Левит 11 - Библия удмурт кылын

11-тӥ ЛЮКЕТ

¹ Соку Кузё-Инмар Моисеен Ааронлы тазьы вераз, тазьы шуиз:

² «Израиль пиослы вералэ: ”Тани музъем вылысь вань пудоос пӧлысь таӵеоссэ тӥледлы сиыны яра:

³ вайяськем гижыё ке, гижыосаз мур кыретэз вань ке, сыскиськыса сиське ке, со пудоез сие,

⁴ сыскиськыса улэ ке но, нош гижыосыз кыклы люкиськемын ӧвӧл – верблюд со, солэсь сӥльзэ эн сие, тӥ понна со кырсь пудо мед луоз;

⁵ тушканчикез но эн сие, со сыскиське ке но, солэн кыклы люкиськем гижыосыз ӧвӧл, тӥ понна со кырсь маке мед луоз;

⁶ лудкечез но эн сие, со сыскиське ке но, солэн кыклы люкиськем гижыосыз ӧвӧл, тӥ понна со кырсь маке мед луоз;

⁷ парсез но эн сие, гижыосыз кыклы висъяськемын, гижыосаз мур кыретэз вань ке но, нош со уг сыскиськы, соин ик со тӥ понна кырсь мед луоз;

⁸ соослэсь сӥльзэс эн сие, шӧйзы борды киыныды эн йӧтӥське; кырсесь соос тӥ понна.

⁹ Вуын улӥсь вань улэп макеос пӧлысь сие ваньзэ, кудъёсызлэн бурдъёссы вань, сьӧмзы вань – зарезьын-а, шурын-а уло – таӵеоссэ сие;

¹⁰ нош вуын вань уясьёс пӧлысь, вуын вань улӥсьёс пӧлысь, кудъёсызлэн бурдъёссы, сьӧмзы ӧвӧл – зарезьын-а, шурын-а уло соос – ваньзы таӵеос юрӟымесь тӥледлы мед луозы.

¹¹ Тӥ понна соос юрӟымесь мед луозы: соослэсь сӥльзэс эн сие, шӧйёссылэсь юрдэ.

¹² Вуын улӥсь бурдтэм, сьӧмтэм улэп макеос ваньзы тӥледлы юрӟым мед потозы.

¹³ Тылобурдоос пӧлысь таосызлэсь юрдэ – сӥльзэс эн сие, юрӟымесь соос: ӧрӟиез, грифез, зарезь ӧрӟиез,

¹⁴ пиякушез, пӧйшурась ӧрӟиез но солэсь выжыоссэ,

¹⁵ пӧртэм пумо куакаосты,

¹⁶ страусэз, кучыранэз, чарланэз, душесэз но солэсь выжыоссэ;

¹⁷ пелёкучыранэз, бакланэз, ибисэз,

¹⁸ юсез, пеликанэз, ванемез,

¹⁹ каксяез, туриез – солэсь выжыоссэ, варышез, урткыӵез.

²⁰ Вань нюж кыстӥськыса ветлӥсьёс, бурдоос, ньыль пыд вылазы ветлӥсьёс тӥледлы юрӟым мед потозы;

²¹ вань нюж кыстӥськыса ветлӥсьёс, бурдоос, ньыль пыд вылазы ветлӥсьёс пӧлысь сиыны яра сыӵеоссэ гинэ, кудъёсызлэн кукъёссы мугорзылэн вылӥяз ӝутскыса уло музъем вылтӥ тэтчаса ветлон понна.

²² Таӵеос пӧлысь сиыны яра: саранчаез но солы укшась выжыез, соламез но солы укшась выжыез, харголэз но солы укшась выжыез, хагабез но солы укшась выжыез.

²³ Ваньмыз мукетыз нюж кыстӥськыса ветлӥсьёс, бурдоос, кудъёсызлэн ньыль пыдзы вань, тӥледлы юрӟым мед потозы;

²⁴ соос борды йӧтӥськиды ке, тӥ саптаськоды: кин соослэн шӧйзы борды йӧтӥськиз ке, со мурт ӝытозьлы кырсь шуыса лыдъяськоз.

²⁵ Кин соослэсь шӧйзэс кияз кутоз, со мурт дӥськутсэ миськыны кулэ, со ӝытозь кырсь шуыса лыдъяськоз.

²⁶ Гижыоссы кыклы люкиськемын ке, нош отын мур кыретэз ӧвӧл ке, уг сыскиськы ке, вань сыӵе пудоос тӥледлы кырсь мед луозы: кин ке со борды йӧтӥськиз ке, [ӝытозьлы] кырсь луоз.

