Левит 14 - Библия удмурт кылын

14-тӥ ЛЮКЕТ

¹ Кузё-Инмар Моисейлы тазьы вераз, тазьы шуиз:

² «Тани гижлочерен висись пумысен закон, ку сое чылкытатыны кулэ: сое священник доры ваёзы;

³ священник станлэн сьӧраз потоз но гижлочерен висись мурт гижлочерезлэсь бурмем ни шуыса адӟиз ке,

⁴ соку священник со чылкытатоно мурт понна кык улэп чылкыт тылобурдоосты, кедырпу, горд шорт но иссоп турын басьтыны косоз;

⁵ священник одӥгзэ тылобурдоез горд сюйлэсь лэсьтэм горшок вылын, улэп ву вылын вандыны косоз;

⁶ нош со ачиз улэп тылобурдоез, кедырпуэз, горд шортэз, иссоп турынэз кияз кутоз но улэп ву вылын вандэм тылобурдолэн вир пӧлаз соосты веттоз,

⁷ собере гижлочерлэсь чылкытатӥськись мурт вылэ сизьым пол пазьгоз но со чылкыт ни шуыса ялоз, улэп тылобурдоез бусы вылэ лобӟытоз.

⁸ Чылкытатӥськись мурт дӥськутсэ мед миськоз, вань йырсизэ мед ӵышкоз, вуэн мисьтӥськиз ке, чылкыт луоз; собере стан пушкы пыроз но балаган вӧзаз сизьым нунал улоз;

⁹ сизьыметӥ нуналаз мугорысьтыз вань гонзэ, йырысьтыз йырсизэ, тушсэ, синкаӵсэ, вань гоно интыоссэ мед мычоз, дӥськутсэ, мугорзэ вуэн мед миськоз но соку со чылкыт луоз;

¹⁰ тямысэтӥ нуналаз со басьтоз шектэм-чылкыт [одӥг аресъем] кык такаосты, одӥг аресъем шектэм-чылкыт ыжез, салам няньлы ефалэн куинь дасмос люкетаз тэрымон чабей пызь – со вӧйын сурамын мед луоз – но одӥг лог вӧй;

¹¹ чылкытатӥсь-сузясь священник чылкытатоно-сузяно муртэз таосын ӵош Кузё-Инмар азе, вӧсяськон скинияе пырон азе, султытоз;

¹² янгыше сюрем понна одӥг такаез священник курбон сётыны басьтоз, одӥг лог вӧй но басьтоз, соосты Кузё-Инмар азьын сэзъяса вылэ ӝутоз;

¹³ сьӧлык понна сётӥськись курбон пудоосты, тылын сутӥськись курбон пудоосты вандон интыын, святой интыын, та такаез вандоз, уго та янгыше сюрем понна сётӥськись курбон укша сьӧлык понна сётӥськись курбонлы, со священниклы сюроно люкет – та быдӟым святыня;

¹⁴ соку янгыше сюрем понна сётӥськись курбон пудолэсь вирзэ священник басьтоз но чылкытатӥськись-сузяськись муртлэн бурпал пельдураз поноз, бур киызлэн бадӟым чиньы вылаз, бур пыдызлэн бадӟым чиньы вылаз поноз;

¹⁵ соку священник логысь вӧй басьтоз но аслаз паллян ки вылаз кисьтоз;

¹⁶ священник бур киысьтыз чиньызэ паллян кырымысьтыз вӧй пӧлы веттоз но Кузё-Инмар азьын чиньыысьтыз вӧйын сизьым пол пазьгоз;

¹⁷ нош кырым пыдэсаз кылем вӧйзэ священник чылкытатӥськись-сузяськись муртлэн бур пельызлэн дураз поноз, солэн бур киысьтыз бадӟым чиньы вылаз, бур пыдысьтыз бадӟым чиньыез вылэ поноз, янгыше сюрем понна курбон сётэм пудолэн вирызлэн бервылаз поноз;

¹⁸ нош эшшо кырым пыдэсаз кылем вӧез священник чылкытатӥськись-сузяськись муртлэн йыр вылаз поноз; озьы священник сое Кузё-Инмар азьын чылкытатоз-сузялоз.

