Марк 2 - Библия удмурт кылын: Вуж Сӥзёнлэн канонэн юнматымтэ люкетъёсыз пыртэмын

2-тӥ ЛЮКЕТ

¹ Кӧня ке нунал ортчыса, Иисус нош ик Капернауме лыктӥз; тодмо луиз, Со коркан шуыса.

² Со куспын ик трос калык люкаськиз, ӧс дорын но буш инты ӧй вал ини. Иисус соосты дышетыса улӥз.

³ Ньыль ӵошен ӝутыса, Со доры пери шуккем муртэз вайизы.

⁴ Трос калык люкаськемен сэрен Солэн матаз лыктэмзы ӧз луы; коркалэсь липетсэ усьтыса, валесэныз валче пери шуккем муртэ Со доры васькытӥзы.

⁵ Соослэсь оскемзэс адӟыса, Иисус висисьлы шуиз: «Пияш! Тынад сьӧлыкъёсыд куштӥсько».

⁶ Татын пуко вал книга тодӥсьёс пӧлысь куд-огъёсыз, сюлмазы соослэн таӵе малпан вал:

⁷ «Малы Со сокем Инмарез сантэма? Одӥг Инмар сяна, кин сьӧлыкъёсты куштыны быгатэ?»

⁸ Иисус соку ик таослэсь таӵе малпанзэс Ас духеныз тодӥз но соослы шуиз: «Малы тӥ сюлмады сыӵе малпанэн улӥськоды?

⁹ Мар капчигес? Пери шуккем муртлы ”сьӧлыкъёсыд куштӥсько” шуыны-а, яке ”султы, басьты валестэ но ветлы” шуыны-а?

¹⁰ Адями Пилэсь музъем вылын сьӧлыкъёсты куштыны кужым ваньзэ тӥ мед тододы шуыса, – висись муртлы шуиз:

¹¹ «Тыныд верасько: султы, басьты валестэ но гуртад берт».

¹² Со соку ик султӥз, валессэ басьтыса, калык азьтӥ потӥз, ваньзы талы паймизы но Инмарез данъяса шуизы: «Милям таӵеез ноку но адӟылэммы ӧй вал на».

¹³ Иисус нош ик зарезь дуре потӥз; вань калык Со доры мынӥз, Со соосты дышетыса улӥз.

¹⁴ Ортчыкуз, выт бичан дорын пукись Алфей пи Левиез адӟыса, солы шуиз: «Мон сьӧры мын». Соиз султӥз но Со сьӧры кошкиз.

¹⁵ Иисус солэн корказ сиськыса улон дыръя Соин ӵош дышетскисьёсыз, озьы ик выт бичасьёс но сьӧлыкоос огазьын сиськизы; трос кузя соос вал, соос Со сьӧрын ветлӥзы.

¹⁶ Книга тодӥсьёс но фарисейёс, Солэсь выт бичасьёсын, сьӧлыкоосын валче сиськемзэ адӟыса, Солэн дышетскисьёсызлы шуизы: «Кызьы со озьы, выт бичасьёсын, сьӧлыкоосын Со огазьын сие-юэ?»

¹⁷ Тае кылыса, Иисус соослы шуиз: «Висисьтэмъёслы эмъясь кулэ ӧвӧл, висисьёслы кулэ; шонер улӥсьёсты ӧтьыны Мон ӧй лыкты, сьӧлыкоосты ӧпкельыса сьӧлыкъёссылэсь куштӥськонэ ӧтьыны лыктӥ».

¹⁸ Иоаннлэн дышетскисьёсыз но фарисейёслэн дышетскисьёссы визяса улӥзы. Иисус доры лыктыса шуо: «Малы Иоаннлэн но, фарисейёслэн но дышетскисьёссы визяло, нош Тынад дышетскисьёсыд визез уг утё?»

¹⁹ Иисус соослы шуиз: «Эмеспи соос пӧлын улон дыръя сюанчиос быгато-а визяны? Эмеспи соос пӧлын улон дыръя соос визяны уг быгато.

²⁰ Но вуозы нуналъёс, – соос дорысь эмеспи басьтӥськоз, соку, со нуналъёсы, соос визялозы но.

²¹ Нокин но пӧсьтэм дӥськутэз гужатымтэ дэраен уг кышъя, малы ке шуоно выль кышъет вужез бордысь ӟезиськоз, соку пасез уката но уродгес луоз.

²² Выль винаез нокин но вужмем сепысъёсы уг лэзьы, малы ке шуоно выль вина сепысъёсыз кесёз но, соку вина кисьтӥськоз, сепысъёс но арам луозы; выль винаез выль сепысъёсы лэзьыны кулэ».

²³ Одӥгаз суббота нуналэ Солы кизем ю бусы вамен потоно луиз; мынон куспетӥзы Солэн дышетскисьёсыз ю шепъёсты чигылыны кутскизы.

²⁴ Соку фарисейёс Солы шуизы: «Учкы, мар соос суббота нуналэ даурто, – лэсьтыны ярантэм ужез лэсьто?!»

²⁵ Соослы Иисус шуиз: «Давидлэн но соин ӵош луэмъёслэн кӧтсы сюман дыръя Давидлэн ма каремез сярысь ноку но лыдӟемды ӧвӧл шат?

²⁶ Кызьы со Авиафар архиерей дыръя Инмар корка пырем но священникъёслы гинэ сиыны ярано курбон нянез сием, асэныз валче ветлӥсьёслы но сётэм?»

²⁷ Соослы Иисус вераз: «Суббота адями понна, адями суббота понна ӧвӧл;

²⁸ соин ик Адями Пи субботалы но кузё луэ».