Левит 26 - Библия удмурт кылын

26-тӥ ЛЮКЕТ

¹ «Асьтэлы идолъёс, сульдэръёс эн лэсьтэ, асьтэ доры йыбыртъян юбоос эн пуктылэ, туспуктэм изъёсты но, соос азьын йыбыртъяны малпаса, асьтэ музъем вылэ эн пуктылэ, уго Мон тӥляд Инмарды Кузё-Инмар.

² Суббота нуналъёсме уте, вӧсяськон интыме сӥлы каре: Мон Кузё-Инмар.

³ Мынам пуктон-косонъёсыя тӥ улӥды ке, курон-косонъёсме утиды ке, соосты быдэсъяды ке,

⁴ ас дыраз Мон тӥледлы зор сёто, соку музъем будэм емышъёссэ сётоз, бусыысь писпуос емышсэс сётозы;

⁵ ю кутсанды виноград октон дырозь кыстӥськоз, виноград октонды кизён дырозь кыстӥськоз, кӧтты тырымон нянь сиыса улоды, музъем вылады кышкатэк улоды.

⁶ Музъем вылады тупаса улон лэзё, изьыны выдӥды ке, нокин но уз люкеты; сьӧсь пӧйшуръёсты музъем вылысьтыды улляло, меч музъемды пыр уз ортчы.

⁷ Тушмонъёстэс уллялоды, меч улады соос погралозы.

⁸ Тӥляд вить муртты сю муртэз уллялоз, сю муртты дас сюрс муртэз уллялоз; тӥляд азяды, меч улэ, тушмонъёсты погралозы.

⁹ Шорады учко [но тӥледыз бакель каро], емыш сётӥсесь каро, йылэто тӥледыз, тӥледын сӥзён-косон пыр кылдытэм кусыпме юнматыса возё.

¹⁰ Вужзэ, кылем ар сиёндэс сиёды, вылез вуэм понна вужзэ куштоды.

¹¹ Тӥ пӧлы улон юртме пукто, Мон тӥледыз синазькыль уг кары.

¹² Тӥ пӧлтӥ ветло, тӥляд Инмарды луо, нош тӥ Мынам калыке луоды.

¹³ Мон тӥляд Инмарды Кузё-Инмар, Египет музъемын тӥ ляльчиос медад луэ шуыса, тӥледыз отысь поттӥсь, зӥбеттылэсь жильыоссэ пыргытӥ но, йырдэс вылэ ӝутытыса, тӥледыз отысь поттӥ.

¹⁴ Нош Мынэсьтым верамме санэ ӧд ке понэ, вань та курон-косонъёсме ӧд ке быдэсъялэ,

¹⁵ Мынэсьтым пуктон-косонъёсме кулэтэм кариды ке, Мынэсьтым законъёсме синазькыль кариды ке, Мынэсьтым сӥзён-косонме сӧрыса, вань курон-косонъёсме ӧд ке быдэсъялэ,

¹⁶ соку Мон тӥледлы тазьы каро: тӥ доры шугадӟон лэзё – куасьмыса, пӧсекъяса висёнъёс – соосын сэрен синъёсты лябӟозы, лулды курадӟыса катьтэммоз; юнме гинэ кидысъёстэс кизёды, тушмонъёсты юдэс сиёзы.

¹⁷ Тӥ шоры учки ке, соку тӥ тушмонъёсты азе усьылоды, тӥледыз адӟемпотостэм карисьёс тӥледын кузёяськыса улозы; нокин но тӥ сьӧры ӧз ке но уйиськы, бызьыса кошкоды.

¹⁸ Эшшо озьы ке но Мынэсьтым веранме санэ ӧд ке понэ, соку Мон тӥледыз сьӧлыкъёсты понна сизьым пол золгес вӧсь каро.

¹⁹ Вылтӥяськон вог сямдэс тӥяло, инбамдэс корт кадь каро, музъемдэс ыргон кадь каро.

²⁰ Кужымды юнме быроз, музъем вылады номыр но уз буды, музъем вылысьтыды писпуос емыш уз сётэ.

²¹ Эшшо [та бере] но Мыным пумит мынӥды ке, Мынэсьтым верамме кылзэмды ӧз ке поты, соку Мон сьӧлыкъёсты понна тӥледыз эшшо сизьым полэс жугыто на:

²² тӥ вылэ луд пӧйшуръёсты лэзё, соос тӥледыз нылпитэк кельтозы, пудоостэс быдтозы, тӥледыз кулэстозы, озьы сюресъёсты тырттэм кылёзы.

²³ Эшшо та бере но ӧд ке тупатске, Мыным пумит мынӥды ке,

²⁴ соку Мон но, [вожме поттыса], тӥледлы пумит карисько, сизьым полэс сьӧлыкъёсты понна тӥледыз вӧсь каро,

²⁵ сӥзён-косонме тӥямды понна пунэм берыктӥсь мечез тӥ вылэ лэзё; нош тӥ городъёсады ватӥськиды ке, соку тӥ вылэ сьӧдчер лэзё, соку тӥ тушмон киулэ сётэмын луоды;

²⁶ адямилы кынар сётӥсь нянез тӥ пӧлысь быдто; дас кышномуртъёс тӥлесьтыд няньдэс одӥг гурын пыжозы но няньдэс, весэн мертаса, сётъялозы; тӥ сиёды, нош кӧтты уз тыры.

