Левит 15 - Библия удмурт кылын

15-тӥ ЛЮКЕТ

¹ Кузё-Инмар Моисеен Ааронлы тазьы вераз, тазьы шуиз:

² «Израиль пиослы вералэ, тазьы шуэ: ”Кудӥзлэн ке но пиосмуртлэн мугорысьтыз маиз ке вияны кутскиз ке, та вияменыз со кырсь мурт луэ ни.

³ Тани солэн мугорысьтыз виям маин ке кырсь луэмез пумысен [сётӥськем закон]: мугорысьтыз маке но вия ке, виянэз мугорысьтыз потыны ӝегаса улэ ке, та солэн кырсез;

⁴ мугорысьтыз виякуз, та адями валес вылаз выдӥз ке, со валес кырсь луэ; кытчы ке, маке вылэ пуксиз ке, со арбери кырсь луоз;

⁵ кин ке но солэн валес бордаз йӧтӥськиз ке, со мурт дӥськутсэ миськыны, ачиз но вуэн гылтӥськыны кулэ, ӝытозь со кырсь шуыса лыдъяськоз;

⁶ мугорысьтыз виянэз вань муртлэн пукем бервылаз кин ке пуксиз ке, со мурт ас дӥськутсэ миськыны кулэ, нош ачиз вуэн гылтӥськыны кулэ, ӝытозь со кырсь шуыса лыдъяськоз;

⁷ мугорысьтыз виянэз ванё мурт борды кин ке но йӧтӥськиз ке, со мурт дӥськутсэ миськыны кулэ, ачиз но вуэн гылтӥськыны кулэ; ӝытозь со кырсь шуыса лыдъяськоз;

⁸ мугорысьтыз виянэз ванё мурт чылкыт мурт вылэ сялӟиз ке, соиз ас дӥськутсэ миськыны кулэ, ачиз но вуэн гылтӥськыны кулэ; ӝытозь со мурт кырсь шуыса лыдъяськоз;

⁹ мугорысьтыз виянэз ванё муртлэн пукем уробоез [ӝытозь] кырсь шуыса лыдъяськоз;

¹⁰ мугорысьтыз виянэз ванё муртлэн пукем бервылысьтыз маиз ке борды кин ке но йӧтӥськиз ке, со мурт ӝытозь кырсь шуыса лыдъяськоз; кин ке но со арбериез кутыса нуиз ке, со мурт дӥськутсэ миськыны кулэ, ачиз но вуэн гылтӥськыны кулэ; со мурт ӝытозь кырсь шуыса лыдъяськоз;

¹¹ кизэ миськытэк мугорысьтыз виянэз ванё мурт кин ке но борды йӧтӥськиз ке, со мурт дӥськутсэ миськыны кулэ, ачиз но вуэн гылтӥськыны кулэ; ӝытозь со мурт кырсь шуыса лыдъяськоз;

¹² мугорысьтыз виянэз ванё мурт горд сюйлэсь лэсьтэм горшок борды йӧтӥськиз ке, горшокез сузмытыны кулэ, нош сосуд пулэсь ке лэсьтэмын, сое вуэн миськоно [но, со чылкыт луоз].

¹³ Нош мугорысьтыз виянэз дугдӥз ке, соку со мурт быдэсак чылкыт луон понна эшшо сизьым нунал ӵоже дун-чылкыт улыны кулэ, соку со дӥськутсэ мед миськоз, мугорзэ улэп вуэн мед гылтоз но, со чылкыт луоз;

¹⁴ тямысэтӥ нуналаз кык кыр дыдыкъёсты яке кык пинал гурт дыдыкъёсты мед кутоз но Кузё-Инмар азе вӧсяськон скинияе пырон азе мед лыктоз, таосты священник кие мед сётоз;

¹⁵ та тылобурдоос пӧлысь одӥгзэ священник сьӧлык понна курбон мед сётоз, нош мукетсэ тылын сутӥськись курбонлы мед сётоз, озьы священник со муртэ мугорысьтыз виянлэсь Кузё-Инмар азьын сузялоз.

¹⁶ Кинлэн ке кидысэз кисьтӥськиз ке, соку со быдэс мугорзэ вуэн миськыны кулэ, ӝытозь со кырсь шуыса лыдъяськоз;

¹⁷ дӥськут вылэ, ку тӥрлык вылэ кидыс усиз ке, соосты вуэн миськоно, ӝытозь соос кырсь шуыса лыдъяськозы.

