Лука 1 - Библия удмурт кылын

1-тӥ ЛЮКЕТ

¹ Ми куспын зэмос луэм учыръёс сярысь тросэз веросъёс кылдытъяны кутскизы ни бере,

² кудӥз сярысь милемлы самой кутсконысеныз ик Кылэз адӟемъёс но Солы служить каремъёс ивортӥзы, –

³ соку мон но малпай: ваньзэ кутсконысеныз ик пыр-поч эскерыны но радызъя тыныд гожтыны, гажано Феофил,

⁴ тон мед тодод, со дышетон, кудӥныз тон тодматскид, оскиськымон луэ шуыса.

⁵ Иудеяын, Ирод эксэй луон нуналъёсы, Авиялэн черодысьтыз Захария нимо священник улӥз. Солэн Елисавета нимо кышноез Аарон выжыысь вал.

⁶ Инмар азьын кыкназы но соос шонер улӥзы, Кузё-Инмарлэсь вань курон-косонъёссэ, радъянъёссэ шекланытэк быдэсъяса улӥзы.

⁷ Соослэн нылпизы ӧй вал, Елисавета уго нылпи вайисьтэм вал. Кыксы но соос арескын мӧйыесь вал ини.

⁸ Одӥг пол, черодэз вуыса, Инмар азьын служить карыкуз,

⁹ пус чӧлтыса, кызьы каро вал священникъёс, солы Кузё-Инмарлэн храмаз ладанэн ӵындытыны пыроно луиз.

¹⁰ Ладанэн ӵындытон дыръя вань калык педлон вӧсяськылӥз.

¹¹ Соку Захариялы Кузё-Инмарлэн Кылчинэз возьматӥськиз, со Кылчин, ладан ӝуатыса, курбон сётон ӝӧклэн бурпалаз сылӥз.

¹² Сое адӟыса, Захария куалектӥз, кышканы кутскиз.

¹³ Нош Кылчин солы шуиз: «Эн курда, Захария, тынад вӧсяськемед кылэмын, кышноед Елисавета пи нуны ваёз, солы Иоанн ним сётод.

¹⁴ Тыныд шумпотон, шулдыръяськон луоз, солэн вордӥськемез понна тросэз шумпотозы.

¹⁵ Уго со Кузё-Инмар азьын быдӟым луоз, вина но, сур но уз юы, анаезлэн пушказ ик Святой Духен тыр луоз.

¹⁶ Троссэ Израиль пиосты Инмарзы Кузё-Инмар пала берыктоз.

¹⁷ Атайёслэсь сюлэмъёссэс нылпиоссы пала берыктыны, кылзӥськисьтэмъёсты шонер улӥсьёслэн визьлыко сюрес вылазы берыктыны, Кузё-Инмарлы калыкез дасян понна Илиялэн кадь духен но кужымен Кузё-Инмарлэн азьтӥз со мыноз».

¹⁸ Захария Кылчинлы шуиз: «Кызьы мон сое тодом? Мон уго пересь ини, кышноелэн но аресэз бадӟым ини».

¹⁹ Кылчин солы ответ сётыса шуиз: «Мон – Гавриил, Инмар азьын сылӥсь, тонэн вераськыны но та ӟеч иворез тыныд вераны ыстэмын.

²⁰ Тани, тон кылтэм улод. Ас дыраз быдэсмоно верам кылъёслы оскымтэед понна та быдэсмон нуналозь тынад вераськемед уз луы».

²¹ Со дыре калык Захарияез витьыса улӥз, паймиз солэн храмын ӝегамезлы.

²² Со потӥз но соослы номыр но верамез ӧз луы. Соос валазы, со храмын адӟон адӟиз шуыса. Соосын со кипусъёс пыр гинэ валэкъяськиз, вераськемез ӧз луы.

²³ Служить карон нуналъёсыз йылпумъяськем бере дораз бертӥз.

²⁴ Та нуналъёс бере солэн кышноез Елисавета нуны ваёно луиз. Вить толэзь ӵоже адямиослэсь ватыса улӥз. Елисавета шуиз:

²⁵ «Адямиос пӧлын монэ медаз ни ултӥялэ шуыса, монэ жаляса, та виын тазьы лэсьтӥз Кузё-Инмаре».

