Титлы 2 - Библия удмурт кылын: Вуж Сӥзёнлэн канонэн юнматымтэ люкетъёсыз пыртэмын

2-тӥ ЛЮКЕТ

¹ Нош тон шонер дышетонлэсь куронъёссэ тодыты.

² Дышеты, мӧйы пиосмуртъёс асьсэды кутыны быгатӥсесь, дун-шектэмесь, зӥбытэсь, юн оскисесь, адямиосты яратӥсесь, чидасесь мед луозы шуыса.

³ Мӧйы кышномуртъёслы валэкты, дун-шектэм мед улозы, кыл нуллыса медаз ветлэ, юон пӧлы медаз пыриське, ӟечлы мед дышетозы шуыса.

⁴ Егитъёсты мед визьмалозы кузпалъёссэс, нылпиоссэс яратыны,

⁵ дун-шектэм, чылкыт улыны кулэ шуыса мед дышетозы, семьязы сярысь сюлмаськись, лякыт сямоесь, картъёссылы тэрытскисесь луыны кулэ шуыса мед валэктозы. Соосын сэрен Инмар кыл куаретон-тышкаськон улэ медаз сюры.

⁶ Егит пиосты, дун-чылкыт асьсэды мед возёзы шуыса, визьма.

⁷ Ачид ӟеч ужъёс лэсьтыса, соослы адӟем карон возьматы. Дышетонад ӧрекчаськонэз, сисьмонэ нуисез медаз лу. Ваньмыз дун-шектэм мед луоз.

⁸ Лякыт кылын, янгышъёстэк дышетон уждэ ну. Соку пумитъяськись возьытэ вуттэмын луоз, асьме сярысь номыр но уродзэ вераны уз быгаты.

⁹ Ляльчиос асьсэлэн кузёоссылы котьку но мед тэрытскозы шуыса, соослы валэкты. Ярамонэсь луыны мед тыршозы, каршыса-пумитъяськыса медаз улэ.

¹⁰ Медаз лушкаське, ӟечлыкоесь, оскиськымонэсь мед луозы. Инмарлэн, Утисьмылэн, дышетонэзлы соос данлык вайыса мед улозы.

¹¹ Уго вань адямиос понна Инмарлэн утиськон вайись дэлетэз усьтӥськиз.

¹² Со асьмеды дышетэ сьӧлыклэсь кышкатэк улонлэсь, та дуннелэн куронъёсызлы тэрытскыса улонлэсь куштӥськыны но таяз улон даурын дун-шектэм, шонерлыко, вӧсяськыса улыны,

¹³ шумпотоно оскиськонмылэсь нуналзэ возьманы – быдӟым Инмарлэсь, Утисьмылэсь Иисус Христослэн пиштӥсь данлыкезлэсь адӟиськонзэ.

¹⁴ Со асьме понна Ассэ сётӥз, асьмеды законлы пумит лэсьтэм вань уродлэсь мозмытыны но, дун-чылкыт карыса, Аслыз ӟеч ужъёс лэсьтыны тыршись нимысьтыз калык карон понна.

¹⁵ Та сярысь вера, талы дышеты. Вань кужымдэ поныса, сьӧлыкъёссэс шарае поттылы, нокин но тонэ санэ понытэк медаз улы.