1 Фессалоникаын улӥсьёслы 2 - Библия удмурт кылын

2-тӥ ЛЮКЕТ

¹ Агай-вынъёсы, тӥ асьтэос тодӥськоды, милям тӥ доры ветлэммы юнме гинэ ӧй вал шуыса.

² Нош талэсь азьвыл, кызьы тӥ тодӥськоды, Филиппы карысен трос курадӟонъёс, ултӥянъёс чидано луимы. Инмармы милемлы юрттӥз чик кышкатэк Инмарлэсь Ӟеч Иворзэ тӥ дорын тодытыны, туж ке но та ужлы пумитъяськизы.

³ Милям дышетонамы ӧрекчаськонэз, кескич малпанэз ӧвӧл, нокинэ но пӧяны ми ум тыршиське.

⁴ Инмарлэн Ӟеч Иворез тодытыны быръем адямиосыз кадь ми вераськомы. Адямиослы ум, Инмарлы яраны тыршыса вераськомы, – милесьтым сюлэмъёсмес чаклась-эскерисьлы.

⁵ Кызьы тӥ тодӥськоды, тӥ азьын ноку но ми чеберъяськыса-пӧяськыса ӧм вераськылэ, асьмелы пайда поттон мылкыдмы но ӧй вал: Инмар адӟись!

⁶ Тӥлесьтыд но, мукетъёслэсь но адямиослэсь милемды данъямзэс ум утчаське:

⁷ Христослэн апостолъёсыз луиськомы бере, ми быгатысалмы тӥлесьтыд троссэ курыны, но ми тӥ пӧлын зӥбыт-востэм улӥмы, – нунызэ нонтӥсь анай кадь, кызьы со лякытэн утялтэ аслэсьтыз нылпиоссэ.

⁸ Ми тӥледыз вань лулынымы-сюлмынымы яратӥмы, соин ик Инмарлэсь Ӟеч Иворзэ гинэ ӧвӧл, асьмелэсь лулмес но тӥледлы сётыны дасесь вал, сокем тӥ милемлы дуноесь-гажаноесь луиды.

⁹ Агай-вынъёсы, тӥ тодӥськоды на милесьтым тыршеммес, жадьытозь-катьтэммытозь ужаммес. Уй но нунал ужамы, тӥледыз нокуддэс но акыльӟытытэк, Инмарлэсь Ӟеч Иворзэ тӥ дорын ми тодытӥмы.

¹⁰ Инмар но, тӥ но адӟисьёс луиськоды, кызьы ми дун-чылкыт, шонер, дун-шектэм тӥ азьын, оскисьёс азьын, асьмеды возимы.

¹¹ Тӥ тодӥськоды уго, кызьы атай аслаз вордэм нылпиосыныз ассэ возе, озьы ик ми но тӥледын ваньмыныды асьмемыз возимы.

¹² Ми тӥледыз куримы, ӝуткамы, сюлворимы, тӥляд улонды Аслаз Эксэйлыказ, пиштӥсь данлыказ ӧтись Инмарлы ярамон мед луоз шуыса.

¹³ Ми дугдылытэк Инмарлы тау кариськомы на со понна но: тӥ, ми пыр Инмар кылэз кылыса, сое кабыл басьтӥды, адями кылэз кадь ӧд, Инмар кылэз кадь сое кабыл басьтӥды, – со зэмзэ ик сыӵе луэ, со тӥ пушкын, оскисьёс пушкын, улэ но ӟеч уж лэсьтэ.

¹⁴ Уго тӥ, агай-вынъёсы, Иудеяысь Христос Иисус бордын улӥсь Инмарлэн черкъёсызлэсь адӟонзэс чидано луиды: кызьы соос ас иудей калыксылэсь, озьы ик тӥ но ас калык выжыостылэсь курадӟытонъёссэс чидано луиды.

¹⁵ Соос виизы Иисусэз Кузё-Инмарез, Солэсь пророкъёссэ, милемды но уллязы; Инмарлы ярамон луыны уг тыршо, вань адямиослы пумитъяськыса уло,

¹⁶ язычникъёслы утиськон сярысь тодытонэз милемлы вераны люкето. Озьы соос асьсэлэсь сьӧлык мертэтсэс эшшо но пачыл каро; табере Инмарлэн вожпотонэз соос вылэ вуиз ни.

¹⁷ Агай-вынъёсы, кӧня ке но дыр тӥледын люкиськыса улӥмы, лулынымы ӧм люкиськылэ, мугорынымы гинэ тӥлесьтыд люкиськыса улӥмы. Со понна тӥледыз туж адӟеммы потыса, тӥлесьтыд мӧзмыса улӥмы.

¹⁸ Соин ик ми, – нош мон, Павел, огпол гинэ ӧвӧл, кык пол но, – тӥ доры лыктыны ӧдъяськомы вал; но милемлы шайтан люкетӥз.

¹⁹ Уго Кузё-Инмармы Иисус Христос азьын, Солэн лыктон дыръяз, тӥ сяна, кин милям оскиськонмы, шумпотонмы, данъяськонмылэн венец изьыез?

²⁰ Тӥ ук милям данъяськонмы, шумпотонмы.