²⁷ Эшшо та бере но Мынэсьтым верамме санэ ӧд ке понэ, Мыным пумит мынӥды ке,

²⁸ соку Мон но, вожме поттыса, тӥледлы пумит мыно но сьӧлыкъёсты понна тӥледыз сизьым полэс вӧсь каро,

²⁹ пиостылэсь мугорзэс сиёды, нылъёстылэсь мугорзэс сиёды;

³⁰ гурезь йыл вӧсяськонъёстэс таркало, йыбыртъян юбоостэс погыртыло; тӥлесьтыд шӧйёстэс пыргытъям сульдэръёсты-идолъёсты вылэ сэрпалляло, Мон тӥледыз синазькыль каро;

³¹ городъёстэс тырттэм кельто, вӧсяськон интыостэс буш кельто, [курбон сётэмдылэсь] ческыт зынзэ уг зынъя;

³² музъемдэс тырттэм кельто, со пумысен тушмонъёсты ик паймозы, со музъеме улыны интыяськизы ке.

³³ Мурт калыкъёс пӧлы тӥледыз пазьго, бӧрсяды мечме кыре потто, соку музъемды тырттэм кылёз, городъёсты куашкатэмын луозы.

³⁴ Соку, буш кыльыса вань улон нуналъёсаз, субботаосыз понна, музъем каньылэн улоз; тушмонъёстылэн музъемазы улон дыръяды музъем шутэтскоз, субботаосыз понна аслыз каньыллык басьтоз;

³⁵ со музъем вылын улон дыръяды субботаосы шутэтскытэк улэмез понна, музъем буш кыльыса улон дыръяз шутэтскоз.

³⁶ Тушмонъёссылэн музъем вылазы улэп кылем адямиостылэн сюлмазы возьдаськон-курдан пырто, куарлэн куалекъяса улэмысьтыз потӥсь куара соосты уллялоз, меч улысь пегӟись кадь бызьыса кошкозы, усьылозы, сьӧразы нокин но уг ке но уйиськы,

³⁷ мечлэсь кышкаса пегӟисьёс кадь огзы вылэ огзы канжаськыса усьылозы, соос сьӧры нокин но уйиськыса уг ке но мыны, тушмонъёстылы пумит султыны кужымды уз тырмы;

³⁸ мурт калыкъёс пӧлы кулыса быроды, тушмонъёстылэн музъемзы тӥледыз ньылоз;

³⁹ нош тӥляд улэп кылемъёсты законлы пумит улэмъёссы понна тушмонъёстылэн музъемъёсазы куасьмозы-шуялозы, атайёссылэн законлы пумит улэмъёссы понна но соос куасьмозы-шуялозы.

⁴⁰ Соку соос асьсэлэн законлы пумит улэмзы сярысь, атайёссылэн сьӧлыкъёссы сярысь ватытэк вералозы, вералозы, кызьы Мыным пумит йыружъёс лэсьтылӥзы, Мыным пумит мынӥзы,

⁴¹ мар понна Мон но [йыркурен] соослы пумит мынӥ, соосты тушмонъёссылэн музъемазы пыртӥ; соку вог сюлэмзы тэрытсконо луоз, соку соос законлы пумит улэмзы понна шугадӟонъёс чидано луозы.

⁴² Иаковен сӥзён-косон пыр кусып кылдытэмме, Исаакен сӥзён-косон пыр кусып кылдытэмме, Авраамен сӥзён-косон пыр кусып кылдытэмме Мон тодам ваё, музъем сётэмме тодам ваё;

⁴³ калык татысь кошкыса музъемез огназэ кельтэм бере аслаз субботаосыз понна музъем огназ кылиз ке, каньылэн улоз, нош калык законлы пумит улэмез понна – Мынэсьтым законъёсме кулэтэм каремез понна, Мынэсьтым пуктон-косонъёсме синазькыль каремез понна – секытлыкъёсты чидано луоз.

⁴⁴ Тушмонъёссылэн музъемазы улыкузы но, израиль пиосты быдтон калэ уг вутты, соосын сӥзён-косон пыр кылдытэм кусыпме уг быдты, соосты синазькыль карыса, кулэтэм карыса, Мон уг улы, уго Мон Кузё-Инмар, соослэн Инмарзы;

⁴⁵ соослы ӟеч карон понна тодам ваё вашкала выжыосынызы сӥзён-косон пыр кусып кылдытэмме, соосты уго Мон калыкъёслэн син азязы Египет музъемысь поттӥ соослы Инмар луон понна. Мон Кузё-Инмар».

⁴⁶ Тани пуктон-косонъёс, интыян-радъянъёс, законъёс, кудъёссэ Кузё-Инмар Сӥнай гурезьысен Моисей пыр Асэныз израиль пиос вискын тупатӥз.