Марк 15 - Библия удмурт кылын: Вуж Сӥзёнлэн канонэн юнматымтэ люкетъёсыз пыртэмын

15-тӥ ЛЮКЕТ

¹ Ӵукна вазь ик архиерейёс тӧроосын, книга тодӥсьёсын, быдэс сӥнедрионэн огазьын кенеш ортчытӥзы. Иисусэз думылӥзы но Пилат кие нуыса сётӥзы.

² Пилат Солэсь юаз: «Тон иудейёслэн Эксэйзы-а?» Иисус ответ сётыса шуиз: «Тон шуиськод».

³ Архиерейёс Сое оломаин но янгыше уськытыны выризы.

⁴ Пилат нош ик Солэсь юаз: «Тон нокыӵе ответ уд-а сётӥськы? Адӟиськод, Тыныд пумит кӧня янгыше уськытонъёс верало».

⁵ Нош Иисус талы но ответ ӧз сёты, та Пилатэз паймытӥз.

⁶ Праздниклы быдэ Пилат, калык куремъя, пытсэтэ сюрем муртъёс пӧлысь одӥгзэ мозмытэ вал.

⁷ Со дыре пытсэтын пукиз Варавва нимо мурт. Аслаз эшъёсыныз калык бугыръяськон дыръя соос адямиез вииллям вылэм.

⁸ Калык кесяськыса, соос понна котьку но лэсьтӥськись ужзэ мед быдэстоз вал шуыса, Пилатлэсь курыны кутскиз.

⁹ Ответ сётыса, соослы со шуиз: «Яралоз-а тӥледлы, иудейёслэсь Эксэйзэс лэзи ке?»

¹⁰ Со тодэ вал уго, архиерейёс Сое вожъяськеменызы сэрен кутыса сётӥзы шуыса.

¹¹ Нош архиерейёс калыкез ӝутказы, соослы Варавваез эсьмаса мед лэзёз шуыса.

¹² Ответ сётыса, Пилат нош ик соослы шуиз: «Иудейёслэн Эксэйзы шуон муртэныды монэ мар карыны косӥськоды?»

¹³ Соос нош ик кесяськыны кутскизы: «Кортӵога Сое!»

¹⁴ Пилат соослы шуиз: «Кыӵе урод уж Со лэсьтӥз?» Нош соос уката но золгес кесяськыны кутскизы: «Кортӵога Сое!»

¹⁵ Соку Пилат, калыклы яран вылысь, Варавваез мозмытӥз, нош Иисусэз жугытыса кортӵоганы сётӥз.

¹⁶ Солдатъёс Сое пыдлось азбаре, претория шуон интые, нуизы. Отчы быдэс полкез люказы.

¹⁷ Вылаз нап-горд басмалэсь шобыр дӥсязы, йыр вылаз тёрнпулэсь йыркерттэт пуныса изьыязы.

¹⁸ Ӟечкыланы кутскизы: «Шумпот, иудейёслэн Эксэйзы».

¹⁹ Бодыен йыраз тышказы, Со вылэ сялазы, пыдесъяськыса Солы йыбыртъязы.

²⁰ Ултӥямзы бере эксэй шобырзэ вылысьтыз кылизы, Аслэсьтыззэ ик дӥськутсэ дӥсязы но Сое кортӵоганы нуизы.

²¹ Бусыысь бертӥсь кириней пи Симонэз, Александрлэсь но Руфлэсь атайзэс, татӥ ортчись муртэ, Солэсь кироссэ нуытӥзы.

²² Сое Голгофа шуон интые вайизы, кудӥз «Кымес инты» шуэм луэ.

²³ Солы смирнаен сурам вина юыны сётӥзы, нош Со ӧз басьты.

²⁴ Сое кортӵогасьёс, пус чӧлтыса, Солэсь дӥськутсэ люкылӥзы, кинлы мар басьтоно.

²⁵ Куинетӥ час вал, Сое кортӵогазы.

