2 Фессалоникаын улӥсьёслы 3 - Библия удмурт кылын

3-тӥ ЛЮКЕТ

¹ Эшшо таӵе веранэ вань на: агай-вынъёсы, ми понна вӧсяське. Тӥ дорын кадь ик Кузё-Инмарлэн Ӟеч Иворез мукет интыосы но ӝог мед вӧлмоз, данэ мед потоз.

² Сӧриськем, кескич адямиослэсь мозмытскыны ми мед быгатысалмы шуыса, ми понна вӧсяське. Ваньмызлэн осконэз ӧвӧл уго.

³ Но Кузё-Инмар оскиськымон, Со тӥледыз юнматоз, шайтанлэсь утёз.

⁴ Кузё-Инмар бордын ми тӥледлы оскиськомы, ми оскиськиськомы: тӥ быдэсъяськоды, быдэсъялоды но сое, мае лэсьтыны ми тӥледыз куриськомы-косӥськомы.

⁵ Кузё-Инмар тӥлесьтыд сюлэмдэс Инмарез яратон пала, Христослэн чиданэз пала мед берыктоз.

⁶ Агай-вынъёсы, Кузё-Инмармылэн Иисус Христослэн нимыныз тӥледыз куриськомы-косӥськомы азьтэмъяськыса, милесьтым дышетэммес кабыл басьтытэк улӥсь адямиослэсь палэнскыны.

⁷ Асьтэос тодӥськоды, кызьы тӥ милесьтым адӟем карыса улыны кулэ. Ми тӥ дорын ур-вар поттыса ӧм улэ уго.

⁸ Нокинлэсь но так шоры няньзэ ӧм сие, ужаса улӥмы. Уй но нунал пӧсятозямы ужамы, акылляськытэк улыны тыршимы.

⁹ Соосты курыны милям правомы ӧвӧлысь ӧвӧл со, милесьтым адӟем карыны тӥледлы пример сётон понна со.

¹⁰ Уго, куке ми тӥ дорын вал, тӥледыз тазьы улыны дышетӥмы: «Кин уг ужа, со уг сиы».

¹¹ Ми кылӥмы, кызьы тӥ пӧлысь куд-огъёсыз азьтэмъяськыса уло, номыр но кулэзэ уг лэсьто, пайдатэм ужъёсын выро.

¹² Таӵеосты Кузё-Инмармылэн Иисус Христослэн нимыныз куриськомы, косӥськомы, соос зӥбыт-востэм мед ужалозы но ужаса поттэм няненызы кӧтсэс мед тырозы шуыса.

¹³ Нош тӥ, агай-вынъёсы, ӟеч уж лэсьтэмысь эн дугдылэ.

¹⁴ Кин ке тӥледлы ыстэм гожтэтысь милесьтым верам кылмес ӧз ке кылзӥськы, сое синйылтыса возе. Возьытэз валатон понна соин кусып эн возе.

¹⁵ Но тӥ сое тушмон шуыса эн лыдъялэ, агай-вындэс музэн визьмалэ-нодъялэ сое.

¹⁶ Тупаса улон вайись Кузё-Инмар тӥледлы котьку но, котькытын но Ачиз каньыллык мед сётоз. Кузё-Инмар ваньмыныды тӥледын огазьын мед улоз!

¹⁷ Котькуд ыстэм гожтэтэлэсь ӟечкылан люкетсэ мон, Павел, ас киыным гожтыса, тазьы йылпумъясько:

¹⁸ Кузё-Инмармылэн Иисус Христослэн дэлетэз тӥ бордын, ваньды бордын мед улоз. Аминь.