¹⁸ Пиосмурт кышномуртэн артэ выдӥзы ке, пиосмуртлэн кидысэз кисьтӥськиз ке, соос кыксы ик вуэн мисьтӥськыны кулэ, ӝытозь соос кырсесь шуыса лыдъяськозы.

¹⁹ Кышномуртлэн саптаськонэз потэ ке, мугорысьтыз вир вия ке, соку со чылкытатӥськон вакытаз сизьым нунал ӵоже гуртаз пукыны кулэ, кин ке но та кышномурт борды йӧтӥськиз ке, со мурт ӝытозь кырсь шуыса лыдъяськоз;

²⁰ чылкытатӥськон нуналъёсаз кытчы гинэ со уз выды, ваньмыз кырсь луоз, кытчы гинэ со уз пуксьы, ваньмыз кырсь луоз;

²¹ кин ке солэн валес бордаз йӧтӥськиз ке, со мурт дӥськутсэ миськыны кулэ, ачиз но вуэн гылтӥськыны кулэ, ӝытозь со кырсь шуыса лыдъяськоз;

²² солэн пукем бервылаз кин ке йӧтӥськиз ке, со мурт дӥськутсэ миськыны кулэ, ачиз но вуэн гылтӥськыны кулэ, ӝытозь со мурт кырсь шуыса лыдъяськоз;

²³ валес вылысьтыз кыӵе ке тӥрлык борды, пукем бервылысьтыз кыӵе ке арбери борды кин ке йӧтӥськиз ке, та мурт ӝытозь кырсь шуыса лыдъяськоз;

²⁴ таӵе кышноен картэз изиз ке, кышноезлэн саптаськемез картэз вылын луоз; та пиосмурт сизьым нунал ӵоже кырсь шуыса лыдъяськоз, кыӵе гинэ валес вылэ со уз выды, со инты кырсь шуыса лыдъяськоз.

²⁵ Саптаськон нуналъёсыз луымтэ дыръя кышномуртлэн вирыз трос нуналъёс ӵоже вия ке, яке солэн виянэз чаклам нуналъёслэсь кемагес кыстӥське ке, соку вань саптаськон-виян вакытъёсаз, чылкытатӥськон нуналъёсаз кадь ик, со кырсь шуыса лыдъяськоз;

²⁶ саптаськонэз виян дыръя кудаз гинэ валес вылэ таӵе кышномурт уз выды, со валес кырсь луоз, кызьы валес кырсь луэ кышномуртлэн чылкытатӥськон нуналъёсыз мыныку; кыӵе ке тӥрлык вылэ со пуксиз ке, со тӥрлык кырсь луоз, кызьы кырсь луэ, кышномуртлэн чылкытатӥськон нуналъёсыз мыныку;

²⁷ кин ке та тӥрлыкъёс борды йӧтӥськиз ке, со кырсь шуыса лыдъяськоз, со мурт дӥськутсэ миськыны кулэ, ачиз но вуэн гылтӥськыны кулэ, ӝытозь со кырсь шуыса лыдъяськоз.

²⁸ Вир виянэн курадӟыса улӥсь кышномурт саптаськонэзлэсь мозмытскем бераз сизьым нунал ӵоже возьманы кулэ, собере со чылкыт луоз;

²⁹ та кышномурт тямысэтӥ нуналаз кык кыр дыдыкъёсты яке кык пинал гурт дыдыкъёсты мед басьтоз, собере соосты священник доры, вӧсяськон скинияе пырон ӧс доры, мед ваёз;

³⁰ одӥгзэ тылобурдоез священник сьӧлык понна курбон сётоз, нош мукетсэ тылын сутӥськись курбон кароз, озьы священник та кышномуртэ Кузё-Инмар азьын саптаськонэзлэн виянэзлэсь сузялоз”.

³¹ Озьы израиль пиосты саптаськонлэсь уте, кырсь куен соос медаз кулэ но соос пӧлысь Мынэсьтым улон интыме медаз сапталэ».

³² Та закон гожтэмын мугорысьтыз виянэн висьыса улӥсь пиосмурт пумысен, кидысэз кисьтӥськыса кырсь луэм пиосмурт пумысен,

³³ озьы ик толэзьлы быдэ саптаськонэныз висьыса улӥсь кышномурт пумысен, мугорысьтыз виянэн висьыса улӥсь пиосмурт яке кышномурт пумысен, нош озьы ик саптаськонэз вияса улӥсь кышномуртэн кӧлэм пиосмурт пумысен та закон.