¹⁹ Соку священник сьӧлык понна курбон сётоз но чылкытатӥськоно-сузяськоно муртэ кырсезлэсь сузялоз; та бере тылын сутӥськись курбон пудоез вандоз;

²⁰ священник тылын сутӥськись курбонэз, ваем салам нянез курбон сётон ӝӧк вылэ поныса сутоз; священник сое чылкытатоз но, со чылкыт луоз.

²¹ Нош со куанер улӥсь мурт ке, начар улэ ке, соку со янгыше сюрем понна сётӥськись курбонлы одӥг така мед басьтоз сэзъяса вылэ ӝутон понна, озьы со ассэ чылкытатоз, салам няньлы ефалэсь одӥг дасэтӥ люкетсэ тырмытӥсь чабей пызез мед басьтоз, со вӧйын сурамын мед луоз, озьы ик одӥг лог вӧй,

²² кык кыр дыдыкъёсты яке кык пинал гурт дыдыкъёсты, – кӧня солэн киыз вайыны быгатоз, – одӥгзэ тылобурдоез сьӧлык понна курбон сётыны, нош мукетсэ тылын сутӥськись курбон сётыны мед ваёз;

²³ чылкытатӥськонлэн-сузяськонлэн тямысэтӥ нуналаз соосты священник доры, вӧсяськон скинияе пырон доры, Кузё-Инмар азе мед ваёз;

²⁴ янгыше сюрем понна курбонлы ваем такаез, лог тыр вӧез священник кутоз но Кузё-Инмар азе сэзъяса мед ваёз;

²⁵ янгыше сюрем понна курбонлы ваем такаез вандоз, священник янгыше сюрем понна ваем курбон такалэсь вирзэ кутоз но чылкытатӥськись-сузяськись муртлэн бурпал пель дураз поноз, бур киызлэн бадӟым чиньы вылаз, бур пыдызлэн бадӟым чиньы вылаз поноз;

²⁶ соку священник паллян кырымаз вӧй кисьтоз,

²⁷ паллян кырымысьтыз вӧез священник бур киысьтыз чиньыеныз Кузё-Инмар азе сизьым пол пазьгоз;

²⁸ кырым пыдэсысьтыз вӧез священник чылкытатӥськись-сузяськись муртлэн бурпал пель дураз поноз, бур киысьтыз бадӟым чиньы вылаз, бур пыдысьтыз бадӟым чиньы вылаз поноз, – янгыше сюрем понна курбон сётэм пудолэн вирызлэн бервылаз поноз;

²⁹ нош кырым пыдэсаз кылем вӧйзэ священник чылкытатӥськись-сузяськись муртлэн йыр вылаз поноз – Кузё-Инмар азьын сое чылкытатон-сузян понна;

³⁰ кыр дыдыкъёс пӧлысь одӥгзэ яке пинал гурт дыдыкъёс пӧлысь одӥгзэ ваёз, кудзэ чылкытатӥськись-сузяськись муртлэн киыз вайыны быгатоз,

³¹ кудзэс вайыны быгатоз, одӥгзэ тылобурдоез сьӧлык понна курбонлы сётоно, нош мукетсэ салам нянен ӵош тылын сутӥськись курбон кароно; чылкытатоно-сузяно муртэз священник Кузё-Инмар азьын чылкыт кароз.

³² Тани гижлочерен висьыса бурмем начар улӥсь муртлы чылкытатӥськон-сузяськон сямез ортчытон пумысен сётэм закон».

³³ Кузё-Инмар Моисеен Ааронлы тазьы вераз, тазьы шуиз:

³⁴ «Мынам тӥляд киулады сётоно Ханаан музъемам пырем берады киулады сюрем музъемысь коркаос вылэ гижлочерлэсь яразэ лэзи ке,

³⁵ соку коркалэн кузёез священник доры мыныса вераны кулэ: ”Корка бордам кыӵе ке но яра потӥз”.

