Лука 10 - Библия удмурт кылын

10-тӥ ЛЮКЕТ

¹ Та бере Кузё-Инмар мукетъёссэ сизьымдон дышетскисьёссэ бырйиз но кыкен-кыкен Аслаз азьтӥз пӧртэм городъёсы но интыосы ыстӥз, кытчы Солэн Аслаз мынэмез потӥз.

² Соослы шуиз: «Аран трос, нош ужасьёс ӧжыт; соин ик аранлэн Кузёезлэсь вӧсяськыса куре, Аслаз аран дораз ужасьёсты мед ыстоз шуыса.

³ Мынэлэ! Мон тӥледыз, кызьы кионъёс пӧлы ыжпиосты ысто, озьы ыстӥсько.

⁴ Пуйы но, сумка но, пыдкутчан но эн басьтэ, сюрес вылысен нокинэн но ӟечъяськыса эн улэ.

⁵ Кыӵе ке корка пыриды, нырысь ик шуэлэ: ”Каньыллык та коркалы!”

⁶ Отын каньыллык улонэз кулэ карись вань ке, соку со вылэ тӥляд каньыллыкты васькоз; ӧвӧл ке, соку тӥ доры ик берыктӥськоз.

⁷ Со коркан ик улэ, марзы вань, сие, юэ: уго ужась мурт ужамез понна кӧттыр басьтыны кулэ. Коркась корка потаса эн ветлэ.

⁸ Кыӵе ке городэ лыктӥды но, пыртӥзы ке, мар ӵектӥзы, сиелэ.

⁹ Отын кыллись висисьёсты бурмытъялэ но шуэлэ: ”Инмар Эксэйлык тӥледлы матэктӥз”.

¹⁰ Кыӵе ке городэ лыктӥды но, ӧз ке пыртэ тӥледыз, ульчае потыса шуэлэ:

¹¹ ”Городысьтыды ми борды лякиськем сюез тӥледлы курткиськом; но тодэлэ, Инмар Эксэйлык тӥледлы матэктӥз шуыса”.

¹² Тӥледлы верасько: самой со нуналэ Содомлы сярысь но та городлы секытгес луоз.

¹³ Кайгу тыныд, Хоразин! Кайгу тыныд, Вифсаида! Тӥ дорын возьматэм паймымон ужъёс Тирын но Сӥдонын возьматэмын луысалзы ке, соос кемалась ини, вылазы чурыт бышкись дӥсь дӥсяса, пень вылын пукыса, сьӧлыкъёссы понна ӧпкельысалзы.

¹⁴ Тирлы но, Сӥдонлы но, тӥледлы сярысь, судын капчигес луоз.

¹⁵ Тон но, инбамозь ӝутӥськем Капернаум, адэ куштӥськод.

¹⁶ Тӥледыз кылзӥськись мурт – Монэ кылзӥське; тӥлесьтыд куштӥськись мурт – Мынэсьтым куштӥське. Нош Мынэсьтым куштӥськись мурт – Монэ Ыстӥсьлэсь куштӥське».

¹⁷ Сизьымдон дышетскисьёс шумпотыса берытскизы но шуизы: «Кузё-Инмармы! Тынад нимыныд периос но милесьтым кылзӥсько».

¹⁸ Нош Иисус соослы шуиз: «Чилектэм кадь инмысь усись шайтанэз Мон адӟи.

¹⁹ Тани, тӥледлы кыйёс вылэ, скорпионъёс, вань тушмон кужым вылэ лёгиськыны эрик сётӥсько, номыр но тӥледлы изъян уз лэсьты.

²⁰ Нош тӥ, периос тӥлесьтыд кылзӥсько шуыса, шум эн потэ, – шумпотэлэ, тӥляд нимъёсты Инмын гожтӥськемын шуыса».

²¹ Со дыре ик Иисус духеныз шумпотыса шуиз: «Данъясько Тонэ, Атае, Инлэн но, музъемлэн но Кузё-Инмарез, таосты Тон визьмоослэсь, нодоослэсь ватэмед но нуныослы усьтэмед понна. Озьы, Атае! Сыӵе вылэм уго Тынад ӟеч эрикед».

