Иона 1 - Библия удмурт кылын

1-тӥ ЛЮКЕТ

¹ Амафийлэн Иона пиезлы Кузё-Инмар дорысь верамын вал:

² «Султы но мын Ниневияе – бадӟым городэ, отын тодытыса ул, уго солэн лек ужъёсыз Мон доры вуизы ни».

³ Иона султӥз Кузё-Инмарлэн син азьысьтыз Фарсисэ пегӟон понна; Иоппияе вуиз, отысь Фарсисэ мынӥсь кораблез шедьтӥз; сюрес дун тыриз но пушказ пыриз – Кузё-Инмарлэн син азьысьтыз соин Фарсисэ уяса кошкон понна.

⁴ Нош Кузё-Инмар зарезь вылэ кужмо тӧл поттӥз, зарезь вылын туж кужмо сильтӧл ӝутӥськиз, корабль пазьгиськыны дась вал ини.

⁵ Пыжен валтӥсьёс туж кышкатскизы, котькудӥз аслаз инмарезлы сюлворыса вӧсяськыны кутскиз; пыжзэс капчигес карон понна нуоно арбериоссэс зарезе куяны кутскизы. Нош Иона пыжлэн улӥяз васькыса выдӥз, юн-юн умме усиз.

⁶ Корабльлэн кузёйырыз со доры лыктыса шуиз: «Малы тон изиськод? Султы но аслад Инмаредлы вазиськы, оло нош Инмар асьмемыз тодаз ваёз, соку асьмеос ӧй бырысалмы».

⁷ Ог-огзылы шуизы: «Ойдолэ, пус чӧлтоме, соку тодомы, кин понна та курадӟон асьме доры вуиз». Пус чӧлтӥзы но пус Иона вылэ усиз.

⁸ Соку солы шуизы: «Вера милемлы, кинэн сэрен та курадӟон ми доры вуиз? Маин тон ужаськод-выриськод? Кытысен, кытчы мынӥськод? Кытын тынад дор музъемед, кыӵе калык пӧлысь тон?»

⁹ Со соослы шуиз: «Мон – еврей, зарезез но музъемез кылдытӥсь инмысь Инмарез Кузё-Инмарез сӥлы карыса улӥсько».

¹⁰ Та адямиос туж куалектӥзы но солы шуизы: «Мар понна тон тазьы лэсьтӥд?» Уго со ачиз соослы ялӥз но, соос тодӥзы, со Кузё-Инмарлэн син азьысьтыз пегӟе шуыса.

¹¹ Соку соос солы шуизы: «Зарезь чус мед кариськоз шуыса, милемлы тонэн мар кароно?» Зарезь бугыръяськемысь-тулкымъяськемысь дугдымтэен сэрен

¹² со соослы шуиз: «Кутэ монэ но зарезь вуэ куштэ, – тӥ понна зарезь чус кариськоз; мон тодӥсько уго, монэн сэрен тӥ доры та шимес сильтӧл вуиз шуыса».

¹³ Нош та адямиос вань кужымзэс поныса полысаны кутскизы музъем борды шедьытскон понна, но ӧз быгатэ, малы ке шуоно зарезь соослы пумит ялан бугыръяськыса-тулкымъяськыса улӥз.

¹⁴ Соку соос Кузё-Инмарлы вазиськыса шуизы: «Кузё-Инмар, тыныд вӧсяськиськомы, та адямилэн лулыз понна ми медам быре вал, янгыштэм муртлэн вирыз понна милемлы сьӧлык эн гожты вал, уго Тон, Кузё-Инмар, лэсьтӥд сое, мар Тыныд кулэ вал».

¹⁵ Ионаез кутӥзы но зарезе куштӥзы; йыркуръяськемысь дугдыса, зарезь чус кариськиз.

¹⁶ Та адямиос Кузё-Инмарлэсь туж юн курдазы, Кузё-Инмарлы курбон сётӥзы, сӥзиськизы.