Есфирь 5 - Библия удмурт кылын

5-тӥ ЛЮКЕТ

¹ Есфирь куинетӥ нуналаз [вӧсяськемысь дугдӥз, ӝожлыкен улон дӥськутсэ вылысьтыз кылиз но] эксэй кышно кадь дӥсяськиз; [туж чебер луиз, ваньзэ Адӟись Инмарлы, Утисьлы вӧсяськыса вазиськиз но кык медо нылъёссэ сьӧраз басьтӥз: огез вылэ пыкиськыса, кужымез-кынарез бырем мурт кадь, мынӥз, нош мукетыз со бӧрсьы мынӥз, солэн дӥськутэзлэсь кузь сӧзызэ ки вылаз нуиз. Аслаз чебереныз со туж синмаськымон вал, ымнырыз шумпотӥсь, яратонэн пачылмем кадь со адӟиське вал, нош сюлмыз кышканэн ӝикамын вал]. Эксэй юртлэн пуш азбараз, эксэй корка азе со султӥз; со виын эксэй аслаз эксэй пукон вылаз эксэй коркан пукиз, корка пыронлэн пырак ваче пумитаз [аслэсьтыз бадӟымлыксэ возьматӥсь дӥськутэныз, котыр зарни, дуно изъёс бордаз шедьытъямын, туж кышкыт тусо адӟиськиз]. Эксэй азбарын сылӥсь Есфирез, эксэй кышноез, адӟиз, солы со синмаськиз. [Данлыкен пиштӥсь ымнырзэ ӝутӥз но туж лек тусын шораз учкиз; соку эксэй кышнолэн мылкыдыз усиз, лябӟеменыз ымнырыз кӧдэктӥз, келяса ветлӥсь медо нылызлэн йыр бордаз пыкиськиз. Эксэйлэсь мылкыдзэ Инмар воштӥз, зӥбыт-востэм кариз, соку со дыртыса эксэй пукон вылысьтыз султӥз но, Есфирьлы каньылгес луытозь, сое кутыса возиз. Собере эксэй сое небыт кылъёсын буйгатӥз, солы шуиз: «Есфирь, мар тонэн луиз? Мон – тынад братэд! Юнматскы! Уд кулы, милям косонмы огшоры калыклы гожтэмын, лык матам».]

² Эксэй киысьтыз кивалтон зарни бодызэ Есфирь пала мычиз, соку Есфирь, матаз лыктыса, эксэй бодылэн йылаз йӧтӥськиз, [соку эксэй Есфирьлэн чырты вылаз зарни эксэй бодызэ понӥз, Есфирез чупам бераз шуиз: «Вера мыным». Есфирь шуиз: «Кузё, мон учки но, мынам азям Инмарлэн Кылчинэз кадь тон мыным потӥд. Тынад данлыкед азьын сюлмы кышкаса куалектӥз, уго тон, кузё, паймымон, ымнырыд дэлето луэмын». Но вераськон куспазы Есфирь лябомыса пограз; эксэй куалектӥз, солэн вань медоосыз Есфирез буйгатыны выризы].

³ Эксэй Есфирьлы шуиз: «Мар тыныд кулэ, Есфирь, эксэй кышно? Тынад мынэсьтым кыӵе куронэд вань? Ӝыны эксэйлыке но тыныд сётэмын луоз».

⁴ Есфирь шуиз: «[Туннэ мон понна праздник нунал:] эксэйлы ярано ке, эксэй Аманэн ӵош солы дасям юондырам мед лыктоз».

⁵ Эксэй шуиз: «Есфирьлэн верам кылызъя мед луоз, Аманэз ӧтьыны ӝоггес мынэ». Есфирьлэн дасям юоназ эксэй Аманэн ӵош лыктӥз.

⁶ Вина юыку, эксэй Есфирьлы шуиз: «Кыӵе мылкыд каронэд, кыӵе куронэд тынад вань? Со быдэстэмын луоз. Ӝыны эксэйлык ке но курид, куронэд быдэстэмын луоз».

⁷ Ответ сётыса, Есфирь шуиз: «Тани мынам мылкыд каронэ, мынам куронэ:

⁸ Эксэйлэн син азяз мон ярамон луи ке, мынэсьтым куронме быдэстыны эксэйлэн мылкыдыз вань ке, эксэй [ӵуказе нош ик] соослы дасям юонам Аманэн ӵош мед лыктоз, ӵуказе мон эксэйлэсь кылзэ быдэсто».

⁹ Аман со нуналэ шулдыр, капчи мылкыдын потӥз. Эксэй капка дорын пукись Мардохеез со адӟиз, нош Мардохей Аманэз адӟыса ӧз султы, интыысьтыз но ӧз вырӟы. Соку Аманлэн Мардохейлы туж йырыз кур луиз.

¹⁰ Но Аман чидатскиз. Нош дораз бертэм бераз со эшъёссэ, Зерешь нимо кышнозэ ӧтьыны лэзиз.

¹¹ Аман соослы вераз лыдъянтэм трос ваньбурез сярысь, туж трос пиосыз сярысь, кызьы но кызьы сое эксэй вылэ но вылэ ӝутӥз, кызьы сое мукет кивалтӥсьёслэсь, эксэй медоослэсь со вылӥегес ӝутӥз.

¹² Аман шуиз: «Эксэй кышно но, Есфирь, аслаз дасям юондыраз эксэен ӵош, монэ сяна, нокинэ мукетсэ ӧз ӧтьы. Ӵуказелы но мон эксэен ӵош со доры ӧтемын.

¹³ Иудей пиез, Мардохеез, эксэй капка дорын адӟисько ке, ваньмыз та мыным тырмыт ӧвӧл на».

¹⁴ Зерешь кышноез но, вань эшъёсыз но солы шуизы: «Витьтон гырпум ӝужда писпу мед дасялозы, ӵукна эксэйлы вера, со борды Мардохеез мед ошозы, нош собере шулдыр мылкыдын эксэен ӵош юонэ мын». Та веран Аманлы кельшиз, со писпу дасяз.