²² Дышетскисьёсыз пала берыктӥськыса шуиз: «Ваньзэ Мыным Атае сётӥз. Кин со Пи, Атай сяна, нокин но уг тоды, но кин со Атай, Пи сяна, нокин но уг тоды, – кинлы Пилэн усьтэмез потэ, со тодэ».

²³ Дышетскисьёсыз пала берыктӥськыса, соослы нимысьтыз вераз на: «Тӥлесьтыд адӟемдэс адӟись синъёс шудоесь!

²⁴ Тӥледлы верасько: трос пророкъёс но эксэйёс тӥлесьтыд адӟемдэс адӟемзы потэ вал, но ӧз адӟе, тӥлесьтыд кылэмдэс кылэмзы потэ вал, но ӧз кылэ».

²⁵ Тани, султыса одӥг закон тодӥсь Солэсь визьзэ сынаса шуиз: «Дышетӥсь! Быронтэм улонэз басьтон понна мон ма карыны кулэ?»

²⁶ Иисус солы шуиз: «Мар гожтэмын законын? Кызьы лыдӟиськод?»

²⁷ Ответ сётыса, со шуиз: «Инмардэ Кузё-Инмарез вань сюлмыныд, вань лулыныд, вань кужмыныд, вань визьмыныд яраты, матысьтэ но астэ ачид кадь ик».

²⁸ Иисус солы шуиз: «Шонер ответ тон сётӥд. Озьы лэсьты, улэп луод».

²⁹ Нош со, ассэ ачиз шонере поттыны турттыса, Иисуслы шуиз: «Нош кин бен мынам матысе?»

³⁰ Талы Иисус шуиз: «Кыӵе ке но адями Иерусалимысь Иерихонэ мынэ вылэм но адями таласьёс кие шедем, соос солэсь дӥськутсэ октыса, ассэ жугыса, мырдэм улэп кельтыса кошкиллям.

³¹ Учырам озьы: со сюрес кузя священник мынэ вылэм но, сое адӟыса, вӧзтӥз кошкем.

³² Озьы ик со интыын левит но вылэм, дораз мыныса учкем но вӧзтӥз кошкем.

³³ Кыӵе ке но Самария мурт кошкыкуз со шоры кемдэм, адӟем сое но жаль потэм.

³⁴ Дораз лыктыса, яраоссэ вӧйын зыраса, винаен гылтыса бинем. Ишак вылаз пуктыса, кунокуае ваем но со сярысь сюлмаськем.

³⁵ Мукет нуналаз кошкыкуз кунокуа кузёлы кык динарий коньдон поттыса сётэм но солы шуэм: ”Сюлмаськы со сярысь. Талэсь тросгес коньдон быдтӥд ке, берен вуи ке, тыныд тыро”.

³⁶ Кызьы малпаськод, кудӥз та куинь муртъёс пӧлысь адями таласьёс кие шедемлы матысь луэ?»

³⁷ Со шуиз: «Кин солы ӟеч кариз». Соку Иисус солы шуиз: «Мын, тон но озьы ик лэсьты».

³⁸ Сюрес кузя мынон сяменызы Иисус одӥгаз гуртэ вуиз. Татын Марфа нимо кышномурт Сое аслаз корказ ӧтиз.

³⁹ Солэн Мария нимо сузэрез вал, со Иисуслэн пыд выжыяз пуксиз но Солэсь верамзэ кылзӥськыса улӥз.

⁴⁰ Нош Марфа, трос сиён-юон дасяса, Сое куно карон сярысь сюлмаськиз. Собере Иисуслэн матаз лыктыса шуиз: «Кузё-Инмаре! Сузэре монэ огнаме ужаны кельтӥз шуыса, Тыныд нокыӵе но уг поты шат? Вера солы, мыным мед юрттоз».

⁴¹ Нош Марфалы ответ сётыса, Иисус шуиз: «Марфа, Марфа! Тон тросэз сярысь сюлмаськиськод, шугъяськиськод,

⁴² нош кулэ огез гинэ. Мария ӟечсэ люкетэз бырйиз, кудӥз солэсь уз басьтӥськы».