Марк 16 - Библия удмурт кылын: Вуж Сӥзёнлэн канонэн юнматымтэ люкетъёсыз пыртэмын

16-тӥ ЛЮКЕТ

¹ Суббота ортчем бере Магдалина Мария, Иаков Мария но Саломия Мугорзэ зыран понна ческыт зыно вӧйёс басьтӥзы.

² Арнялэн нырысетӥ нуналаз вазь ӵукна ик, шунды ӝужаку, шайгу доры лыктӥзы.

³ Соос куспазы вераськизы: «Кин асьмелы шайгу ӧс бордысь изэз палэнтоз?»

⁴ Вылӥе учкизы но адӟизы: из палэнтэмын, нош со из туж бадӟым вал.

⁵ Шайгуэ пырем беразы адӟизы бурпалан пукись тӧдьы дӥсен дӥсяськем пинал пиез; туж куалектӥзы.

⁶ Нош со соослы шуиз: «Эн куалектэ, тӥ Назаретысь корӵогаськем Иисусэз утчаськоды; Со улӟыса султӥз, Со татын ӧвӧл. Тани интыез, кытчы Со понэмын вал.

⁷ Мынэлэ, Солэн дышетскисьёсызлы, Петрлы вералэ. Со тӥляд азяды Галилеяе вуоз. Кызьы Со тӥледлы вераз вал, Сое тӥ отысен адӟоды».

⁸ Шайгуысь потыса, бызьыса кошкизы. Соос туж кышкатскизы, туж куалектӥзы, нокинлы но, номыр но ӧз вералэ. Кышказы уго.

⁹ Арнялэн нырысетӥ нуналаз, улӟыса султэм бераз, Иисус нырысь ик Магдалина Мариялы возьматскиз. Мария пушкысь Со сизьым периосты улляса поттӥз вал.

¹⁰ Мария мынӥз но Соин ӵош ветлӥсьёслы, бӧрдӥсьёслы, викышъясьёслы ивор сётӥз;

¹¹ нош соос «Иисус улэп, мон Сое ачим адӟи» шуэмезлы ӧз оске.

¹² Та бере Иисус кыкезлы дышетскисьёсызлы, сюрес вылтӥ гуртэ мыныкузы, мукет тусын возьматскиз.

¹³ Берен вуэм беразы таос мукетъёсызлы ивортӥзы, нош таослэн верамзылы соос ӧз оске.

¹⁴ Собере, сиськыса кыллён дыръязы, дас одӥгназылы ик Иисус возьматскиз но соосты оскымтэзы, чурыт сюлэмо луэмзы понна, Сое улӟемен адӟем муртъёслы оскымтэзы понна пыкылӥз.

¹⁵ Соослы шуиз: «Мынэлэ быдэс дунне вылэ но вань адямиослы тодытэ Евангелиез.

¹⁶ Оскись мурт, пылатэм мурт утемын луоз, нош кин ӧз оскы, судэ сюремын луоз.

¹⁷ Оскисьёс сьӧрын таӵе тодметъёс ветлозы: Мынам нимыным периосты улляса поттылозы, выль кылъёсын вераськозы,

¹⁸ кыйёсыз киынызы кутозы, виись макеез юизы ке но, соослы изъян уз луы; висисьёс вылэ кизэс понозы но, соос бурмозы».

¹⁹ Дышетскисьёсыныз вераськем бераз Кузё-Инмар Инме ӝутскиз но Инмарлэн бурпалаз пуксиз.

²⁰ Нош дышетскисьёсыз потӥзы но пӧртэм интыостӥ Ӟеч Ивор тодытыса ветлӥзы. Кузё-Инмар соослы юрттӥз, верам кылзэс пӧртэм тодметъёсын юнматъяз. Аминь.