Левит 21 - Библия удмурт кылын

21-тӥ ЛЮКЕТ

¹ Кузё-Инмар Моисейлы тазьы шуиз: «Священникъёслы, Аарон пиослы, тазьы ялыса шу: ас калыксы пӧлысь кулэм мурт борды йӧтӥськыса медаз саптаське;

² матысь ӵыжы-выжыез борды гинэ, анаед борды, атаед борды, пиед борды, нылыд борды, агай-выныд борды,

³ бызьылымтэ, нылмурт куен возиськем, бордад улэм сузэред борды гинэ йӧтӥськыны но саптаськытэк кыльыны луэ;

⁴ ас калыкед пӧлысь котькин борды йӧтӥськыса астэ саптаны кулэ ӧвӧл, кырсь медад луы.

⁵ Соос йырзэс мычыны кулэ ӧвӧл, тушсылэсь дурзэ вандылыны кулэ ӧвӧл, мугор вылзэс вандылыны-шорманы кулэ ӧвӧл.

⁶ Соос Инмарзы понна дун-чылкытэсь луыны кулэ, Инмарзылэсь нимзэ сантэманы кулэ ӧвӧл, уго соос Кузё-Инмарлы курбон ваё, Инмарзылы нянь ваё, соин ик соос дун-чылкытэсь луыны кулэ.

⁷ Соос азыса-калгыса улӥсь нылэз, ныллыксэ ыштэм муртэз кышно басьтыны кулэ ӧвӧл, картэзлэсь куштэм кышнозэ но кузпаллы вайыны кулэ ӧвӧл, уго соос [Кузё-Инмар] Инмарзы понна дун-чылкытэсь.

⁸ Священникез дун-чылкыт шуыса сӥлы кар, уго со тынад Инмаредлы [Кузё-Инмарлы] нянь вае: тыныд со дун-чылкыт мед луоз, уго Мон тӥледыз дун-чылкыт карись Кузё-Инмар Дун-Чылкыт.

⁹ Священниклэн нылыз юмшаса-калгыса ассэ саптаз ке, со атайзэ сантэма; тылын сое сутоно.

¹⁰ Нош агай-вынъёсыз пӧлысь быдӟым священник, кинлэн йыр вылаз зырӟон вӧй кисьтэмын, кин дун-чылкыт каремын вылаз священниклэсь дӥськутсэ дӥсян понна, йырзэ гольык карыны, дӥськутсэ кесяны кулэ ӧвӧл;

¹¹ нокыӵе но кулэм муртлэн матаз лыктыны кулэ ӧвӧл: кулэм атаез борды, кулэм анаез борды йӧтӥськыса, со ассэ саптаны кулэ ӧвӧл.

¹² Вӧсяськон инты дорысь кошкылыны со кулэ ӧвӧл, Инмарезлэсь вӧсяськон интызэ сантэманы кулэ ӧвӧл, уго со аслаз Инмарезлэн зырӟон вӧеныз зырӟемын, дун-чылкыт каремын. Мон Кузё-Инмар.

¹³ Кышно басьтыны со кулэ [ас калыкез пӧлысь] нылмуртэз;

¹⁴ палкышноез яке картэзлэсь куштэм кышнозэ, яке ныллыксэ ыштэм муртэ, [яке] азыса-калгыса улӥсез со кышно басьтыны кулэ ӧвӧл, со ас калыкез пӧлысь ныллыксэ утем нылмуртэз кышно басьтыны кулэ;

¹⁵ калыкез пӧлын со аслэсьтыз кидыссэ-выжызэ саптаны кулэ ӧвӧл, уго Мон [Инмар] Кузё-Инмар, сое дун-чылкыт карись».

¹⁶ Кузё-Инмар Моисейлы тазьы вераз, тазьы шуиз:

¹⁷ «Ааронлы тазьы шу: ”Выжыысь выжые тынад кидысэд-выжыед пӧлысь нокин но, солэн мугораз шекъёсыз-тырмымтэосыз вань ке, Инмарезлы нянь вайыса лыктыны кулэ ӧвӧл;

¹⁸ мугор вылаз тырмымтэосыз вань ке, – синтэм, чутӥсь, ӧлексы мурт ке со, курбон сётонэз ортчытыны кулэ ӧвӧл,

¹⁹ кинлэн пыдыз тӥяськемын яке киыз чигиськемын,

²⁰ тыбырыз потэмын, киыз яке пыдыз куасьмемын, синзэ дыж басьтэм, гижлоё, паршаен висись, пал пузо мурт но курбон сётонэз ортчытыны кулэ ӧвӧл;

²¹ Аарон священниклэн кидысысьтыз-выжыысьтыз потэм одӥгез но адями, солэн мугор вылаз кыӵе ке тырмымтэосыз-шекъёсыз вань ке, Кузё-Инмарлы курбон сётыны медаз лыкты; тырмымтэез-шекез солэн мугор вылаз бере, Инмарезлы (курбон) нянь вайыса лыктыны со кулэ ӧвӧл;

²² быдӟым святыняос пӧлысь но, святыняос пӧлысь но Инмарезлэсь няньзэ со сиыны быгатэ;

²³ но катанчи доры со лыктыны кулэ ӧвӧл, курбон сётон ӝӧклэн матаз но лыктыны кулэ ӧвӧл, малы ке шуоно солэн мугор вылаз тырмымтэез-шекез вань; Мынэсьтым вӧсяськон интыме со сантэманы кулэ ӧвӧл, уго Мон Кузё-Инмар, соосты дун-чылкыт карись”».

²⁴ Та сярысь Моисей Ааронлы но солэн пиосызлы, вань израиль калыклы ивортӥз.