Левит 8 - Библия удмурт кылын

8-тӥ ЛЮКЕТ

¹ Соку Кузё-Инмар Моисейлы тазьы вераз, тазьы шуиз:

² «Ааронэз но солэсь пиоссэ бордад кут, дӥськут, зырӟыны вӧй басьты, сьӧлык понна курбон сётыны ошпи басьты, кык така но басьты, одӥг мушкое (корзинае) юмал нянь тыр но

³ вӧсяськон скинияе пырон доры вань калыкез люка».

⁴ Моисей ваньзэ лэсьтӥз озьы, кызьы Кузё-Инмар косӥз; калык люкаськиз вӧсяськон скинияе пырон доры.

⁵ Моисей люкаськем калыклы шуиз: «Тани, Кузё-Инмар мар лэсьтыны косӥз».

⁶ Соку Моисей Ааронэз но солэсь пиоссэ вайыса вуэн миськиз,

⁷ Аарон вылэ дэрем дӥсяз, куссэ еэн думиз, вылаз риза выл дӥсь дӥсяз, вылаз ефод понӥз, ефодэз еэн думиз, соин ефодэз вылаз юнматӥз.

⁸ Вылаз муресазь понӥз, нош муресазь вылэ урим но туммим понӥз на.

⁹ Йыр вылаз кидар изьыяз, нош кидарлэн вылӥяз азьлапалтӥз чилясь карем пластина, святынялэсь диадимзэ, понӥз, кызьы косӥз Кузё-Инмар Моисейлы.

¹⁰ Зырӟон вӧез Моисей кутӥз но соин скинияез зырӟиз, отысь вань тӥрлыкъёсты-арбериосты но зырӟиз, ваньзэ тае вӧсяз.

¹¹ Курбон сётон ӝӧк вылэ сизьым пол зырӟон вӧйын пазьгиз; курбон сётон ӝӧкез но соин герӟаськем арбериосты, мисьтӥськонэз, солэсь сылон интызэ зырӟиз, соосты тазьы вӧсяз.

¹² Соку [Моисей] Ааронлэн йыр вылаз зырӟон вӧез кисьтӥз, дун-чылкыт карон понна сое вӧйын зырӟиз.

¹³ Соку Моисей Ааронлэсь пиоссэ вайиз но вылазы дэрем дӥсяз, куссэс еэн думиз, йыр вылазы кидар изьы изьыяз, кызьы Кузё-Инмар Моисеез лэсьтыны косӥз.

¹⁴ Сьӧлык понна курбон сётыны [Моисей] ошпи вайиз, соку Аарон но солэн пиосыз сьӧлык понна курбонлы ваем ошпилэн йыр вылаз кизэс понӥзы;

¹⁵ [Моисей] сое вандӥз, вирзэ кутӥз но чиньыеныз курбон сётон ӝӧклэсь сюръёссэ котыр ласянь вирын зыраз, курбон сётон ӝӧкез сузяз, нош кылемзэ вирез курбон сётон ӝӧклэн выжыяз кисьтӥз, чылкыт мед луоз шуыса вӧсяз сое.

¹⁶ [Моисей] курбон пудолэн пушкысьтыз вань кӧез октӥз, мус бордысь кӧй пуйыез, кыксэ ик пекляез басьтӥз, кӧйзэс октӥз; Моисей соосты курбон сётон ӝӧк вылын сутӥз;

¹⁷ нош ошпиез но солэсь кузэ, сӥльзэ, кырсь-жоб макеоссэ станлэн сьӧраз тылын сутӥз, кызьы Кузё-Инмар Моисеез косӥз.

¹⁸ [Моисей] тылын сутӥськись курбон ортчытыны така вайиз но, Аарон пиосыныз ӵош такалэн йыр вылаз кизэс понӥзы,

¹⁹ Моисей сое вандӥз но солэн вирыныз курбон сётон ӝӧкез котыр ласянь пазяз;

²⁰ така сӥлез люкетъёслы кораз – йырзэ, кӧйзэ, мугор люкетъёссэ Моисей тылын сутӥз.

