Иоиль 2 - Библия удмурт кылын

2-тӥ ЛЮКЕТ

¹ Сӥонын пеллян гумыосын шудэ, Мынам святой гурезям гумы пелляса, кышкытлык сярысь тодытэ; быдэс музъем вылысь калыкъёс мед куалекъялозы, – Кузё-Инмарлэн нуналыз вуэ, со матын ини –

² тём-тём пеймыт, пилемо, бусо нунал; ӵук ӟардон кадь гурезьёс кузя кужмо, трос лыдо калык вӧлме, таӵеез дунне кылдон дырысен ӧй на вал, уз но луы выжыосысь выжыосы.

³ Солэн азьтӥз тыл сутыса мынэ, нош бертӥз гомась тыл ӵушка; солэн азьысьтыз музъем Едем сад выллем, нош бераз тырттэм кылем кыр музъем луоз, нокин но солэсь утиськыны уз быгаты.

⁴ Солэн вылтусыз валъёслы укша, вал вылын пукисьёс кадь соос вортто;

⁵ гурезьёс йылтӥ вортто ожмаськон уробоослэн дыбыртэмзы кадь, куроез сутӥсь гомась тыллэн шатыртэмез кадь, ожмаськыны султытэм кужмо калык кадь.

⁶ Сое адӟизы ке, калыкъёс куалекъяны кутскозы, ымныръёссы кӧдэктозы.

⁷ Соос нюръяськисьёс кадь бызё, кышкасьтэм ожгарчиос кадь изкарлэн борддор йылаз тубо но котькудӥз ас сюрес кузяз мынэ, сюрес вылысьтыз уг кожылы.

⁸ Огзэс огзы уг лёгало, котькудӥз мынэ ас сюрес кузяз, шибоды вылэ усё, но соослы номыр но уг луы.

⁹ Город кузя бызьыло, борддоръёс йылэ ӝутско, коркаос йылэ тубо, лушкаськись кадь укноостӥ пыро.

¹⁰ Соос азьын музъем зуркалоз, инбам куалекъялоз, шундыен толэзь пеймытомозы, кизилиослэн но югытсы быроз.

¹¹ Аслаз ожгарчиосызлы Кузё-Инмар куаразэ поттоз, уго туж трос кузя соос, Солэсь кылзэ быдэстӥсь туж кужмо; Кузё-Инмарлэн нуналыз быдӟым но укыр кышкыт, кин сое чиданы быгатоз?

¹² Али но шуэ Кузё-Инмар: «Визяса, бӧрдыса, викышъяса чылкыт сюлмыныды Мон пала берытске».

¹³ Сюлэмъёстэс кесялэ, дӥськуттэс эн, Инмарды Кузё-Инмар пала берытске; уго Со ӟеч, гажась-жалясь, кема чидась, Солэн гажан-жалянэз бадӟым, Аслэсьтыз лэзем шугадӟонъёссэ Со воштэ.

¹⁴ Кин тодэ, оло, жалялоз Со, бакель каронзэ уз палэнты, Инмардылы Кузё-Инмарлы ваем нянь курбондэс, кисьтэм курбон-саламдэс кабыл басьтоз?

¹⁵ Сӥонын пеллян гумыосын шудэ, визяны кутске, огазе люкаськон сярысь ялэ.

¹⁶ Калыкез люкалэ, кенеш ортчытэ, пересьёсты ӧте, егит пиосты, нонӥсь нуныосты огазе люкалэ; четлыкысьтыз-юртысьтыз эмеспи мед потоз, вылькен чылкыт, чебер юртысьтыз мед лыктоз.

¹⁷ Храмлэн бӧльмыен курбон сётонлэн висказ мед бӧрдозы священникъёс, Кузё-Инмарлэн ужась-тыршисьёсыз, мед шуозы: «Кузё-Инмаре, жаля Аслэсьтыд калыктэ, сантэман киулэ эн сёты Аслэсьтыд люкеттэ, соосты мукет калыкъёс ултӥяса медаз ни возе! Калыкъёс пӧлын малы тазьы шуыны кулэ: ”Кытын соослэн Инмарзы?”»