²⁷ Вань ньыль пыдо, пӧйшуръёс пӧлысь лапа вылазы лёгиськыса ветлӥсь пӧйшуръёс тӥледлы кырсь мед луозы: кин ке соослэн шӧйзы борды йӧтӥськиз ке, со мурт ӝытозь кырсь шуыса лыдъяськоз;

²⁸ соослэсь шӧйзэс кин ке кияз кутӥз ке, со мурт дӥськутсэ миськыны кулэ, ӝытозьлы со кырсь шуыса лыдъяськоз: соос тӥ понна кырсесь.

²⁹ Тани музъем вылтӥ нюж кыстӥськыса ветлӥсьёс пӧлысь кинэ тӥ кырсь шуыса лыдъяны кулэ: мудӥсь шырез, шырез, кенӟалиез – аслыз укшась выжыосын ӵош,

³⁰ анакаез, хамелеонэз, летааез, хометэз но тиншеметэз –

³¹ вань нюж кыстӥськыса ветлӥсьёс пӧлысь таосыз тӥледлы кырсь мед луозы: кин таослэн шӧйзы борды йӧтӥськиз ке, ӝытозь со мурт кырсь шуыса лыдъяськоз.

³² Таос пӧлысь кудзылэн ке но шӧйзы кыӵе ке пулэсь лэсьтэм сосуд вылэ яке дӥськут вылэ, яке ку вылэ, яке пуйы вылэ, уже кутӥськись кудӥз ке но арбери вылэ усиз ке, соос кырсесь луозы: соосты вуэ пононо, ӝытозь соос кырсесь шуыса лыдъяськозы, бӧрысь – чылкытэсь луозы;

³³ таос пӧлысь кудзылэн ке но шӧйзы горд сюйлэсь лэсьтэм сосудэ усиз ке, маиз отын вал, со кырсь луоз, ассэ [сосудэз] пильыса куштэ.

³⁴ Та сосудын возиськем ву сиыны ярамон сиён вылэ усиз ке, соку со сиён [тӥ понна] кырсь луоз, та сосудысь котькыӵе юонъёс но кырсесь луозы.

³⁵ Таослэн шӧйзылэн люкетэз маке вылэ усиз ке, со кырсь луоз; гурез, учогез кырсьлы луыса куашкатоно, соос тӥ понна кырсесь шуыса мед лыдъяськозы;

³⁶ ошмес но вуэз люкан понна лэсьтэм гудӟем гинэ чылкытэсь кылё; нош кин шӧй борды йӧтӥське, со кырсь луэ.

³⁷ Таослэн шӧйзылэн куд ке но люкетыз кыӵе ке но кизёно кидыс вылэ усиз ке, со чылкыт;

³⁸ нош вуэн киськам кидыс вылэ таослэн шӧйзылэн кыӵе ке но люкетэз усиз ке, со тӥ понна кырсь мед луоз.

³⁹ Тӥляд сиёно пудоды пӧлысь кудӥз ке кулӥз ке, солэн шӧй бордаз йӧтӥськем мурт ӝытозьлы кырсь луоз;

⁴⁰ кин ке солэсь шӧйзэ сииз ке, со мурт дӥськутсэ миськыны кулэ, ӝытозь со кырсь шуыса лыдъяськоз; кин ке солэсь шӧйзэ нуыса поттӥз ке, со мурт дӥськутсэ миськыны кулэ, ӝытозь со кырсь шуыса лыдъяськоз.

⁴¹ Музъем вылтӥ нюж кыстӥськыса ветлӥсьёс ваньзы тӥледлы юрӟымесь мед потозы, соосты сиыны уг яра;

⁴² кӧт вылазы ветлӥсьёсты, ньыль пыд вылазы яке солэсь но тросгес пыд вылазы нюж кыстӥськыса ветлӥсьёсты эн сие, уго соос юрӟымесь;

⁴³ лулдэс эн сапталэ нюж кыстӥськыса ветлӥсьёсын, соосын асьтэдыз эн сапталэ, соос пыр кырсесь медад луэ,

⁴⁴ уго Мон – Кузё-Инмар, тӥляд Инмарды, дун-чылкытэсь луэ, дун-чылкыт улэ, уго Мон [Кузё-Инмар, тӥляд Инмарды] дун-чылкыт; асьтэлэсь лулдэс эн сапталэ музъем вылтӥ нюж кыстӥськыса ветлӥсь улэп макеен,

⁴⁵ уго Мон – Кузё-Инмар, тӥледлы Инмар луон понна Египет музъемысь тӥледыз поттӥсь. Озьыен, дун-чылкытэсь луэ, уго Мон дун-чылкыт.

⁴⁶ Тани пудоос, тылобурдоос, вуын улӥсь вань улэп макеос, музъем вылтӥ нюж кыстӥськыса ветлӥсь вань улэп макеос пумысен сётэм закон,

⁴⁷ та законъя тӥ кырсез чылкытлэсь, сиыны лэзем пудоез сиыны лэзьымтэ пудолэсь, пӧйшурлэсь тодманы-висъяны мед быгатоды”».