1 Фессалоникаын улӥсьёслы 3 - Библия удмурт кылын

3-тӥ ЛЮКЕТ

¹ Соин ик чиданмы бырем бере Афиные ми огнамы кылёно кариськимы.

² Соку ми тӥ доры асьмелэсь агай-вынмес Тимофеез ыстӥмы – Христослэсь Ӟеч Иворзэ тодытонын милемын ӵош Инмар понна ужась-тыршисез. Со тӥледыз мед юнматоз, оскондэс мед кужмоятоз шуыса, сое ыстӥмы.

³ Та куректон-кайгуосын сэрен нокин но медаз ни отчы-татчы шонаськы: тӥ асьтэос тодӥськоды, асьмелы та вылӥысен сётэмын.

⁴ Ми соку но, тӥ доры вуылыкумы, азьвыл ик тӥледлы вераллямы, курадӟонъёс адӟылоно луомы шуыса. Кызьы тӥ тодӥськоды, озьы ик луиз но.

⁵ Соин ик мон но чидатэк ини тӥляд осконды сярысь тодыны Тимофеез ыстӥ, визь сынась кызьы ке но тӥлесьтыд визьдэс медаз сына вал но ужам ужмы юнме медаз луы вал шуыса.

⁶ Нош табере, тани, тӥ дорысь али гинэ Тимофей берытскиз но тӥляд осконды, тӥляд яратонды сярысь умой ивор вайиз. Со вераз, тӥ, пе, милемыз ялан ӟечен тодады вайиськоды, милемыз туж адӟемды потыса улӥськоды, кызьы ми но тӥледыз адӟеммы потыса улӥськомы.

⁷ Ми пӧртэм куректон-кайгуос пӧлын, ёрмыса улӥськомы ке но, агай-вынъёсмы, тӥляд осконды сярысь тодыса, ми буйгатскимы.

⁸ Табере тӥ Кузё-Инмар бордын юн сылӥськоды бере, ми каньылак шокчыны быгатӥськомы ни.

⁹ Тӥ понна Инмарлы кызьы меда ми тау карыны быгатомы? Вань со шумпотонэз милемлы ваемды понна ми Инмармы азьын шумпотэммес вераськомы.

¹⁰ Уй но нунал вань сюлмысьтымы со понна вӧсяськиськомы: тӥледын пумиськыны мед быгатысалмы на, тӥляд осконады маиз уг на тырмы, сое ватсаны мед быгатысалмы на шуыса.

¹¹ Ачиз Инмар, милям Атаймы но милям Кузё-Инмармы Иисус Христос милесьтым тӥ доры сюресмес мед ӵошкатысал.

¹² Нош Кузё-Инмар тӥледлы ог-огдэс, мукетъёссэ но яратонэз пачыл мед кароз, кызьы ми но тӥледыз пумтэм яратӥськомы.

¹³ Кузё-Инмармы Иисус Христос Аслаз вань святойёсыныз валче лыктон нуналэ Инмармы, Атаймы азьын Со тӥлесьтыд сюлэмъёстэс дун-сьӧлыктэм, дун-шектэм карыса мед юнматоз. Аминь.