Левит 18 - Библия удмурт кылын

18-тӥ ЛЮКЕТ

¹ Кузё-Инмар Моисейлы тазьы вераз, тазьы шуиз:

² «Израиль пиослы тазьы ялыса вера: ”Мон тӥляд Инмарды Кузё-Инмар.

³ Египет музъемын улыкуды лэсьтэм ужъёстэс татын эн лэсьтэ, Ханаан музъемын, кытчы Мон тӥледыз нуо, мар отын лэсьто, соосты быдэсъяса эн улэ, соослэн пуктон-косонъёссыя эн улэ.

⁴ Мынэсьтым законъёсме быдэсъяса улэ, Мынэсьтым пуктон-косонъёсме быдэсъялэ, соосъя улэ. Мон тӥляд Инмарды Кузё-Инмар.

⁵ Мынэсьтым пуктон-косонъёсме, Мынэсьтым законъёсме быдэсъяса улэ, соосты адями быдэсъяса улӥз ке, пумтэм вапумъёс улоз. Мон [тӥляд Инмарды] Кузё-Инмар.

⁶ Нокин но, ӵыжы-выжы луись кышномуртлэсь гольык интызэ усьтыны малпаса, матаз медаз лыкты. Мон Кузё-Инмар.

⁷ Атаедлэсь но, анаедлэсь но гольык интызэс эн усьты, со – тынад анаед, солэсь гольык интызэ эн усьты.

⁸ Атаедлэн кышноезлэсь гольык интызэ эн усьты, со – атаедлэн гольыкез.

⁹ Сузэредлэсь гольыксэ, атаедлэн нылызлэсь яке анаедлэн нылызлэсь, та коркан-а со вордскемын яке мукет азьын-а вордскемын, соослэсь гольык интызэс эн усьты.

¹⁰ Пиедлэн нылызлэсь гольыксэ яке нылыдлэн нылызлэсь гольыксэ, гольык интызэс эн усьты, уго соослэн гольыксы – со тынад гольыкед.

¹¹ Атаедлэсь вордӥськем, атаедлэн кышноезлэн нылызлэсь гольык интызэ эн усьты, [атай ласянь] со тынад сузэред луэ ук.

¹² Атаедлэн сузэрезлэсь гольык интызэ эн усьты, уго со атаеныд одӥг вирысь потэмын.

¹³ Анаедлэн сузэрезлэсь гольык интызэ эн усьты, уго со анаеныд одӥг вирысь потэмын.

¹⁴ Атаедлэн братэзлэсь гольык интызэ эн усьты, солэн кышноезлэн матаз эн мыны, уго со тынад кенакед.

¹⁵ Кенэдлэсь гольык интызэ эн усьты: со пиедлэн кышноез, солэсь гольык интызэ эн усьты.

¹⁶ Агай-выныдлэн кышноезлэсь гольык интызэ эн усьты, со тынад агай-выныдлэн гольыкез.

¹⁷ Кышномуртлэсь но солэн нылызлэсь гольык интызэс эн усьты; солэн пиезлэсь нылзэ, нылызлэсь нылзэ эн басьты гольык интызэс усьтон понна – соос соин одӥг вирысь потэмъёс; та законлы пумит улон луэ.

¹⁸ Кышнодэ сузэреныз ӵош кышнолы эн басьты, тэргаськыса улоно медаз луэ, кышноед улэп дыръя солэн сузэрезлэсь гольык интызэ эн усьты.

¹⁹ Кышноед саптаськонэзлэсь чылкытатӥськытозь, гольык интызэ усьтыны шуыса, матаз эн мыны.

²⁰ Мукет адямилэн кышноеныз артэ эн выды, кидыстэ кисьтыса саптаськоно медад луы шуыса.

²¹ Нылпиосыд пӧлысь одӥгзэс но Молохлы ужаны-тыршыны эн сёты, Инмаредлэсь нимзэ эн сантэма. Мон Кузё-Инмар.

²² Пиосмурт вӧзы кышномурт вӧзы кадь эн выды – со юрӟым уж.

²³ Нокыӵе пудоен но, [кидыстэ] кисьтыны шуыса, артэ эн выды, соин медад саптаськы; кышномурт но, пудолэн матаз мыныса, азон сьӧлык лэсьтыны кулэ ӧвӧл – со юрӟым уж.

²⁴ Та ужъёс пӧлысь одӥгеныз но асьтэдыз эн сапталэ, уго вань та сьӧлыко ужъёсын тӥляд азьысьтыды Мынам улляно калыкъёсы асьсэды саптазы;

²⁵ отысь музъем но саптаськиз; солэн законлы пумит улэмез шоры Мон учки, соку со музъем ас вылысьтыз улӥсьёссэ сэрпалтӥз.

²⁶ Нош тӥ чаклалэ-уте Мынэсьтым пуктон-косонъёсме, Мынэсьтым законъёсме, одӥгзэ но юрӟым ужез эн лэсьтэ – та музъемын пырак улӥсь но, сьӧрлось лыктыса тӥ пӧлын улӥсь но,

²⁷ уго вань та юрӟым ужъёсты та музъемын тӥ вуэмлэсь азьвыл улӥсьёс лэсьтыса улӥзы, – озьы та музъем саптаськиз.

²⁸ Тӥледыз но музъем ас вылысьтыз сэрпалтоно медаз луы, сое саптаса улоно луиды ке, кызьы со сэрпалтӥз тӥлесьтыд азьвыл улэм калыкъёсты.

²⁹ Кин одӥгзэ ке но та юрӟым ужъёс пӧлысь лэсьтыса улӥз, таӵе ужъёсты лэсьтыса улӥсь адями лулъёс асьсэ калык пӧлысь быдтэмын луозы.

³⁰ Озьыен, чаклалэ-уте Мынэсьтым косонъёсме, тӥлесьтыд азьвыл улэмъёслэсь юрӟымесь сямъёссэс утьыса эн улэ, соослэн сямъёсынызы асьтэдыз эн сапталэ. Мон тӥляд Инмарды Кузё-Инмар”».