²⁶ Сое янгыш каронзы тазьы гожтӥськиз: «Иудейёслэн Эксэйзы».

²⁷ Соин ӵош кык йырвандӥсьёсты кортӵогазы, одӥгзэ – бурпалаз, мукетсэ – паллян палаз.

²⁸ Священной Гожтэмысь «законтэк улӥсьёсын оградэ пыртэмын луоз» шуэм кыл зэм луиз.

²⁹ Вӧзтӥз ортчисьёс, йыръёсынызы сэзъяса, лек кылъёс вераса шуизы: «Эй! Храмез сэрттыса куиньмойскын Пуктӥсь!

³⁰ Уть Астэ Ачид но васькы киросысь».

³¹ Таос кадь ик мыскылляськыса, архиерейёс но книга тодӥсьёс ог-огзылы шуизы: «Мукетъёссэ мозмытылӥз, нош Ассэ мозмытэмез уг луы!

³² Израильлэн Эксэез Христос киросысьтыз табере мед васькоз, адӟимы ке, ми но оскомы». Соин ӵош кортӵогаськем муртъёс но Сое урод кылъёсын куаретӥзы.

³³ Куатетӥ часын быдэс дунне вылын пеймыт луиз. Озьы укмысэтӥ час котырозь улӥз.

³⁴ Укмысэтӥ часын Иисус бадӟым куараен кеськыса вераз: «Элои, Элои! ламма савахфани?» «Инмаре, Инмаре! Малы Тон Монэ кельтӥд?» шуэм кыл луэ со.

³⁵ Татын сылӥсьёс пӧлысь куд-огез тае кылыса шуизы: «Тани, Илияез ӧте».

³⁶ Одӥгез бызьыса мынӥз, губкаез уксусэн тырмытӥз, боды йылэ шедьытыса, Солы юыны сётӥз но шуиз: «Дугдэ ай, учком, Илия Сое киросысь басьтыны лыктоз-а».

³⁷ Иисус кужмо куараен вазиськиз но, лулыз потӥз.

³⁸ Храм пушкысь катанчи йылысеныз улӥозяз шорияк кесиськиз.

³⁹ Солэн ваче пумитаз сылӥсь сю солдатэн кивалтӥсь Солэсь куара сётыса лул потэмзэ адӟем бераз «зэм ик, та Адями Инмар Пи вал» шуиз.

⁴⁰ Татын кышномуртъёс но вал, соос палэнысен учкыса сылӥзы; соос пӧлын вал Магдалина Мария, покчи Иаковлэн но Иосиялэн анайзы Мария, но Саломия.

⁴¹ Соос Иисус сьӧрын Галилея музъемын но служить карыса ветлӥзы. Соин ӵош трос мукетъёс но Иерусалиме лыктэмын вал.

⁴² Ӝыт вуиз. Соку пятница, субботалэн азьвыл нуналэз вал.

⁴³ Аримафеяысь кенешлэн нимо-дано муртэз Иосиф лыктӥз. Со ачиз но Инмар Эксэйлыклэсь лыктэмзэ витьыса улӥз. Кышканзэ куштыса, Пилат доры пыриз но Иисуслэсь Мугорзэ куриз.

⁴⁴ Солэсь кулэмзэ тодыса, Пилат паймиз. Дораз сю солдатэн кивалтӥсез ӧтьыса, солэсь юаз: «Кемалась-а кулӥз?»

⁴⁵ Сю солдатэн кивалтӥсьлэсь тодэм бераз Мугорзэ Иосифлы сётӥз.

⁴⁶ Иосиф, дун тырыса, тӧдьы дэра басьтӥз, кирос бордысь Сое басьтыса, дэраен шобыртӥз но шайгуэ понӥз. Шайгуэз гурезьысь из пушкы гудӟыса лэсьтэмын вал; шайгулэсь ӧссэ изэн пыкъяз.

⁴⁷ Магдалина Мария но Иосий Мария учкыса улӥзы, кытчы Иисусэз ватӥзы.