²⁶ Куатетӥ толэзез мыныку, Инмар Гавриил Кылчинэз Галилеяысь Назарет каре,

²⁷ Давид юртысь Иосиф нимо пиосмуртлы курам Ныл доры ыстӥз. Со Ныллэн нимыз – Мария.

²⁸ Кылчин Со доры пырыса шуиз: «Шумпот, Дэлето! Кузё-Инмар Тонэныд; кышноос куспын Тон бакель каремын».

²⁹ Сое адӟыса, солэн кылъёсызлэсь Со кепыраз, малы меда та таӵе ӟечкылан шуыса малпаз.

³⁰ Кылчин Солы шуиз: «Эн кышка, Мария, Тон Инмар дорын дэлет басьтӥд.

³¹ Тани Тон секытэн луод, Пи ваёд но Солы Иисус ним сётод.

³² Со луоз быдӟым, Вылысь Инмарлэн Пиез шуыса нимаськоз. Солы Инмар Кузё-Инмар Давидлэсь, Солэн атаезлэсь, эксэй пуконзэ сётоз.

³³ Пумтэм дауръёс ӵоже Иаковлэн юртэзлы Со эксэй луыса пукоз, Солэн Эксэйлыкезлэн пумыз уз луы».

³⁴ Нош Мария Кылчинлы шуиз: «Кызьы та луыны быгатоз, куке Мон пиосмуртэз уг тодӥськы?»

³⁵ Кылчин Солы ответ сётыса шуиз: «Святой Дух Тон вылэ васькоз, Вылысь Инмарлэн кужымез Тонэ шобыртоз. Соин ик Тынэсьтыд вордӥськем Дун-Сьӧлыктэм Инмар Пи шуыса нимаськоз.

³⁶ Тани, Елисавета но, Тынад выжы-кумыед, нылпи вайисьтэм шуо вал, пересь даураз пи нуны ваёно луиз, солэн куатетӥ толэзез ни.

³⁷ Уго Инмарлэн одӥгез но верам кылыз быдэсмытэк уз кыльы».

³⁸ Соку Мария шуиз: «Тани Мон Кузё-Инмарлэн ляльчиез; тынад кылыдъя Мыным мед луоз». Собере Кылчин Со дорысь палэнскиз.

³⁹ Со нуналъёсы Мария султӥз но дыртыса гурезё шаере, Иудалэн городаз, мынӥз,

⁴⁰ Захариялэн корказ пырыса, Со Елисаветаез ӟечкылаз.

⁴¹ Елисавета Мариялэсь ӟечкыламзэ кылэм бере солэн пушказ нуныез вырӟиз; Елисавета Святой Духен тыр луиз.

⁴² Бадӟым куараен вазиськыса шуиз: «Кышноос пӧлысь ваньмызлэсь золгес Тон бакель каремын, бакель каремын Тынад пушкысьтыд емышед но!

⁴³ Кытысен та ӟечлык мыным: Кузё-Инмарелэн Анаез мон доры лыктӥз?

⁴⁴ Уго Тынад ӟечкылан куараед кылӥськыку, нуны шумпотыса пушкам вырӟиз.

⁴⁵ Шудо Оскем Мурт – Кузё-Инмарлэн Солы верамез быдэсмоз».

⁴⁶ Мария шуиз: «Мынам лулы Кузё-Инмарез данъя,

⁴⁷ духе Инмарлы, Утиселы, шумпотэ,

⁴⁸ Аслэсьтыз покчи ляльчизэ Со жаляса учкиз. Та дырысен вань выжыос Монэ шудо мурт шуозы,

⁴⁹ Кужмо Мыным быдӟым ужъёс лэсьтӥз, Солэн нимыз святой.

⁵⁰ Солэн гажан-жалянэз Солэсь кышкасьёс понна выжыосысь выжые улоз.

⁵¹ Со Ас киызлэсь кужымзэ возьматӥз, сюлмазы вылӥ мылкыдо малпанэн улӥсьёсты пазьгиз.

