Есфирь 6 - Библия удмурт кылын

6-тӥ ЛЮКЕТ

¹ Та уе [Кузё-Инмар] эксэйлы умме усён ӧз сёты, [медозэ] со нунал ӵоже ортчем ужъёсты гожъян книгаез вайыны косӥз; сое эксэй азьын лыдӟизы,

² отысь таӵе гожтэмез шедьтӥзы, кызьы Мардохей Гавафаен Фарра вылэ, кык эксэй евнухъёс, ӧс выжыез возьмасьёс вылэ, урттылӥськиз, малы ке шуоно соос малпало вал Артаксеркс эксэез виыны.

³ Эксэй шуиз: «Кыӵе сӥен-данэн, вылӥ дунэн дунъямын вал Мардохейлэн ужез?» Эксэйлэн бордаз ужась-тыршись медоосыз шуизы: «Солы номыр сыӵе-таӵе ӟечъёс сётэмын ӧй вал».

⁴ [Эксэй Мардохейлэн ӟеч ужъёсыз сярысь юалляськыку, азбаре Аман пыриз,] соку эксэй шуиз: «Азбарын кин вань?» Нош Аман соку эксэй юртлэн кыр пал азбараз Мардохеез писпуэ ошон пумысен эксэен вераськыны лыктэмын вал, ошыны писпу со дасяз ини.

⁵ Пинал пиос эксэйлы шуизы: «Тани, Аман азбарын сылэ». Эксэй шуиз: «Мед пыроз».

⁶ Аман пыриз. Эксэй солы шуиз: «Эксэйлэн данлыкен пусъёно муртэзлы мар меда кароно?» Аманлэн сюлмаз малпан кылдӥз: «Монэ сяна, кыӵе муртэ эксэйлэн сӥё-дано каремез потоз на?»

⁷ Соку Аман эксэйлы шуиз: «Кинэ эксэйлэн сӥё-дано каремез потэ,

⁸ со муртлы эксэйлэсь дӥсяно дӥськутсэ мед ваёзы, эксэйлэсь ветлоно валзэ мед ваёзы, солэн йыраз эксэй изьы мед понозы,

⁹ дӥськутэз но, валэз но эксэйлэн кивалтӥсьёсыз пӧлысь тужгес матысь муртэзлы мед сётозы, эксэйлэн сӥё-дано карем потоно муртэз вылэ дӥськутэз мед дӥсялозы но, вал вылэ пуктыса, городлэн падвожаз мед поттозы, со азьын мед ялозы: ”Эксэйлэн сӥё-дано кароно муртэзлы тазьы лэсьтӥське!”»

¹⁰ Эксэй Аманлы шуиз: «[Умой тон верад;] али ик эксэй дӥсянэз басьты но, эксэй капка дорын пукись иудей пи Мардохей доры мыныса, со вылэ дӥся, Мардохеез вал вылэ пукты; верам кылъёсыд пӧлысь огзэ но быдэстытэк эн кельты».

¹¹ Аман дӥськут басьтӥз, валэз кутӥз но Мардохей вылэ эксэй дӥськут дӥсяз, сое вал вылэ пуктӥз но городлэн падвожаз поттӥз, отысен Мардохей азьын тазьы ялӥз: «Эксэйлэн сӥё-дано кароно муртэзлы тазьы лэсьтӥське!»

¹² Собере Мардохей эксэй капка доры берытскиз, нош Аман, ӝоже усьыса, йырзэ шобыртыса, гуртаз дыртыса кошкиз.

¹³ Мар соин луиз, Аман Зерешь кышноезлы, вань эшъёсызлы ваньзэ вераз. Солэн визьнодо муртъёсыз, Зерешь кышноез шуизы: «Мардохей иудей выжыысь ке, кинэн сэрен тон пограны ӧдъяд, сое тон уд вормы, нош тон солэн азяз ачид усёд, [уго соин ӵош улэп Инмар]».

¹⁴ Соос вераськыса пуко на вал, эксэйлэн евнухъёсыз лыктӥзы но Аманэз Есфирьлэн дасям юоназ дыртытӥзы.