2 Фессалоникаын улӥсьёслы 2 - Библия удмурт кылын

2-тӥ ЛЮКЕТ

¹ Агай-вынъёсы, Кузё-Инмармылэн Иисус Христослэн лыктонэз но асьмелэн Соин огазе кариськонмы пумысен тӥледыз туж куриськомы:

² Куалектыса визьдэс эн ыштэ, дух пыр, кыл пыр, ыстэм гожтэт пыр но визьдэс медаз тугалэ, – со гожтэтэз, пе, ми ыстӥськеммы, Христослэн нуналыз вуэ ни шуыса, пе, отын гожтэмын.

³ Нокин но нокызьы но тӥледыз медаз пӧя: уго со нунал вуэмлэсь азьло адямиос Инмарлэсь куштӥськозы. Соку сьӧлыклэн адямиез, быронлэн пиез ассэ шара возьматоз –

⁴ пумитъяськись, ассэ ваньмызлэсь вылӥе пуктоз, адямиослэсь Инмар яке святыня шуонзылэсь но ассэ вылӥе пуктоз. Со Инмарлэн храмаз пуксёз но ассэ Инмар шуыса ялоз.

⁵ Уд ни тодӥське-а, эшшо тӥ дорын улыкум, та сярысь тӥледлы вералляй?

⁶ Табере тӥ тодӥськоды, мар сое калык пӧлы потыны уг на лэзьы.

⁷ Уго али ик ини законлы пумит улон лушкемен ужа ини, но мар луоно, со уз луы со дырозь – пӧлысьтызы кутыса возись басьтӥськытозь.

⁸ Соку законлы пумит улӥсь калык азе потоз, нош Кузё-Инмар Иисус, шораз шокчыса, сое виёз, Аслаз лыктонэныз сое пыраклы быдтоз.

⁹ Законлы пумит улӥсьлы лыктыны шайтан юрттоз. Олокыӵе но кужмоесь, паймымон тодметъёс, пӧяськон пыр паймымон ужъёс лэсьтэмын луозы.

¹⁰ Быронэ мынӥсьёс олокыӵе но шонертэм улонъёслэн визез суран-пожаназы сюрозы – утён вайись зэмлыкез яратонлэсь куштӥськемзы понна.

¹¹ Соин сэрен Инмар соослы йыромон уж лэзёз, соин ик соос ӧрекчаськонлы оскыны кутскозы.

¹² Зэмлыклы оскымтэос, шонертэм улонэз яратӥсьёс – ваньзы судить каремын луозы.

¹³ Нош ми, Кузё-Инмарен яратэм агай-вынъёсмы, тӥ понна ялан Инмарлы тау карыны кулэ, малы ке шуоно кутсконысеныз ик Дух пыр дун-сьӧлыктэм карыса, зэмлыклы оскон пыр Инмар тӥледыз утиськон басьтон понна бырйиз.

¹⁴ Милям Ӟеч Иворез тодытонмы пыр Кузё-Инмармылэн Иисус Христослэн пиштӥсь данлыказ пыриськыны Со тӥледыз ӧтиз уго.

¹⁵ Озьыен, агай-вынъёсы, юн сылэ, кылынымы вераса, ыстэм гожтэтъёсмы пыр дышетэммы бордын зол кырмиськыса улэ.

¹⁶ Нош табере Ачиз Кузё-Инмармы Иисус Христос но асьмемыз яратӥсь Инмар Атаймы, Аслаз гажан-жалянэныз пумтэм вапумъёслы буйгатскон но оскиськон сётӥсь,

¹⁷ сюлэмъёстэс мед каньылатоз, ӟеч кыл вераны, ӟеч уж лэсьтыны тӥледыз мед юнматоз.