Левит 22 - Библия удмурт кылын

22-тӥ ЛЮКЕТ

¹ Кузё-Инмар Моисейлы тазьы вераз, тазьы шуиз:

² «Ааронлы но солэн пиосызлы вера, израиль пиослэн святыняосынызы туж чакласа мед вырозы, соослэн Мыным сӥзем саламъёссы-кузьымъёссы пыр Мынэсьтым святой нимме медаз сантэмалэ. Мон Кузё-Инмар.

³ Вера соослы: кин ке но тӥляд кидысысьтыды-выжыысьтыды, али яке вуоно выжыысьтыды, ас бордаз кырсез вань дыръя израиль пиослэн Кузё-Инмарлы сӥзьыса сётэм святыняоссы борды вуттӥськиз ке, со адями лул Мынам азьысьтым быдтэмын луоз. Мон Кузё-Инмар, [тӥляд Инмарды].

⁴ Ааронлэн выжыысьтыз кин гижлочерен висе яке кинлэн саптаськонэз вия, сыӵе муртлы чылкытатӥськытозяз святыняез сиыны уг яра; кулэм муртлэсь кырсь луэм маке борды йӧтӥськиз ке яке кидысэз кисьтӥськиз ке,

⁵ яке кин ке кый выжы борды йӧтӥськыса саптаськиз ке, яке адями борды йӧтӥськыса саптаськиз ке, – солэн кырсез котькыӵе мед луоз, –

⁶ та кырсь борды йӧтӥськыса, со ӝытозь кырсь луоз, мугорзэ вуэн миськытозь, солы святыняез сиыны уг яра;

⁷ шунды пуксем бере со чылкыталоз, соку со святыняез сиыны быгатоз, уго та солэн сиёнэз.

⁸ Кулэм пудоез, пӧйшурен кесям пудо сӥлез со сиыны кулэ ӧвӧл, та пыр медаз саптаськы шуыса. Мон Кузё-Инмар.

⁹ Мынэсьтым косонъёсме мед быдэсъялозы, асьсэ вылэ сьӧлык медаз басьтэ но та косонъёсты сӧрыса улыку кулоно медаз луэ шуыса. Мон [Инмар] Кузё-Инмар, соосты дун-чылкыт карись.

¹⁰ Огез но палэнысь мурт святыняез сиыны кулэ ӧвӧл; священник доры улыны интыяськем мурт но, медъяськем мурт но святыняез сиыны кулэ ӧвӧл;

¹¹ нош священник, азвесь уксё тырыса, адямиез аслыз басьтӥз ке, со мурт тае сиыны быгатэ; священниклэн юртаз вордскемъёс но солэсь няньзэ сиыны быгато.

¹² Священниклэн нылыз палэнысь муртлы бызиз ке, саламлы-кузьымлы ваем святыняосыз со сиыны кулэ ӧвӧл;

¹³ священниклэн нылыз палкышно кылиз яке картэныз люкиськиз ке, нылпиосыз солэн ӧвӧл, со атай юртаз пинал дыръяз сямен ик улыны берытскиз ке, соку со атаезлэсь няньзэ сиыны быгатэ ни; нош палэнысь вуэм одӥгез но адями сое сиыны кулэ ӧвӧл.

¹⁴ Кин ке янгышен святыня пӧлысь мае ке сииз ке, со святыняез священниклы сётыны кулэ, со борды витетӥ люкетсэ ватсаны кулэ.

¹⁵ Священникъёс израиль пиослэсь Кузё-Инмарлы ваем святой саламъёссэс-кузьымъёссэс сантэманы кулэ ӧвӧл,

¹⁶ йыруж лэсьтон сьӧлыкез асьсэ вылэ басьтыны кулэ ӧвӧл, асьсэлэсь святыняоссэс сиыку, уго Мон Кузё-Инмар, соосты дун-чылкыт карись».

¹⁷ Соку Кузё-Инмар Моисейлы тазьы вераз, тазьы шуиз:

¹⁸ «Ааронлы, солэн пиосызлы, вань израиль калыклы тазьы вера: израиль выжыысь яке сьӧрлось лыктыса израиль калык пӧлы [улыны интыяськем] муртъёс пӧлысь кин ке но кыӵе ке сӥзиськонзэ быдэстыса яке аслаз ӟеч мылкыдыныз Кузё-Инмарлы тылын сутоно курбонзэ вае ке,

¹⁹ та уж понна Инмар азьын ӟечлык басьтэмед потэ ке, курбон пудоед шектэм, айы выжы, сюро таза пудо пӧлысь, ыжъёс пӧлысь, кечъёс пӧлысь мед луоз;

²⁰ пудодылэн вылтыраз шекез вань ке, эн вае [Кузё-Инмарлы], уго со тӥледлы ӟечлык уз вайы.

²¹ Кин ке но тупаса улонлы сӥзем курбон вае ке, Кузё-Инмар азьын сётэм кылзэ быдэстыса яке аслаз ӟеч мылкыдызъя, [яке праздник нуналъёсады,] – сюро таза яке сюро векчи пудо пӧлысь, Инмарлы ярамон луон понна со курбон пудозы шектэм мед луоз: вылтыраз нокыӵе но шекез луыны кулэ ӧвӧл;

²² синтэм, чутӥсь, ӧлексы, висись, гижлоё-яраё, паршаё пудоосты Кузё-Инмарлы эн вае, Кузё-Инмарлэн курбон сётон ӝӧк вылаз соосты курбон эн сётэ;

²³ туж кузь куко яке туж вакчи куко ошпиез яке ыжпиез аслад ӟеч мылкыдыныд курбонлы сётыны малпаськод ке, сётыны быгатӥськод, нош сӥзиськондэ быдэстыса сётӥськод ке, соку курбонэд Инмар азьын ярантэм луоз.

²⁴ Паньгам, пилиськем, ишкалтэм пузо, улошо карем пудоез Кузё-Инмарлы эн вае, асьтэ музъем вылын тае эн лэсьтэ;

²⁵ мурт выжыысь адямиослэн киысьтызы басьтэм таӵе пудоосты Инмардылы эн вае, уго соослэн вылтыразы шекез вань, сӧриськем интыосыз вань – соос тӥледлы ӟечлык уз вае».

²⁶ Кузё-Инмар Моисейлы тазьы вераз, тазьы шуиз:

²⁷ «Кунян яке ыжпи, яке кечпи вордӥськиз ке, сое сизьым нунал ӵоже анаез бордын возёно, нош тямыс нунал, солэсь но бадӟымгес луэм бере Кузё-Инмарлы курбон сётыны ярамон луоз ини;

²⁸ скалэз кунянэныз ӵош яке ыжез ыжпиеныз ӵош одӥг нуналэ эн вандэ.

²⁹ Кузё-Инмарлы тау карон курбон вайыкуды, ӟечлык басьтыны мед быгатоды шуыса, курбондэс кызьы кулэ, озьы сётэ;

³⁰ курбон сиёндэс со нуналэ ик сие, номырзэ но ӵукнаозьлы эн кельтэ. Мон Кузё-Инмар.

³¹ Мынэсьтым курон-косонъёсме уте, быдэсъялэ соосты. Мон Кузё-Инмар.

³² Мынэсьтым святой нимме эн сапталэ, израиль пиос Монэ дун-сьӧлыктэм шуыса сӥлы мед карозы. Мон Кузё-Инмар, тӥледыз дун-чылкыт карись,

³³ тӥледлы Инмар луон понна Мон тӥледыз Египет музъемысь поттӥ. Мон Кузё-Инмар».