз: «Котькыӵе но эксэйлык аслыз ачиз пумит люкиськиз ке, тырттэм кылёз, корка но аслыз ачиз пумит люкиськиз ке, куашкалоз.

¹⁸ Шайтан но аслыз ачиз пумит люкиськиз ке, кызьы солэн эксэйлыкез быдэс возиськоз? Нош тӥ шуиськоды, Мон периосты веельзевуллэн, пе, кужыменыз улляса поттӥсько.

¹⁹ Мон веельзевуллэн кужыменыз периосты улляса поттасько ке, нош тӥляд пиосты кинлэн кужыменыз соосты улляло? Соин ик соос тӥледыз судить карисьёс луозы.

²⁰ Нош Мон Инмар чиньыен периосты улляса поттасько ке, соку, зэм но, Инмарлэн Эксэйлыкез тӥ доры вуиз.

²¹ Кужмо мурт корказэ ожмаськон тӥрлыкен возьма ке, со юртлы кышкытлык ӧвӧл.

²² Нош со вылэ солэсь кужмоез урдскиз но вормиз ке сое, соку солэсь вань ожмаськон тӥрлыксэ басьтоз, кудӥз вылэ со оскиськыса улӥз вал, нош собере солэсь лушкам ваньбурзэ кызьы мылыз потэ, озьы люкылоз.

²³ Кин Монэн ӧвӧл, со Мыным пумит; кин Монэн огазьын уг бича, со арам-сюрам каре.

²⁴ Адями пушкысь пери потэ ке, со вутэм интыостӥ, каньылэн улон инты утчаса ветлэ но шедьтытэк шуэ: ”Берытско аслам коркам, кытысь потӥ”.

²⁵ Лыктэ но адӟе: со ӵужемын, утялтэмын.

²⁶ Соку со мынэ но ас бордаз мукетъёссэ, аслэсьтыз но лекесьёссэ, сизьым периосты басьтэ. Соос адями пушкы пыро но отын уло. Соку адямилы, нырысетӥез сярысь, берпуметӥез эшшо но уродгес луэ».

²⁷ Тае веран куспетӥз калык пӧлысь одӥг кышномурт бадӟым куараен Солы шуиз: «Шудо Тонэ нуллӥсь мугорпуш, Тонэ сюдӥсь ноныос!»

²⁸ Нош Иисус шуиз: «Шудоесь Инмарлэсь кылзэ кылзӥсьёс, сое быдэсъясьёс».

²⁹ Калык тросэн люкаськыны кутскем бере Иисус вераны кутскиз: «Та – кескич выжы. Со тодмет утча, но, Иона пророклэн паймымон тодметэз сяна, солы мукет тодмет уз сётӥськы.

³⁰ Кызьы Иона Ниневия калык понна паймымон тодмет луиз, Адями Пи но та ёзлы-выжылы озьы ик луоз.

³¹ Лымшорысь нылкышно эксэй та ёзэн-выжыен ӵош судэ султоз но соосты янгыше уськытоз, уго со дуннелэн пумысьтыз Соломонлэсь визьмо веранъёссэ кылзыны лыктӥз; но тани, татын Соломонлэсь Бадӟымез сылэ.

³² Ионалэн тодытонэз пыр ӧпкельыса сьӧлыкъёссылэсь куштӥськем Ниневия карын улӥсьёс та выжыен ӵош судэ султозы но та выжыез соос янгыше уськытозы; но тани, татын Ионалэсь Бадӟымез сылэ.

³³ Нокин но сюсьтылэз ӝуатыса лушкем интые, посуда улэ но уг пукты. Пырисьёс югытэз мед адӟозы шуыса, сюсьтыл пуктонэ пуктэ.

³⁴ Мугорлэн югдытӥсез син луэ. Озьыен, синмыд чылкыт ке луиз, быдэс мугорыд югыт луоз; нош со урод ке луиз, соку мугорыд но пеймыт луоз.

³⁵ Озьыен, учкы: югыт, кудӥз тон пушкын, – ӧвӧл-а пеймытлык?

