Левит 3 - Библия удмурт кылын

3-тӥ ЛЮКЕТ

¹ Солэн курбонэз тупаса улонлы сӥзем курбон ке, сюро таза пудоез ке со курбонлы вае – ошсэ яке мессэ, Кузё-Инмарлы ваем курбон пудоезлэн нокыӵе но шекез медаз луы,

² курбон пудоезлэн йыр вылаз со кизэ мед поноз, вӧсяськон скинияе пырон ӧс дорын сое мед вандоз; нош Аарон пиос, священникъёс, курбон сётон ӝӧкез котыр ласянь вирен мед пазялозы.

³ Тупаса улонлы сӥзем курбон пудолэсь со вань пуш кӧйзэ, пушказ люкаськем кӧез, Кузё-Инмарлы мед ваёз,

⁴ кыксэ ик пеклязэ, соос вылысь, саур (макес) вылысьтыз кӧез, мус бордысьтыз кӧй пуйызэ мед ваёз; тае со пекляосын валче мед ваёз;

⁵ Ааронлэн пиосыз тае курбон сётон ӝӧк вылын тылын ӝуась пу вылын, тылын сутӥськись курбонэн ӵош, сутозы: та Кузё-Инмарлы ярамон ческыт зын поттӥсь курбон.

⁶ Тупаса улонлы сӥзьыса, со сюро векчи пудоез, таказэ яке мессэ, Кузё-Инмарлы курбон сётэ ке, ваем курбон пудоезлэн нокыӵе но шекез медаз луы.

⁷ Ыжъёс пӧлысь со курбонзэ вае ке, сое Кузё-Инмар азе мед султытоз,

⁸ курбон пудоезлэн йыр вылаз кизэ мед поноз но вӧсяськон скиния азьын сое мед вандоз, соку Ааронлэн пиосыз курбон сётон ӝӧкез котыр ласянь курбон пудолэн вирыныз мед пазялозы;

⁹ тупаса улонлы сӥзьыса ваем курбон пудолэсь кӧйзэ Кузё-Инмарлы мед ваёз, ошиськыса улӥсь быдэс кӧй пуйызэ, сюрлы вӧзтӥ ик вандыса, вань пуш кӧйзэ, пушказ люкаськем кӧйзэ, мед ваёз,

¹⁰ кыксэ ик пеклязэ, соос вылысь кӧйзэ, саур (макес) кӧйзэ, мус бордысьтыз кӧй люкаськон пуйызэ мед ваёз; тае со пекляосыныз валче мед ваёз;

¹¹ священник тае курбон сётон ӝӧк вылын сутоз: та тыллэн сиёнэз – Кузё-Инмарлы ваем курбон.

¹² Нош со кечъёс пӧлысь курбон сётэ ке, сое Кузё-Инмар азе мед султытоз.

¹³ Кечезлэн йыр вылаз кизэ мед поноз но вӧсяськон скиния азьын сое мед вандоз, Ааронлэн пиосыз солэн вирыныз курбон сётон ӝӧкез котыр ласянь мед пазялозы;

¹⁴ Кузё-Инмарлы курбон карыса, солэсь пуш кӧйзэ, пушказ люкаськем вань кӧйзэ, саламлы мед ваёз;

¹⁵ кыксэ ик пеклязэ, вылысьтыз кӧйыныз валче, саур (макес) бордысь кӧйзэ, мус бордысьтыз кӧй люкаськон пуйызэ; тае со пекляосыныз валче мед ваёз;

¹⁶ священник соосты курбон сётон ӝӧк вылын сутоз: та тыллэн сиёнэз – [Кузё-Инмарлы] ярамон ческыт зын поттон; вань кӧез Кузё-Инмарлы сётоно.

¹⁷ Та пуктон-косон тӥляд выжыостылы пумтэм вапумъёс ӵожелы, вань улон интыосады утён понна сётэмын: нокыӵе но кӧез, нокыӵе но вирез эн сие.