Екклесиаст 1 - Библия удмурт кылын

1-тӥ ЛЮКЕТ

¹ Иерусалимысь эксэйлэн, Давидлэн пиезлэн, Екклесиастлэн, верам кылъёсыз.

² Алекъяськон – юнме дыр быдтон, алекъяськон – юнме кужым быдтон, – шуиз Екклесиаст, – алекъяськонэн алекъяськон, – ваньмыз юнме алекъяськон гинэ!

³ Адямилы быдэс даурзэ шунды улын вань ужам ужъёсызлэсь мар пайдаез?

⁴ Одӥгез выжы ортче-кошке но, мукетыз выжы лыктэ, нош музъем пумтэм вапумъёс улэ.

⁵ Шунды ӝужа, шунды пуксе но аслаз потон-ӝужан интыяз дыртэ.

⁶ Лымшор пала тӧл пельтэ, собере уйпала выже, мынон сяменыз берга-берга но нош ик аслаз интыяз ик берытске.

⁷ Вань шуръёс зарезе бызё, нош зарезь таки уг пачылмы: шур вуос бызё но нош ик асьсэлэн потон интыязы берытско выльысен бызьыны кутскон вылысь.

⁸ Вань ужъёс жадьыто: адями ваньзэ вераса но уз быдты; синлэн учкыса кӧтыз уз тыры, пель кылзӥськыса тыр уг луы.

⁹ Мар вал, со ик луоз; мар азьвыл лэсьтӥськиз, со ик лэсьтӥськоз, – номыр но вылез ӧвӧл шунды улын.

¹⁰ Луэ сыӵеез но, кудӥз сярысь шуо: «Учкы, тани таиз выль»; нош со асьмелэсь азьвыл улэм дауръёсын вал ини.

¹¹ Ортчемез-кошкемез сярысь тодэ уг ваё ни; соос бере лыктоноос сярысь но соос бере улоно адямиос тодазы уз вае ни.

¹² Мон, Екклесиаст, Иерусалимын Израильлэн эксэез луыса пуки;

¹³ инбам улын мар лэсьтӥське – ваньзэ сое визьлыкен эскеронлы, чакланлы мон аслэсьтым сюлэмме сётӥ. Та секыт ужез Инмар адями пиослы сётӥз, соос соин мед вырозы шуыса.

¹⁴ Шунды улын кыӵе ужъёс лэсьтӥсько, мон соосты ваньзэ адӟи, но ваньмыз со – алекъяськон – юнме дыр быдтон, духлэн-луллэн курадӟон-куректонэз!

¹⁵ Кырыжлэн шонер кариськемез уг луы, нош мар ӧвӧл, – сое лыдъяны уг луы.

¹⁶ Ас сюлмыным мон тазьы вераськи: «Иерусалимын мынэсьтым азьвыл кузёяськисьёслэсь мон ваньмызлэсь вылӥегес ӝутски, уногес визьлык люкай, мынам сюлэмы трос визьлык, тодон-валан шедьтӥз».

¹⁷ Мон аслам сюлмыным визьлыкез утчаны-тодыны тырши, визьтэмъяськонэз, укылтэм луонэз адӟыны-тодыны малпай; тодӥ: та но духлэн-луллэн юнме курадӟон-куректонэз гинэ луэ вылэм;

¹⁸ малы ке шуоно трос тодон-валан бордысь трос куректон-кайгу потэ, кин тодон-валанзэ йылэтэ – со куректон-кайгузэ будэтэ.