Марк 7 - Библия удмурт кылын: Вуж Сӥзёнлэн канонэн юнматымтэ люкетъёсыз пыртэмын

7-тӥ ЛЮКЕТ

¹ Со котыре Иерусалимысь вуэм фарисейёс но куд-ог книга тодӥсьёс люкаськизы.

² Солэн куд-ог дышетскисьёсызлэсь кырсь, миськымтэ, киынызы нянь сиемзэс адӟизы но пыкылыны кутскизы.

³ Уго фарисейёс, вань иудейёс сямен ик, вашкала пересьёслэсь косэмзэс кылзӥськыса, кизэс чылк-чылк миськытэк нянь уг сиё.

⁴ Базарысь бертэм беразы но мисьтӥськытэк уг сисько. Вань на трос мукетыз, кудзэ соос быдэсъяно кариськизы: тусьтыосты, кружкаосты, пуртыосты, скамьяосты гылтон.

⁵ Собере фарисейёс но книга тодӥсьёс Солэсь юазы: «Малы Тынад дышетскисьёсыд, вашкала пересьёслэсь косэмзэс кылзӥськытэк, миськымтэ киынызы нянь сиё?»

⁶ Соослэн пумитазы Со шуиз: «Тӥ сярысь, чеберъяськисьёс сярысь, азьпалзэ тодытыса, Исаия пророк ӟеч вераз, солэн гожтэмын: ”Кылынызы та муртъёс Монэ сӥлы каро, нош сюлмынызы Мынэсьтым кыдёкын уло.

⁷ Адямиослэн малпам дышетонъёссылы, курон-косонъёссылы дышетыса, Монэ юнме гинэ сӥлы каро”.

⁸ Уго, Инмарлэсь курон-косонъёссэ палэнтыса, тӥ адями косэмез быдэсъян борды басьтӥськиськоды, тусьтыосты, кружкаосты гылтон но трос мукет со выллем ужъёсты лэсьтӥськоды».

⁹ Соослы Иисус шуиз: «Ӟеч-а луоз, Инмарлэсь курон-косонзэ палэнтыса, пельысь пеле вуэм верандэс быдэсъяса улыны?

¹⁰ Моисей вераз ук: ”Атайдэ но, анайдэ но сӥлы кар”, нош ”атайзэ яке анайзэ урод кылын верась мурт кулонэн мед кулоз”.

¹¹ Нош тӥ шуиськоды: ”Кин атаезлы яке анаезлы шуиз ке: ”Тӥледлы сётонозэ мон Инмарлы курбон (кузьым) сётыны сӥзи ни”,

¹² со муртлы аслаз атаезлы яке аслаз анаезлы тӥ уд ни лэзиське номыр но лэсьтыны.

¹³ Асьтэлэн тупатэм сямъёсыныды Инмар кылэз палэнтӥськоды; мукет та выллем ужъёс лэсьтӥськоды».

¹⁴ Вань калыкез котыраз ӧтьыса шуиз: «Ваньды ик Монэ кылзӥське но валатӥське.

¹⁵ Адями пушкы педлось пырем номыр но саптаны уг быгаты сое, нош мар потэ со пушкысь, со сапта адямиез.

¹⁶ Кылыны пельыз вань мурт – мед кылоз!»

¹⁷ Калык пӧлысь корка пырем бераз дышетскисьёсыз Солэсь та мадён сярысь юазы.

¹⁸ Со шуиз: «Тӥ но сыӵе ик валасьтэмесь-а? Оло, уд валаське, ”адями пушкы педлось пырыса номыр но сое саптаны уг быгаты” шуэмез?

¹⁹ Малы ке шуоно со солэн сюлмаз уг пыры, кӧт пушказ пыре; отысь педло потэ, озьы котькыӵе но сиён сузяське».

²⁰ Собере шуиз: «Адями пушкысь потэмез адямиез сапта;

²¹ малы ке шуоно пушкысь, адями сюлэмысь пото уродэсь-лекесь малпанъёс, азон-калгон сьӧлыке пырон, азыса-калгыса улон, адями виылон,

²² лушкаськонъёс, кузьым октон, уродлык, кескич, азыса-калгыса юрӟым улон, кӧтпӧсен улон, Инмарез сантэман, вылтӥяськон, визьтэмъяськон.

²³ Вань та уродлык пушкысь потэ но адямиез сапта».

²⁴ Отысь потыса, Иисус Тирен Сӥдон ёросъёсы лыктӥз; корка пырыса, Солэн нокинэ но Ассэ тодматэмез уг поты вал, но ватӥськемез ӧз луы.

²⁵ Со сярысь одӥг кышномурт кылыса лыктӥз но, Солэн дораз вуыса, азяз пыдесъяськиз – со кышнолэн нылызлэн пушказ пери пуке вылэм.

²⁶ Но со кышномурт язычница вал, Сирофиникия музъемысь вал со. Нылыз пушкысь периез улляса мед поттоз шуыса, со Иисуслэсь куриськиз.

²⁷ Нош Иисус солы шуиз: «Нырысь ик нылпиос кӧтсэс мед тырозы; нылпиослэсь няньзэс басьтыса, пуныослы куштыны ӟеч ӧвӧл ук».

²⁸ Та кышномурт Солэн пумитаз шуиз: «Зэм, озьы, Кузёе; но пуныос но ӝӧк улын нылпиослэсь нянь пырыоссэс сиё ук».

²⁹ Кышномуртлы Со шуиз: «Табере гуртад берт, та кылыд понна нылыд пушкысь пери потӥз ни».

³⁰ Дораз бертыса, со адӟиз: нылыз пушкысь пери потэм, нылыз валесын кылле.

³¹ Иисус Тирен Сӥдон каръёс котырысь кошкиз но, Дас каро музъем пыр потыса, нош ик Галилей зарезь дуре мынӥз.

³² Со доры пельтэм, могаса вераськись муртэ вайизы но, вылаз кизэ мед поноз вал шуыса, Солэсь куризы.

³³ Иисус сое калык пӧлысь палэнэ нуиз, чиньыоссэ солэн пеляз понӥз но сялӟыса кыл бордаз йӧтӥськиз,

³⁴ инме учкиз но лулӟиськыса солы шуиз: «Еффафа», со «усьтӥськы» шуэм луэ.

³⁵ Соку ик солэн пельызлэн кылонэз усьтӥськиз, кылызлэн вераськон могӟетэз быриз но, со чылкыт вераськыны кутскиз.

³⁶ Та сярысь нокинлы но вераны ӧз лэзьы. Но макем Со алӥз, сокем соос шараяса ветлӥзы.

³⁷ Туж паймыса веразы: «Ваньзэ ӟеч каре: пельтэмъёсыз – кылӥсь, кылтэмъёсыз вераськись каре».