¹⁸ Соку Кузё-Инмарлэн Ас музъемзэ яратонэз ӝуатскоз но Аслэсьтыз калыксэ жалялоз-утёз.

¹⁹ Ответ сётыса, Ас калыкезлы Кузё-Инмар шуоз: «Тани, Мон тӥледлы нянь, вина, вӧй сёто, соин кӧттэс тырыса улоды, азьланяз мукет калыкъёслэн киулазы сантэманы уг ни сёты тӥледыз.

²⁰ Уйпалась лыктэмез тӥ дорысь вутэм, тырттэм музъеме улляло, азьпал уллёзэ ысто шундыӝужанпал зарезе, мышказ лыктӥсьсэ – шундыпуксёнпал зарезе; со бордысь шимес зын, юрӟым зын ӝутӥськоз, уго укыр трос урод ужъёс лэсьтӥз».

²¹ Музъем, эн кышка: шумпот, шулдыръяськы, уго Кузё-Инмар быдӟым, Со тае лэсьтыны быгатэ.

²² Пудо-животъёс, эн кышкалэ, кыр дуннее турын потоз, писпу емыш сётоз; смоквапу, виноградпуд асьсэлэсь кужымзэс возьматозы.

²³ Тӥ но, Сӥонлэн нылпиосыз, шумпотэ, шулдыръяське Инмарды Кузё-Инмар бордын; уго Со тӥледлы кӧня кулэ, сомында зор сётоз; азьвыл кадь ик вазь лыктӥсьсэ но, бер лыктӥсьсэ но зорез сётылоз.

²⁴ Итымъёсыз нянен тырмозы, виноград мульы нюртон интыосыз виноград сокен но вӧен пачылмозы.

²⁵ Тӥ вылэ лэзем туж бадӟым войское – саранча, нумыръёс, бӧчыос-дургалиос, гоно нумыр – будосъёстэс сием аръёс понна, Мон тӥледлы пунэмзэ берыкто.

²⁶ Кӧтты тырытозь сиёды, тыр улоды, Инмардылэсь Кузё-Инмарлэсь нимзэ данъялоды, Со тӥледын паймымон ужъёс лэсьтӥз; пумтэм вапумъёс ӵоже калыке возьытэ уз вуы.

²⁷ Соку тӥ тододы, Мон Израиль пушкын, Мон – тӥляд Инмарды Кузё-Инмар шуыса, мукетыз ӧвӧл, Мынам калыке пумтэм вапумъёс ӵоже возьытлык пӧлын уз улы.

²⁸ Собере тазьы луоз: Аслэсьтым Духме вань адямиос вылэ кисьто. Соку тӥляд пиосты, тӥляд нылъёсты Инмарлэсь кылзэ ивортылозы; пересьёсты уйвӧтъёс адӟылозы, егит пиосты адӟонъёс адӟылозы.

²⁹ Ляльчи пиос вылэ но, ляльчи нылъёс вылэ но со нуналъёсы Аслэсьтым Духме кисьто.

³⁰ Паймымон тодметъёс инмын но, музъем вылын но возьмато: вир, тыл, ӵын юбоос.

³¹ Кузё-Инмарлэн быдӟым но кышкыт нуналэзлэн вуэмезлэсь азьло шунды пеймытомоз, нош толэзь – вир кадь гордэктоз.

³² Тазьы луоз: котькудӥз Кузё-Инмарлэн нимызлы тэльмырыса вазиськись мурт утемын луоз; уго Сӥон гурезьын, Иерусалимын соослы утиськон луоз, кызьы шуиз Кузё-Инмар, улэп кылемъёс пӧлысь Кузё-Инмарлэн ӧтёно муртъёсызлы но.