²¹ Нош пуш арбериоссэ, пыдъёссэ вуэн миськиз но быдэссэ такаез Моисей курбон сётон ӝӧк вылын сутӥз: та тылын сутӥськись курбон ческыт зын поттэ, та курбон Кузё-Инмарлы сётӥське, кызьы Кузё-Инмар косӥз Моисеез лэсьтыны.

²² Соку [Моисей] мукетсэ такаез вайиз, священнике пуктыку сётӥськись курбон такаез, Аарон пиосыныз ӵош такалэн йыр вылаз кизэс понӥзы;

²³ Моисей сое вандӥз, вирзэ кутӥз но Ааронлэн бур пель дураз, бур киысьтыз бадӟым чиньы вылаз, бур пыдысьтыз бадӟым чиньы вылаз вир понӥз.

²⁴ Моисей Аарон пиосты вайиз но бурпал пель дуразы, бур киысьтызы бадӟым чиньы вылазы, бур пыдзылэн бадӟым чиньы вылазы вир понӥз, Моисей курбон сётон ӝӧкез котыр ласянь вирен пазьгиз.

²⁵ [Моисей] кӧез октӥз, такалэн быж бордаз ошиськыса улӥсь кӧй пуйыез, вань пуш кӧез, мус бордысь кӧй пуйыез басьтӥз, кыксэ ик пекляосты, соос бордысь кӧез октӥз, бурпал пельпумзэ басьтӥз;

²⁶ Кузё-Инмар азьын сылӥсь мушкоысь юмал няньёс пӧлысь одӥгзэ юмал нянез, одӥгзэ вӧйын сураса пыжем нянез, одӥг куарнянь басьтӥз но кӧй вылэ, бур пельпум вылэ понӥз.

²⁷ Табере ваньзэ тае Ааронлэн ки вылаз, солэн пиосызлэн ки вылазы понӥз но Кузё-Инмар азьын сэзъяса вылэ ӝутӥз;

²⁸ ваньзэ тае Моисей соослэн ки вылысьтызы басьтӥз но курбон сётон ӝӧк вылын тылын сутӥськись курбонэн валче тылын сутӥз: та священнике пуктыку сётӥськись курбон ческыт зын поттонлы сётӥське, та Кузё-Инмарлы курбон.

²⁹ Моисей мӧля люкетэз кутӥз но Кузё-Инмар азьын сэзъяса вылэ ӝутӥз: та вал священнике пуктыку курбон сётэм такалэн Моисейлы сётоно люкетэз, кызьы Кузё-Инмар Моисейлы косон сётӥз.

³⁰ Моисей зырӟон вӧез, курбон сётон ӝӧк вылысь вирез кутӥз, соин со Аарон вылэ, солэн дӥськут вылаз пазяз, солэн пиосыз, соослэн дӥськутсы вылэ пазяз; тазьы со Ааронэз но солэсь дӥськутсэ, бордаз сылӥсь пиоссэ, соослэсь дӥськутсэс дун-чылкыт кариз.

³¹ Соку Моисей Ааронлы но солэн пиосызлы шуиз: «Вӧсяськон скинияе пырон дорын сӥль пӧзьтэ но священнике пуктыку юмал няньёсын тырмытэм мушкоысь нянен отын ик сое сие, кызьы мыным косон сётэмын но шуэмын вал: ”Аарон но солэн пиосыз сое сиыны кулэ”,

³² нош сӥльлэсь но няньлэсь кылем люкетсэ тылын сутэ.

³³ Тӥледыз священнике пуктон нуналъёс йылпумъяськытозь, сизьым нунал ӵоже, вӧсяськон скиниялэн ӧс дорысьтыз эн кошкылэ, уго сизьым нунал ӵоже тӥледыз священнике пуктон кыстӥськыны кулэ;

³⁴ кызьы туннэ лэсьтэмын вал, тазьы тӥледыз чылкытатон-сузян понна лэсьтыны косӥз Кузё-Инмар.

³⁵ Вӧсяськон скиниялэн пырон дораз уен-нуналэн сизьым нунал ӵоже луэ, медад кулэ шуыса, Кузё-Инмар дорын возьмаськись луэ, уго [Инмар Кузё-Инмар] мыным таӵе косон сётӥз».

³⁶ Аарон но солэн пиосыз Кузё-Инмарлэсь Моисей пыр сётэм вань косонъёссэ быдэстӥзы.