³⁶ Яраез учкыны пыремезлэсь азьвыл, корка пушкысь вань арбериос но медаз саптаське шуыса, священник корка пушкысь вань тӥрлыкез поттаны косоз; та бере священник лыктоз но коркаез эскероз.

³⁷ Яраез со учкиз-чаклаз но яраё интыын коркалэн борддор бордаз вожпыръем яке гордпыръем гопъёс вань, соос борддоре пыдло пыриллям ни шуыса адӟиз ке,

³⁸ соку священник коркалэн ӧс выжыяз потоз но коркаез сизьым нуналлы пытсалоз.

³⁹ Сизьыметӥ нуналэ священник нош ик лыктоз но, яра борддор кузя вӧлмем шуыса адӟиз ке,

⁴⁰ соку священник коркалэсь яраё изъёссэ бералляса поттыны но, город сьӧры нуыса, кырсь интые куяны косоз;

⁴¹ нош корка пушез быдэссэ мед вуштозы, усьылэм-виям наштам бервылэз, город сьӧры поттыса, кырсь арбериосты куян интые мед кисьтозы;

⁴² бералляса поттэм изъёс интые мукет изъёс мед тырозы, выль дасям наштанэн корка пушез мед нашталозы.

⁴³ Изъёсты бералляса поттэм бере, корка пушез вуштыса выль наштанэн наштам бере нош яра потӥз но аляны кутскиз ке,

⁴⁴ соку священник лыктыса учкоз-чаклалоз но, яра корка пушкы вӧлмем ке, со курыт гижлочерлэн корка бордысь тодметэз луэ, соку со корка кырсь шуыса лыдъяськоз;

⁴⁵ та коркаез сэрттыны кулэ, вань изъёссэ, наштам бервылэз, пуоссэ, город сьӧры поттыса, кырсь арбериосты куян интые кисьтоно.

⁴⁶ Ворсам корка котькыӵе но дыре пырась мурт ӝытозь кырсь шуыса лыдъяськоз;

⁴⁷ кин со коркан кӧлӥз, со дӥськутсэ мед миськоз [ӝытозь со мурт кырсь шуыса лыдъяськоз]; кин со коркан сиськиз, со мурт дӥськутсэ миськыны кулэ [ӝытозь со мурт кырсь шуыса лыдъяськоз].

⁴⁸ Нош священник лыктыса корка пушез наштам бере яра корка пушкы вӧлмымтэ ни шуыса адӟиз ке, соку священник та корка чылкыт шуыса ялоз, малы ке шуоно яра бырем.

⁴⁹ Соку со коркаез чылкыт карон понна кык тылобурдо басьтоз, кутоз кедырпу пис, горд шорт но иссоп турын,

⁵⁰ одӥгзэ тылобурдоез горд сюй сосуд вылын, улэп ву вылын вандоз;

⁵¹ соку со кедырпу писэз, иссоп турынэз, горд шортэз басьтоз, улэп тылобурдоез кияз кутоз но соосты вандэм тылобурдолэн вир пӧлаз, улэп ву пушкы веттоз, корка пушез сизьым пол соин пазьгоз;

⁵² корка пушез тылобурдолэн вирыныз, улэп вуэн, улэп тылобурдоен, кедырпуэн, иссоп турынэн, горд сӥньысэн сузялоз,

⁵³ собере, город сьӧры бусые поттыса, улэп тылобурдоез эрике лэзёз; коркаез сузялоз, со чылкыт луоз».

⁵⁴ Тани гижлочерлэн котькыӵе но яраосыз, парша висён пумысен сётэм закон,

⁵⁵ дӥськут бордысь, корка бордысь гижлочер пумысен, пыктосъёс, карсъёс, виштыос пумысен сётэм закон, –

⁵⁶ табере вераны мед быгатод: ку та кырсь, ку та чылкыт. Тани та гижлочер пумысен сётӥськем закон.