1 Фессалоникаын улӥсьёслы 4 - Библия удмурт кылын

4-тӥ ЛЮКЕТ

¹ Агай-вынъёсы, тӥ ми пыр тодӥды, кызьы улыны кулэ Инмарлы ярамон луон понна. Тӥледыз Иисус Христослэн нимыныз куриськомы, сюлвориськомы: азьланяз тазьы улыны эшшо но золгес тырше.

² Тӥ тодӥськоды уго, Кузё-Инмарлэсь Иисуслэсь кыӵеесь курон-косонъёссэ ми тӥледлы сётӥмы.

³ Инмар тӥлесьтыд дун-сьӧлыктэм луэмдэс возьма. Азыса-калгыса улонлэсь куштӥське.

⁴ Тӥ ваньды асьтэлэсь сосуддэс дун-чылкыт, дун-шектэм утьыны-возьыны мед быгатоды.

⁵ Инмарез тодӥсьтэм язычникъёс кадь мугорлэн юрӟым куронъёсыныз ӝуатскыса эн улэ.

⁶ Асьтэлы пайда басьтыны турттыса, ас браттылы пумит номыр но эн лэсьтэ: малы ке шуоно та понна Кузё-Инмар пунэмзэ берыктэ. Со сярысь ми тӥледлы азьвыл ик верамы, шара ивортылӥмы.

⁷ Уго Инмар асьмемыз сьӧлыкъёс лэсьтыса улыны ӧз ӧтьы, дун-сьӧлыктэм улонэн улыны Со ӧтиз.

⁸ Озьыен, та куронъёсты кулэтэм карись мурт, адямиез кулэтэм уг кары, со Инмарез кулэтэм каре, Кудӥз тӥледлы Аслэсьтыз Святой Духсэ сётэ.

⁹ Агай-вынъёсты яратон сярысь тӥледлы гожъянэз ик ӧвӧл, уго тӥледыз Ачиз Инмар ог-огдэс яратыны дышетӥз.

¹⁰ Быдэс Македонияысь агай-вынъёсты тӥ яратӥськоды. Агай-вынъёсмы, тӥледыз эшшо но золгес яратыса улыны куриськомы.

¹¹ Сюлмысьтыды тырше зӥбыт-востэм улыны, ас уждэс тодэ, ас киыныды ужаса кӧттыр поттэ, кызьы ми тӥледлы азьвыл ик индылонъёс сётӥмы.

¹² Соку Инмарлы оскымтэос тӥлесьтыд улэмдэс адӟем карыны кутскозы, номырлы но ёрмыса-ӟудыса уд улэ.

¹³ Агай-вынъёсы, кулэмъёс пумысен мынам тӥледыз тодытытэк кельтэме уг поты. Оскиськонзы луымтэ мукет муртъёс кадь тӥ медад куректэ-кайгыре.

¹⁴ Уго асьмеос Иисуслэн кулэмезлы но улӟыса султэмезлы оскиськомы бере, соку Иисуслы осконэн кулон умме усемъёсты но Инмар Соин ӵош ваёз шуыса оскыны кулэ.

¹⁵ Кузё-Инмарлэсь верам кылзэ ми тӥледлы вераськомы: асьмеос, улэпъёс, Кузё-Инмарлэн лыктонэз дырозь улоно муртъёс, кулэмъёслэн азьпалазы ум потэ.

¹⁶ Уго косон куара потоз но, соку архангеллэн куараез, Инмарлэн гумы куараез кылӥськыку, Ачиз Кузё-Инмар Инмысь васькоз. Соку нырысь ик Христослы оскыса кулэмъёс кулэмысь улӟыса султозы.

¹⁷ Табере асьмеос но, улэп кылемъёс, соосын валче омырысен Кузё-Инмарез пумитан понна пилемъёс вылын ӝутэмын луомы. Собере вань вапумъёс ӵоже Кузё-Инмарен огазьын уломы.

¹⁸ Та кылъёсын ог-огдылэсь мылкыддэс ӝутэ.