Левит 5 - Библия удмурт кылын

5-тӥ ЛЮКЕТ

¹ «Кин ке но тазьы сьӧлыказ ке: карган куараез кылӥз, ачиз адӟиз яке кылӥз, яке тодӥз, но нокинлы но со сярысь ӧз вера, соку со мурт сьӧлыкез ас вылаз басьтоз.

² Яке кин ке тодытэк кыӵе ке кырсь маке борды йӧтӥськиз – кырсь пӧйшурлэн шӧй бордаз яке кырсь пудолэн шӧй бордаз, яке кырсь нюж кыстӥськыса ветлӥсьлэн шӧй бордаз, соку та мурт саптаськоз, янгыш луоз.

³ Адями бордысь потэм кырсь борды кин ке йӧтӥськиз ке, котькыӵе кырсь маке со мед луоз, со саптаськоз, нош со та сярысь ӧз тоды, берло гинэ тодӥз, озьы ке но со янгыш.

⁴ Кин ке но малпаськытэк кылыныз мар ке но уродзэ яке ӟечсэ лэсьтыны кыл сётӥз ке, котькыӵе уж со мед луоз, нош адямиос малпаськытэк кыл сёто, со дыре адями ужлэсь кыӵе луонзэ уг тоды вал, нош бӧрысь со тодӥз ке, со уж понна та адями янгыш каремын луоз.

⁵ Кудӥныз ке но таӵе ужен со янгыш луэмын ке, лэсьтэм сьӧлыксэ ватытэк ӧпкельыса вераз ке,

⁶ та лэсьтэм сьӧлыкез понна, янгышлэсь мозмытскон понна Кузё-Инмарлы сюро векчи пудоосыз пӧлысь ыжез яке кечез курбон мед ваёз, соку священник сое сьӧлыкезлэсь сузялоз.

⁷ Нош солэн моӵез ӧвӧл ке ыжез яке кечез курбон сётыны, сьӧлыкаса янгыш луэмез понна кык кыр дыдык яке кык пинал гурт дыдыкъёсты курбонлы мед ваёз, одӥгзэ сьӧлык понна курбон мед сётоз, нош мукетсэ тылын сутӥськись курбон мед кароз;

⁸ соосты со священник доры мед ваёз, соку [священник] сьӧлык понна ваем тылобурдоез курбон мед сётоз, йырзэ чырты бордысьтыз мед тӥялтоз, но медаз ишкалты;

⁹ та сьӧлык понна сётэм курбон тылобурдолэн вирыныз курбон сётон ӝӧклэн борддор бордаз вирен мед пазялоз, нош кылемзэ вирзэ курбон сётон ӝӧклэн выжыяз мед кисьтоз: та сьӧлык понна сётэм курбон;

¹⁰ нош мукетсэ тылобурдоез пуктон-косонъя тылын сутӥськись курбон мед кароз; тазьы священник та адямиез лэсьтэм сьӧлыкезлэсь сузялоз, солэн сьӧлыкез куштӥськоз.

¹¹ Нош солэн моӵез ӧвӧл ке кык кыр дыдыкъёсты яке кык пинал гурт дыдыкъёсты курбон сётыны, соку лэсьтэм сьӧлыкез понна ефа чабей пызьлэсь дасэтӥ люкетсэ сьӧлык понна курбонлы мед ваёз; со вылэ вӧй медаз кисьты, со вылэ ливан-ладан но медаз поны, уго та сьӧлык понна сётӥськись курбон;

¹² сое священник доры мед ваёз, нош священник быдэс кырым пызез буре вайыны мед басьтоз но курбон сётон ӝӧк вылын, Кузё-Инмарлы сӥзьыса, сое мед сутоз: та сьӧлык понна сётэм курбон;

¹³ тазьы священник сое кудаз ке но таӵе учыре сюрыса лэсьтэм сьӧлыкезлэсь сузялоз но, солэн сьӧлыкез куштӥськоз; нош [кылемзэ] салам нянез кадь ик священник аслыз мед басьтоз».

¹⁴ Кузё-Инмар Моисейлы тазьы вераз, тазьы шуиз:

¹⁵ «Кин ке йыруж лэсьтӥз ке, янгышаса Кузё-Инмарлы сӥзёнозэ аслыз кариз ке, со янгышез понна ыж уллёысьтыз чылкыт-шектэм такаез Кузё-Инмарлы мед ваёз, тон дунъялод, кӧня азвесь сӥкльёс, вӧсяськон скинияысь сӥкльлэн секталаеныз мертаса, ваёно такаезлэн дуныз луыны кулэ – янгыш лэсьтэм понна курбон луоз со.

¹⁶ Священной ужлы пумит сьӧлыкамез понна тыронзэ мед берыктоз, со вӧзы эшшо витетӥ люкетсэ мед ватсалоз на, сое священниклы мед сётоз, янгыш уж понна курбонлы ваем такаез курбон сётыса, священник со муртэ сьӧлыкезлэсь сузялоз, солэн сьӧлыкез куштӥськоз.

¹⁷ Кузё-Инмарлэн курон-косонъёсызлы пумит кин ке тодытэк сьӧлыказ ке, кулэтэм-ярантэм уж лэсьтӥз ке, янгыше сюриз ке, ас вылаз сьӧлыкез нуоно луоз,

¹⁸ соку со янгыш ужез понна священник доры чылкыт-шектэм такаез курбон сётыны мед ваёз, – кыӵезэ со вайыны кулэ, тон дунъялод, – солэсь тодытэк лэсьтэм янгышсэ, курон-косонэз сӧрыса лэсьтэм ужзэ, священник ӵошкатоз, солэн сьӧлыкез куштӥськоз.

¹⁹ Та Кузё-Инмар азьын янгыше сюрем понна ваем курбон».