Левит 2 - Библия удмурт кылын

2-тӥ ЛЮКЕТ

¹ Кин ке но Кузё-Инмарлы нянез курбонлы вайыны турттэ ке, чабей пызь мед ваёз, со пушкы вӧй мед кисьтоз, со вылэ ливан-ладан мед поноз,

² та курбонэз Ааронлэн пиосыз, священникъёс, кие мед сётоз, священник та пызез вӧйын мед суралоз, ливанэн-ладанэн валче быдэс кырым мед басьтоз но, буре вайыса, курбон сётон интыын мед сутоз; та Кузё-Инмарлы ярамон ческыт зын поттӥсь курбон;

³ нош ваем салам няньлэсь кылем люкетсэ Ааронлы но солэн пиосызлы мед сётозы; та Кузё-Инмарлы ваем курбонъёс пӧлысь быдӟым святыня.

⁴ Курбонлы гурын пыжем салам нянь вайиськод ке, чабей пызьлэсь пыжем юмал нянь вай, пызез вӧйын сурамын мед луоз, вӧйын зырам юмал куарнянь вай.

⁵ Салам нянед чабей пызьлэсь, вӧйын сураса, таба вылын пыжемын мед луоз, со юмал мед луоз,

⁶ сое люкетэн-люкетэн тӥялля но вылаз вӧй кисьты: та [Кузё-Инмарлы] ваем салам нянь.

⁷ Салам нянед горшокын пыжемын ке, со чабей пызьлэсь, вӧйын сураса, пыжемын мед луоз,

⁸ таӵе амалэн дасям саламдэ Кузё-Инмарлы вай; сое священниклы сёт, нош со саламдэ курбон сётон ӝӧк вылэ ваёз;

⁹ та курбонлэсь оглюкетсэ священник буре ваёнлы басьтоз но курбон сётон ӝӧк вылын сутоз: та Кузё-Инмарлы ярамон ческыт зын поттӥсь курбон;

¹⁰ курбонлы ваем салам няньлэн кылем люкетэз Ааронлы но солэн пиосызлы сётӥське: та Кузё-Инмарлы ваем курбонъёс пӧлысь быдӟым святыня луэ.

¹¹ Кузё-Инмарлы ваем салам няньды чырсатыса пыжемын медаз луы, уго чырсатыса пыжемез, чечыез Кузё-Инмарлы курбон карыса сутыны кулэ ӧвӧл;

¹² Кузё-Инмарлы, нырысь емыш салам шуыса, соосты вайыны луэ, нош курбон сётон ӝӧк вылэ, ческыт зын поттыны шуыса, соосты ӝутыны уг яра.

¹³ Вань салам няньёстэ пӧлазы сылал поныса пыж, курбон пушкад Инмаредлэсь сӥзён-косонзэ тодытӥсь-юнматӥсь сылал понытэк эн кельты: котькыӵе но саламъёс вайыкуд, [Инмаредлы Кузё-Инмарлы] сылал вай.

¹⁴ Выль вуэм юлэсь Кузё-Инмарлы салам нянь вайиськод ке, тыл вылын куасьтэм шепъёстэ куадаса, изыса вай,

¹⁵ соос вылэ вӧй кисьты, вылазы ливан-ладан пон: та луэ салам нянь;

¹⁶ буре вайыса, юлэсь, вӧйлэсь люкетсэ, быдэссэ ливанэз-ладанэз священник сутоз: та Кузё-Инмарлы курбон.