Иоанн 1 - Библия удмурт кылын

1-тӥ ЛЮКЕТ

¹ Кутсконаз ик Кыл вал. Кыл Инмар дорын вал. Кыл Инмар вал.

² Со кутсконаз ик Инмар дорын вал.

³ Мар кылдыны кутскиз, ваньмыз Со пыр кылдыны кутскиз, Сотэк номыр но кылдыны ӧз кутскы.

⁴ Со бордын улон, улон адямиослэн югытсы луэ.

⁵ Югыт пеймытын пиштыса улэ, пеймыт сое ӝокатыны уг быгаты.

⁶ Инмарлэн лэзем адямиез вал: солэн нимыз Иоанн.

⁷ Со пыр ваньмыз мед оскозы шуыса, со шара ивортыны лыктӥз, Югыт сярысь ивортыны.

⁸ Со Югыт ӧй вал, но со Югыт сярысь шара ивортыны ыстэмын вал.

⁹ Вал зэмос Югыт, Кудӥз дуннее лыктэ но котькудзэ адямиез югдытэ.

¹⁰ Дуннеын вал, дунне Со пыр кылдыны кутскиз, дунне Сое ӧз тодма.

¹¹ Аслазъёс доры лыктӥз, но аслазъёсыз Сое кулэ ӧз каре.

¹² Нош ваньмыз, кинъёс Сое кабыл басьтӥзы, Солэн нимызлы оскисьёслы, Инмар нылпиос луыны кужым сётӥз.

¹³ Соос вирлэсь ӧвӧл, мугорлэн кулэ каремезлэсь ӧвӧл, пиосмуртлэн кулэ каремезлэсь ӧвӧл, – соос Инмарлэсь вордӥськизы.

¹⁴ Кыл мугоро луиз, дэлетэн но зэмлыкен тыр луыса, милемын валче улӥз. Ми Солэсь пиштӥсь данлыксэ адӟимы, Атайлэсь огназ вордӥськем Пиезлэсь пиштӥсь данлыксэ.

¹⁵ Иоанн Со сярысь шара ивортӥз но бадӟым куараен вераз: «Таиз Со вал, Кудӥз сярысь мон шуи: ”Мон бӧрсьы Лыктӥсь мынам азям луиз, малы ке шуоно мынэсьтым азьло вал”».

¹⁶ Солэн тыр луэмысьтыз, ми ваньнамы дэлет вылэ дэлет басьтӥмы.

¹⁷ Закон Моисей пыр сётэмын, нош дэлет но зэмлык Иисус Христос пыр луэмын.

¹⁸ Инмарез нокин но, ноку но ӧз адӟы; Атаезлэн пушказ улыса, одӥгназ гинэ вордӥськем Пи, Со возьматӥз-тодытӥз.

¹⁹ Иудейёс Иерусалимысь священникъёсты, левитъёсты Иоаннлэсь «кин тон?» шуыса юаны ыстэм бере Иоанн шара ивортӥз.

²⁰ Со ялӥз, ӧз палэнтӥськы, «мон Христос ӧвӧл» шуыса ялӥз.

²¹ Но солэсь юазы: «Мар бен? Тон Илия-а?» Со шуиз: «Ӧвӧл». – «Пророк?» Со шуиз: «Ӧвӧл».

²² Солы шуизы: «Кин-о бен тон? Милемыз ыстӥсьёслы ответ сётон понна мар вералод тон ас сярысьтыд?»

²³ Со шуиз: «Мон кыр дуннеын кеськисьлэн куараез: ”Кузё-Инмарлы сюресэз шонертэлэ”, кызьы Исаия пророк вераз».

²⁴ Ыстэм муртъёс фарисейёс пӧлысь вал,

²⁵ солэсь юазы: «Христос но, Илия но, пророк но тон ӧвӧл ке, малы тон пылатӥськод?»

²⁶ Иоанн соослы ответ сётыса шуиз: «Мон вуын пылатӥсько; но тӥ пӧлын сылэ Со, Кудзэ тӥ уд тодӥське.

²⁷ Со мон бӧрсьы Лыктӥсь, но Со мынам азьпалам луиз. Солэн пыдкутчанэзлэсь езэ пертчыны но мон ярамон адями ӧвӧл».

²⁸ Та вераськон ортчиз Иоаннлэн пылатон интыяз, Иордан вӧзысь Вифавараын.

