Левит 23 - Библия удмурт кылын

23-тӥ ЛЮКЕТ

¹ Кузё-Инмар Моисейлы тазьы вераз, тазьы шуиз:

² «Израиль пиослы ял, соослы Кузё-Инмарлэн праздникъёсыз сярысь вера, калыкез вӧсяськонэ люкаса ортчытъяно сӥё-дано нуналъёс сярысь ялыса вера. Тани Мынам праздникъёсы:

³ куать нунал ужъёсты быдэсъяны яра, нош сизьыметӥ нуналэ шутэтскон суббота, вӧсяськонэ люкаськон нунал; нокыӵе но мукет ужъёс эн лэсьтэ; вань улоно интыосады та Кузё-Инмарлэн субботаез.

⁴ Тани Кузё-Инмарлэн праздникъёсыз, вӧсяськонэ люкаськон дыръёс, соосты ортчытъян понна тӥ калыкез ас дыраз ӧтчаны кулэ.

⁵ Нырысетӥ толэзьлэн дас ньылетӥ [нуналаз], ӝытазе, Кузё-Инмарлэн Пасхаез;

⁶ та толэзьлэн ик дас витетӥ нуналаз Юмал Нянь Сиён праздник, та Кузё-Инмарлэн праздникез; сизьым нунал ӵоже юмал нянь сиыса улэ;

⁷ нырысетӥ нуналаз тӥ вӧсяськонэ люкаське; номыр но эн ужалэ.

⁸ Сизьым нунал ӵоже Кузё-Инмарлы курбонъёс вайылэ; сизьыметӥ нуналэ озьы ик вӧсяськонэ люкаськон; номыр но эн ужалэ».

⁹ Кузё-Инмар Моисейлы тазьы вераз, тазьы шуиз:

¹⁰ «Израиль пиослы таӵе ялон вера: Мынам тӥледлы сётоно музъемам вуиды ке, кизем юдэс араса улӥды ке, нырысь культодэс священниклы вае;

¹¹ тӥ доры ӟечлык мед вуоз шуыса, со Кузё-Инмар азьын культодэс, салам-кузьым карыса, вылэ ӝутоз, праздниклэн кыкетӥ нуналаз священник сое вылэ ӝутоз;

¹² культоез вылэ ӝутон нуналэ Кузё-Инмар азьын тылын сутӥськись курбон сётыны шектэм, одӥг аресъем ыжпи вае,

¹³ салам нянез соин ӵош вае: Кузё-Инмар азьын ческыт зын поттӥсь курбон сётыны ефалэн кык дасмос люкетаз тэрымон чабей пызь вӧйын сураса вае; соин ӵош кисьтоно курбон-саламлы гинлэн ньылетӥ люкетаз вина вае;

¹⁴ Инмардылы таӵе курбон ваемдылэсь азьвыл нокыӵе но выль нянез, куасьтэм юэз, ыль юэз эн сие: тӥляд вань улон интыосысьтыды тӥляд выжыостылы пумтэм вапумъёс ӵоже быдэсъяны сётэм пуктон-косон та.

¹⁵ Праздник ортчем бере, нырысетӥ нуналысеныз кутскыса, сэзъяса вылэ ӝутыны ю культо ваем нуналысеныды кутскыса, быдэссэ сизьым арняез асьтэлы лыдъялэ-ӵоталэ,

¹⁶ сизьым арня ортчем бере нырысетӥ нуналозяз витьтон нунал лыдъялэ-ӵоталэ, соку Кузё-Инмарлы саламлы выль нянь вае:

¹⁷ улон интыосысьтыды вылэ ӝутыны кык нянь вае, соос ефалэн кык дасмос люкетаз тэрымон чабей пызьлэсь пыжемын луыны кулэ, соос чырсатыса пыжемын луыны кулэ; соосты Кузё-Инмарлы нырысь емыш шуыса вае.

¹⁸ Салам нянен валче одӥг аресъем, шектэм сизьым ыжпиосты, сюро таза пудо пӧлысь одӥг ошпи, кык [шектэм] такаосты вае; соосын валче сётоно салам нянен но кисьтоно курбон-саламен та ваньмыз Кузё-Инмарлы сӥзем тылын сутӥськись курбонлы сётэмын мед луоз, та курбон Кузё-Инмар азьын ческыт зын поттыса мед улоз.

¹⁹ [Саламлы ваем выль нянен ӵош] сьӧлык понна курбон сётыны кеч уллёысь одӥг кечтака вае, тупаса улонлы сӥзем курбон сётыны одӥг аресъем кык ыжпиосты вае.

²⁰ Священник сое Кузё-Инмар азьын сэзъяса вылэ ӝутыны кулэ, сэзъяса ик вылэ ӝутыны кулэ саламлы ваем выль нянез но кык ыжпиосты, та луоз Кузё-Инмарлы ваем святыня; [тае курбон сётӥсь] священниклы [сёто];

²¹ та нуналэ калыкез ӧтчалэ, тӥ доры вӧсяськыны мед люкаськозы, со нуналэ номыр но эн ужалэ: та пумтэм вапумъёс ӵожелы сётэм пуктон-косон тӥляд вань улон интыосады выжыысь выжыосы мед улоз.