⁵² Кужмоосты пукон интыысьтызы уськытӥз, нош востэмъёсты ӝутӥз.

⁵³ Сютэмъёсты ваньбуро кариз, нош узырмемъёсты номыртэк но лэзиз.

⁵⁴ Аслэсьтыз ляльчизэ, Израилез, бордаз кариз, жалянэз тодэ вайыса –

⁵⁵ кызьы шуиз вал атайёсмылы – Авраамлы но солэн кидысэзлы пумтэм вапумозь».

⁵⁶ Мария куинь толэзь мында Елисавета дорын улэмез бере аслаз дораз бертӥз.

⁵⁷ Елисаветалэн нылпи ваён дырыз вуиз; со пи нуны вайиз.

⁵⁸ Бускельёсыз, ӵыжы-выжыосыз Кузё-Инмарлэсь сое юн гажам-жалямзэ кылзӥзы но соин валче шумпотӥзы.

⁵⁹ Тямысэтӥ нуналаз нунылы вандӥськон сямез ортчытыны лыктӥзы но, атаезлэн нимызъя солы Захария ним сётыны малпазы.

⁶⁰ Талы пумит солэн анаез шуиз: «Ӧвӧл, сое Иоанн шуыса нимано».

⁶¹ Нош солы шуизы: «Тынад выжы-кумыед пӧлын та нимез нуллӥсь нокин но ӧвӧл».

⁶² Атаезлэсь пусъёс пыр юазы, кыӵе ним со сётысал шуыса.

⁶³ Со пул куриз но гожтӥз: «Иоанн солэн нимыз». Ваньзы паймизы.

⁶⁴ Соку ик солэн кылыз-ымыз усьтӥськиз но, Инмарез данъяса, со вераськыны кутскиз.

⁶⁵ Со котырын улӥсьёс ваньзы кышкатскизы; Иудеялэн быдэс гурезё шаераз ваньмыз та сярысь вераськизы.

⁶⁶ Ваньмыз кылэм муртъёс тае сюлмазы возизы но вераллязы: «Кыӵе пинал та луоз?» Кузё-Инмарлэн киыз со вылын улӥз.

⁶⁷ Солэн атаез, Захария, Святой Духен тыр луыса, азьпалзэ тодытыса шуиз:

⁶⁸ «Кузё-Инмар, Израильлэн Инмарез, дано: Аслаз калыкез шоры гажаса учкиз но солы мозмытӥськон сётӥз.

⁶⁹ Аслаз ляльчиезлэн, Давидлэн, выжыысьтыз милемлы утиськонлэсь сюрзэ ӝутӥз.

⁷⁰ Аслаз вашкала дырысь святой пророкъёсызлэн кылынызы-ымынызы ивортӥз,

⁷¹ тушмонъёсмылэсь, вань синазькыль карисьёслэсь милемыз утёз;

⁷² милям атайёсмылы гажан-жалянзэ возьматоз но Аслэсьтыз святой сӥзён-косонзэ тодаз ваёз.

⁷³ Милям Авраам атаймы азьын кыл сётыса вераз:

⁷⁴ милемды тушмонъёсмылэн киулысьтызы мозмытоз,

⁷⁵ улонмылэн вань нуналъёсаз Солы дун-сьӧлыктэм мылкыдын, шонерлыкен Солы кышкатэк служить карыны.

⁷⁶ Тон, нуны, Вылысь Инмарлэн пророкез шуыса нимаськод, тон уго Кузё-Инмарлэн азьтӥз мынод Солы сюрес дасяны,

⁷⁷ сьӧлыкъёссэс куштыса утиськон сярысь Солэн калыкезлы валан сётыны,

⁷⁸ Инмармылэн сюлмысьтыз гажан-жалянэныз, кудӥныз асьме доры йылысен Шунды ӝужан лыктӥз,

⁷⁹ пеймытын, кулонлэн вужераз пуксисьёсты югдытыны, пыдъёсмес тупаса улонлэн сюрес вылаз поттыны».

⁸⁰ Нуны будӥз, лулыныз-сюлмыныз юнмаз, Израиль калыклы возьматскон нуналыз вуытозь, кыр дуннеосын улӥз.