²⁹ Мукетаз нуналэ Иоанн, ас дораз лыктӥсь Иисусэз адӟыса, шуиз: «Тани Инмарлэн Ыжпиез, Со Ас вылаз дуннелэсь сьӧлыксэ басьтэ.

³⁰ Та – Со, Кудӥз сярысь мон верай: ”Мон бӧрсьы Пимурт лыктэ. Со мынам азьпалам луиз, малы ке шуоно Со мынэсьтым азьвыл вал”.

³¹ Мон Сое ӧй тоды; Со Израильлы тодмо мед луоз шуыса, мон вуын пылатыны лыктӥ».

³² Иоанн шара ивортӥз: «Духлэсь Инмысь дыдык выллем васькемзэ адӟи, Со Со вылын улӥз.

³³ Мон Сое ӧй тоды; нош монэ вуын пылатыны Ыстӥсь мыным шуиз: ”Кин вылэ Духлэсь васькемзэ но Со вылын улэмзэ адӟид ке, Со ик луэ Святой Духен Пылатӥсь”.

³⁴ Мон адӟи но, Та Инмар Пи луэ шуыса, шара ивортӥ».

³⁵ Мукет нуналэ Иоанн нош ик отын аслаз кык дышетскисьёсыныз сылӥз.

³⁶ Тапалтӥ ортчись Иисусэз адӟыса шуиз: «Тани Инмарлэн Ыжпиез».

³⁷ Солэсь та кылъёссэ кылыса, кыкез но дышетскисьёсыз Иисус сьӧры кошкизы.

³⁸ Иисус берытскиз но, лыктӥсьёсты адӟыса, соослы шуиз: «Мар тӥледлы кулэ?» Соос Солы шуизы: «Равви, – кудӥз ”дышетӥсь” шуэм луэ, – кытын улӥськод?»

³⁹ Соослы шуиз: «Ойдолэ, адӟоды». Соос мынӥзы, адӟизы, кытын Со улэ, со нуналэз Со дорын ортчытӥзы. Ог дас час котыр вал.

⁴⁰ Иоаннлэсь Иисус сярысь верамзэ кылэмъёс но Со сьӧры кык ӵошен мынӥсьёс пӧлысь одӥгез Симон Петрлэн Андрей выныз вал.

⁴¹ Ваньмызлэсь азьло со аслэсьтыз Симон агайзэ утчаса шедьтӥз но солы вераз: «Ми Мессияез шедьтӥмы, кудӥз ”Христос” шуэм луэ».

⁴² Сое Иисус доры вайиз. Иисус со шоры учкыса шуиз: «Тон – Симон, Ионалэн пиез; тон Кифа шуыса нимаськод, кудӥз ”из” (Петр) шуэм луэ».

⁴³ Мукетаз нунал Иисус Галилеяе мыноно кариськиз. Филиппез шедьтэм бераз солы шуиз: «Мон сьӧры мын».

⁴⁴ Филипп Вифсаидаысь вал, Андреен но Петрен одӥг городысь.

⁴⁵ Филипп Нафанаилэз шедьтэм бераз солы шуиз: «Ми шедьтӥмы Сое, Кин сярысь Моисей законын но пророкъёс гожъязы – Назаретысь Иосифлэсь пизэ, Иисусэз».

⁴⁶ Нош Нафанаил солы шуиз: «Назаретысь мар ке но ӟечез луыны быгатоз-а?» Филипп солы шуиз: «Мын но учкы».

⁴⁷ Со доры лыктӥсь Нафанаилэз адӟыса, Иисус со сярысь шуиз: «Тани зэмос Израиль адями, солэн кескич сямыз ӧвӧл».

⁴⁸ Нафанаил Солы шуиз: «Кызьы Тон монэ тодӥськод?» Иисус солы ответ сётыса шуиз: «Тонэ Филипп ӧтемлэсь азьло ик смоквапу улысен Мон тонэ адӟи».

⁴⁹ Нафанаил Солы ответ сётӥз: «Равви! Тон – Инмар Пи, Тон – Израильлэн Эксэез».

⁵⁰ Иисус солы ответ сётыса шуиз: «Тон соин оскиськод, малы ке шуоно Мон тыныд шуи: ”Мон тонэ смоквапу улысь адӟи”; талэсь бадӟымзэ адӟод».

⁵¹ Иисус солы шуиз: «Зэм ик, зэм ик тӥледлы верасько: табере Инлэсь усьтӥськемзэ но Адями Пи доры лэзиськись, ӝутӥськись Инмар Кылчинъёсты адӟоды».