²² Ана вылысьтыды юдэс аракуды, йыран дурозяз ик эн аралэ, арам бервылады усьылэм шепъёсты эн бичалэ, куанер улӥсьлы, сьӧрлось лыктэм муртлы кельтэ. Мон Кузё-Инмар, тӥляд Инмарды».

²³ Кузё-Инмар Моисейлы тазьы вераса шуиз:

²⁴ «Израиль пиослы вера: сизьыметӥ толэзьлэн нырысетӥ [нуналаз] тӥ мед шутэтскоды, гумыен пеллян праздник мед луоз, вӧсяськонэ люкаськонды [мед луоз];

²⁵ номыр но эн ужалэ, Кузё-Инмарлы курбон сётэ».

²⁶ Кузё-Инмар Моисейлы тазьы вераз, тазьы шуиз:

²⁷ «Сизьыметӥ толэзьлэн дасэтӥ [нуналаз], Чылкытатӥськон-сузяськон нуналэ, вӧсяськонэ люкаське; асьтэдыз зӥбыт-востэм возе но Кузё-Инмарлы курбон сётэ;

²⁸ со нуналэ номыр но эн ужалэ, уго со Чылкытатӥськон-сузяськон праздник, Инмарды Кузё-Инмар азьын тӥледыз чылкыт карон понна со.

²⁹ Котькудӥз но адями та нуналэ ассэ зӥбыт-востэм возьытэк (визятэк) улэ ке, со мурт ас калыкез пӧлысь быдтэмын луоз;

³⁰ кудӥз ке но адями лул та нуналэ кыӵе ке но уж лэсьтӥз ке, со лулэз Мон ас калыкез пӧлысь быдто;

³¹ номыр но эн ужалэ, вань улон интыосысьтыды тӥляд выжыостылы пумтэм вапумъёс ӵожелы сётэм пуктон-косон та;

³² та – суббота – тӥ понна шутэтскон нунал мед луоз, асьтэдыз зӥбыт-востэм возе, толэзьлэн укмысэтӥ [нуналэзлэн] ӝытазеысеныз кутскыса; [толэзьлэн дасэтӥ нуналаз] ӝытазеысен ӝытазеозь суббота праздниктэс уте».

³³ Кузё-Инмар Моисейлы тазьы вераз, тазьы шуиз:

³⁴ «Израиль пиослы тазьы шу: со сизьыметӥ толэзе ик дас витетӥ нуналысен кутскыса Тылыс Пуктон праздник, сизьым нуналъем, Кузё-Инмарлы сӥзем праздник.

³⁵ Нырысетӥ нуналэ вӧсяськонэ люкаське, номыр но со нуналэ эн ужалэ;

³⁶ сизьым нунал ӵоже Кузё-Инмарлы курбон сётэ; тямысэтӥ нуналэ вӧсяськонэ люкаське, соку Кузё-Инмарлы курбон сётэ: та праздникез келян нунал, номыр но эн ужалэ.

³⁷ Тани Кузё-Инмарлэн праздникъёсыз, вӧсяськонэ люкаськонъёс ортчытъян нуналъёс, куке Кузё-Инмарлы тылын сутӥськись курбонъёс сёто, салам няньёс, кисьтоно курбон-саламъёс ваё, курбон пудоос вандо, котькудзэ курбон сётонэз аслаз нуналаз ортчыто,

³⁸ Кузё-Инмарлэн субботаосыз сяна, тӥляд саламъёсты-кузьымъёсты сяна, вань сӥзиськондэс быдэстыса ваемъёсты сяна, ас ӟеч мылкыдыныды Кузё-Инмарлы вань ваемъёсты сяна.

³⁹ Нош сизьыметӥ толэзьлэн дас витетӥ нуналаз, музъемлэсь будэтэм емышъёссэ бичан вакытады, Кузё-Инмарлэсь праздниксэ сизьым нунал пусъе: нырысетӥ нуналаз шутэтске, тямысэтӥ нуналаз шутэтске;

⁴⁰ нырысетӥ нуналаз чебер писпуослэсь вайёссэс, пальмапу вайёсты, паськыт куаро писпуослэсь вайёссэс, шур дурысь бадьпу вайёсты кияды кутэ, соку сизьым нунал ӵоже Инмарды Кузё-Инмар азьын шулдыръяське;

⁴¹ арлы быдэ Кузё-Инмарлэсь та праздниксэ сизьым нунал ӵоже сӥё-дано ортчытэ: та тӥляд выжыостылы пумтэм вапумъёс ӵожелы сётэм пуктон-косон; сизьыметӥ толэзе та праздникез ортчытэ;

⁴² тылыс пушкын сизьым нунал улэ; Израиль музъемын пырак улӥсь тылысын улыны кулэ,

⁴³ тӥляд выжыосты мед тодозы, Мон израиль пиосты Египет музъемысь поттэм берам тылысъёсы улыны интыяй шуыса. Мон тӥляд Инмарды Кузё-Инмар».

⁴⁴ Соку Моисей израиль пиослы ивортӥз Кузё-Инмарлэн праздникъёсыз сярысь.