1 Фессалоникаын улӥсьёслы 5 - Библия удмурт кылын

5-тӥ ЛЮКЕТ

¹ Та дыръёслэн, вапумъёслэн вуонзы сярысь тӥледлы гожъяны, агай-вынъёсы, кулэлыкез ӧвӧл.

² Уго тӥ асьтэос ӟеч тодӥськоды: возьмамтэ дыръя, уйин лушкаськись кадь, озьы Кузё-Инмарлэн нуналыз лыктоз.

³ Куке вераны кутскозы: «тупаса улон, кышкатэк улон», соку шӧдтэк шорысь, кызьы нуны вайись кышномурт доры ӝог вуэ курадӟон, озьы ик соос доры бырон вуоз. Нокин но ватӥськыны уз быгаты.

⁴ Но тӥ, агай-вынъёсы, пеймыт азьын уд улӥське, соин ик нунал тӥледыз, лушкаськись кадь, шӧдтэк шорысь уз куты.

⁵ Уго ваньды тӥ югытлэн, нуналлэн нылпиосыз; асьмеос уйлэн, пеймытлэн нылпиосыз ӧвӧл.

⁶ Ойдолэ, мукетъёс кадь ум изе, сэзь-сэзь кариськоме, сазь уломе.

⁷ Изисьёс уйин изё, кудӟытозь юисьёс уйин кудӟытозязы юо.

⁸ Нош асьмеос, нуналлэн нылпиосыз, сазь уломе, осконлэсь, яратонлэсь корт дӥсьсэс дӥсяломе, утиськон понна оскиськонлэсь корт изьызэ изьыяломе.

⁹ Инмар асьмеды вожпотон улын возён понна ӧз бырйы, Кузё-Инмармы Иисус Христос пыр утиськон басьтон понна Со асьмеды бырйиз.

¹⁰ Христос асьме понна кулӥз, – сэзь улӥськомы-а яке кулон уммен изиськомы-а – Соин валче пырак ӵоже мед уломы шуыса, Со асьмеды бырйиз.

¹¹ Соин ик, кызьы тӥ али лэсьтӥськоды, азьланяз но ог-огдылэсь мылкыддэс ӝутэ, ог-огдэс юнматэ.

¹² Агай-вынъёсмы, тӥ дорын вань кужымзэ поныса ужасьёсты, Кузё-Инмарлэн черкеныз кивалтӥсьёсты, кинъёс тӥледлы визь-нод сёто, дышето, соосты тӥ дунъялэ.

¹³ Соослэн та ужзы понна соосты мур гажаса сӥё-дано каре. Куспады тупаса улэ.

¹⁴ Агай-вынъёсы, ми тӥледыз куриськомы: азьтэмъёсты визьмалэ, усем мылкыдын улӥсьёслэсь мылкыдзэс ӝутэ, начаръёслы юрттӥське. Котькытын, котьма ласянь чидасесь луэ.

¹⁵ Чаклаське, нокин но нокинлы но уродэзлы пумит уродэн пунэмзэ медаз берыктылы. Ог-огдылы, вань калыклы котьку но ӟеч лэсьтыны тырше.

¹⁶ Ялан шумпотонэн улэ.

¹⁷ Дугдылытэк вӧсяське.

¹⁸ Ваньмыз понна Инмарлы тау каре: уго Инмар тӥлесьтыд, Иисус Христос бордын улӥсьёслэсь, тазьы улэмдэс возьма.

¹⁹ Духез эн кысэ.

²⁰ Инмарлэсь дэлето кузьымзэ, кудӥз луэ Солэсь кылзэ ивортон, кулэтэм эн каре.

²¹ Ваньзэ чаклалэ-эскере, ӟечез бордын кутӥськыса улэ.

²² Нош вань уродлэсь-леклэсь палэнске.

²³ Ачиз тупаса улонлэн Инмарез тӥледыз быдэсак дун-сьӧлыктэм мед кароз. Тӥляд духты, лулды, мугорды Кузё-Инмармылэн Иисус Христослэн лыктыкузлы дун-шектэм луыса мед возиськоз.

²⁴ Оскиськымон тӥледыз Ӧтись, Со ваньзэ тае лэсьтоз.

²⁵ Агай-вынъёс, ми понна вӧсяське!

²⁶ Святой чупанэн чупаса вань вӧсяськись агай-вынъёсты ӟечкылалэ.

²⁷ Кузё-Инмарлэн нимыныз тӥледыз сюлворыса курисько: та ыстэм гожтэтэз вань агай-вынъёслы лыдӟелэ.

²⁸ Кузё-Инмармылэн Иисус Христослэн дэлетэз тӥ бордын мед улоз. Аминь.