Исаия 1 - Библия удмурт кылын

1-тӥ ЛЮКЕТ

¹ Та – Амослэн Исаия пиезлэн Иудеяен Иерусалим сярысь адӟонэз. Со вал Иудей эксэйёслэн Озиялэн, Иоафамлэн, Ахазлэн, Езекиялэн кивалтон нуналъёсазы.

² Инъёс, кылзэ! Музъем, кылзӥськы! Кузё-Инмар шуэ: «Мон вордӥ, быдэ вуттӥ пиосме, нош соос мыным пумит бугырскизы.

³ Ош аслэсьтыз кузёзэ тодэ, ишак кузёезлэсь турын тыронзэ тодма, нош Израиль [Монэ] уг тоды, Мынам калыке уг вала».

⁴ Э, сьӧлыко калык, законлы пумит улонэн азэм калык, сьӧсь муртъёслэн выжызы, быроно нылпи! Кузё-Инмарез кельтӥзы, Израильлэсь Дун-Сьӧлыктэмзэ кулэтэм каризы, – мыдлане кошкизы.

⁵ Вогъяськыса улӥсьёс, кытчыяды тӥледыз тышкано на? Йырды быдэсак гижлоӟемын, сюлэмды быдэсак катьтэммемын.

⁶ Пыдтышкысеныз кутскыса йыртышкозяз висисьтэм интыез ӧвӧл: гижлоос, шуккиськем бервылъёс, урӟектэм яраос – соос сузямтэ, биньылымтэ, вӧйын небӟытылымтэ.

⁷ Музъемды тырттэм кельтэмын, городъёсты тылын сутэмын, син азяды бусыостэс муртъёс сиё; тушмон ортчем бервыл кадь ваньмыз тырттэм кылемын.

⁸ Сӥон ныл виноград садысь тылыс кадь, бакчаысь балаган кадь, тушмонэн котыртэм город кадь огназ кылемын.

⁹ Саваоф Кузё-Инмар асьме пӧлы пичи ке но люкет ӧй ке кельтысал, соку асьмеос Содом кадь ик луысалмы, Гоморралы укшасалмы.

¹⁰ Содомысь кивалтӥсьёс, Кузё-Инмарлэсь верамзэ кылзӥське! Гоморраысь калык, асьмелэн Инмармылэсь законзэ санэ понэ!

¹¹ Тӥляд трос курбонъёсты Мыным кулэ кожаськоды-а?! – шуэ Кузё-Инмар. – Мон тыр луэмын ни ыжъёсты виро сётонэныды, куайытэм пудодылэн кӧйыныз; кунянъёслэн но, ыжпиослэн но, кечъёслэн но вирзы Мыным кулэ ӧвӧл.

¹² Мынам син азям возьматскыны лыктыкуды, кин тӥледыз куре Мынэсьтым азбаръёсме лёганы?

¹³ Саламъёстэс-кузьымъёстэс эн ни нуллэ. Ӵын поттонды Мыным синазькыль потэ; выль толэзь праздникъёстэс, субботаез сӥлы карыса улэмдэс, шулдыръяськонлы люкаськемъёстэс адӟеме уг поты: праздник лэсьтӥськоды, нош асьтэос законлы пумит улӥськоды.

¹⁴ Выль толэзез сӥлы каронъёстэс но, праздникъёстэс но Мынам лулы синазькыль каре: соос Мон понна секыт ныпъет луо, секыт Мыным соосты нуыны.

¹⁵ Тӥ киостэс ӝутыса улыку, Мон синъёсме тӥ азьысь ворсасько; нош тӥ котькӧня вӧсяськиды ке но, Мон уг кылы, уго тӥляд киосты вирен пачылмемын.

¹⁶ Мисьтӥське, чылкытатӥське. Мынам син азям урод ужъёс лэсьтэмысь дугдэ, уродэз-лекез бордысьтыды палэнтэ.

¹⁷ Ӟеч уж лэсьтыны дышетске, шонер улыны тырше; ултӥям-сантэмам муртлы дурбасьтэ, анайтэм-атайтэм нылпилы юрттэ, палкышнолэн палаз пыре.

¹⁸ Чале, дорам лыктэлэ, учкоме-эскероме, – шуэ Кузё-Инмар. – Сьӧлыкъёсын нап-горд ке но луиды, тӥледыз лымы кадь тӧдьы каро; горд басма кадь ке но луиды, тӥледыз тӧдьы ыжгон кадь югыт каро.

¹⁹ Мылыныды-кыдыныды Мынэсьтым кылзӥськыса улӥды ке, музъемлэсь ӟеч емышъёссэ сиёды;

²⁰ нош куштӥськиды но вогъяськыса улӥды ке, лэчыт пурт тӥледыз сиёз, уго та Кузё-Инмарлэн верам кылъёсыз.

²¹ Шонерлыкен тырмем, оскиськымон шоркар кызьы пӧрмиз азыса-калгыса улӥсь кышномуртлы!? Шонерлык отын улэ вал, нош табере – адями виылӥсьёс.

²² Тынад азвесед ӝуам кортлы пӧрмиз, винаед ву пырыса сӧриськиз.

²³ Тынад кивалтӥсьёсыд законлы пумит йыруж лэсьтыса уло, адями таласьёслы соос эшъёс луо; ваньзы соос мед-кузьым октыны ярато, ваньбур люкет сьӧры уйылӥсько; анайтэк-атайтэк кылем нылпилы дур уг басьто, палкышнолэсь шуге-леке сюремзэ но тодэмзы уг поты.

²⁴ Соин ик Кузё-Инмар, Израильлэн Кужымез, Саваоф Кузё-Инмар шуэ: «О, Мыным пумит улӥсьёс пыр Мон буйгатско – со тушмонъёсылы пунэмзэ берыктӥ ке!

²⁵ Тон вылэ нош ик киме поно, пень вуын кадь сураськем-пожаськем пырыостэ вылысьтыд сузяло, бордысьтыд вань узвесьёстэ люко-висъяло.

²⁶ Азьло кадесь ик судьяосты тон доры пуктыло, кутсконаз кадесь ик визь-кенеш сётӥсьёсты ваё; соку тон сярысь вералозы: ”Шонер улонлэн городэз, оскиськымон шоркар”».

²⁷ Сӥон шонер судэн мозмытэмын луоз, оскон пала берытскем нылпиосыз шонер улонэн утемын луозы.

²⁸ Нош вань куштӥськем-палэнскемъёс, сьӧлыкоос доры бырон лыктоз, Кузё-Инмарлэсь куштӥськыса кошкемъёс быдтэмын луозы.

²⁹ Тыпы сурдъёсты сӥлы карыса улэмды понна возьытэ вуттэмын луоды, асьтэлы (йыбыртъяны) быръем садъёсты-куакъёсты понна сӥтэм-сантэм каремын луоды.

³⁰ Уго тӥ куартэк кылем тыпы кадесь луоды, вулы ёрмыса улӥсь сад кадь луоды.

³¹ Кужмо мурт кужлы пӧрмоз, ужзэ тыл басьтоз – огазьын ӝуалозы, но нокин но уз кысы.