³⁶ Быдэс мугорыд югыт ке, ӧвӧл ке одӥг но пеймыт люкетэз, со быдэс югыт пиштыса улоз, лампадалэн тонэ пиштыса югдытэмез кадь ик».

³⁷ Тае вераса улыкуз, одӥг фарисей Сое гуртаз нуназе карыны ӧтиз. Со лыктыса ӝӧк сьӧры пуксиз.

³⁸ Сиськон азьын Иисус кизэ ӧз миськы шуыса, фарисей паймиз.

³⁹ Но Кузё-Инмар солы шуиз: «Али тӥ, фарисейёс, тэркылэсь, тусьтылэсь педпалзэ сузяськоды, нош асьтэлэн пушъёсты лушкаськонэн, кескич улонэн тырмемын.

⁴⁰ Нодтэмъёс! Кин педпалзэ кылдытӥз, Со ик пуш палзэ но ӧз кылдыты-а?

⁴¹ Ваньбурды пӧлысь оглюкетсэ ёрмыса улӥсьёслы сётӥды ке, умойгес луысал: соку тӥляд ваньмыз чылкыт луысал.

⁴² Куректон тӥледлы, фарисейёс: бутниклэсь, рута турынлэсь, пӧртэм бакча сиёнъёслэсь дасэтӥ люкетсэ сётӥськоды, нош Инмарлэн шонер судэз но яратонэз сярысь уд сюлмаськиське. Таоссэ кулэ кароно вал, сооссэ но кулэтэм кароно ӧй вал.

⁴³ Куректон тӥледлы, фарисейёс, сӥнагогаосын азьпал радын пуконэз, калык люкаськон интыосын ӟечкыламез яратэмды понна.

⁴⁴ Куректон тӥледлы, книга тодӥсьёс, фарисейёс, чеберъяськисьёс, тӥ куштӥськем шайгуос кадесь, кудъёсыз вылтӥ адямиос ветло но уг тодо соос сярысь».

⁴⁵ Талы пумит закон тодӥсьёс пӧлысь кин ке но шуиз: «Дышетӥсь! Тазьы вераса, Тон милемыз вӧсь кариськод».

⁴⁶ Нош Иисус шуиз: «Тӥледлы но, закон тодӥсьёслы, куректон: адямиос вылэ ӝутыса вормонтэм ныпъетъёс ошиськоды, нош асьтэос пал чиньыеныды но соос борды уд йӧтӥськиське.

⁴⁷ Куректон тӥледлы атайёсыныды виылэм пророкъёслы шӧй возён коркаос лэсьтылэмды понна.

⁴⁸ Таин тӥ атайёстылэсь ужъёссэс умоен лыдъямдэс возьматӥськоды, уго соос пророкъёсты виылӥзы, нош тӥ соослы шӧй возён коркаос лэсьтылӥськоды.

⁴⁹ Соин ик Инмарлэн визьлыкез шуэ: ”Соос доры пророкъёсты, апостолъёсты ысто, но соос пӧлысь огъёссэ виёзы, нош мукетъёссэ уллялозы”.

⁵⁰ Дунне кылдэм дырысен вань виылэм пророкъёслэн вирзы понна та выжы кыл мед кутоз,

⁵¹ Авельлэн вирыз бордысен курбон сётон ӝӧкен храм вискын вием Захариялэн вирыз дырозь. Зэм, тӥледлы верасько, та выжы кыл кутоз.

⁵² Куректон тӥледлы, закон тодӥсьёс, тодон-валанлэсь усьтонзэ тӥ басьтӥды: асьтэос но ӧд пыре, пырисьёслы но люкетӥды».

⁵³ Тае соослы вераса улыкуз, книга тодӥсьёс но фарисейёс, Иисуслэсь трос юанъёслы ответ курыса, Со борды зол тэбиньыны кутскизы.

⁵⁴ Сое чакласа улӥзы, Сое янгыше уськытон вылысь вераськон кылысьтыз шексэ утчазы.