Марк 13 - Библия удмурт кылын: Вуж Сӥзёнлэн канонэн юнматымтэ люкетъёсыз пыртэмын

13-тӥ ЛЮКЕТ

¹ Храмысь потыкуз, дышетскисьёсыз пӧлысь одӥгез Солы шуиз: «Дышетӥсь! Учкы, кыӵеесь изъёс, кыӵеесь юртъёс!»

² Иисус солэн пумитаз шуиз: «Адӟиськод-а та бадӟымесь юртъёсты? Ваньмыз соос куашкатэмын луозы, татчы из вылэ из но уз кыльы».

³ Иисус Елеон гурезьын храм вадьсын пукыкуз, Петр, Иаков, Иоанн но Андрей ас понназы кылён дыръя Солэсь юазы:

⁴ «Вера милемлы, ку та луоз, ваньмыз таос луон азьын кыӵе тодмет луоз?»

⁵ Ответ сётыса, Иисус тазьы вераны кутскиз: «Чакласькелэ, нокин но визьдэс медаз туга;

⁶ малы ке шуоно тросэз Мынам нимыным лыктозы но, ”та – Мон” шуыса, тросэзлэсь визьзэ тугалозы.

⁷ Ожъёс, ожмаськонъёс сярысь иворъёс кылӥды ке, эн кышкатске, ваньмыз та луоно уго; но та пумыз ӧвӧл на.

⁸ Калык калыклы, эксэйлык эксэйлыклы ваче пумит султозы; интыен-интыен музъем зуркалоз, сютэм аръёс, куалекъяса улон дыръёс луозы. Та – висёнъёслэн кутсконзы.

⁹ Нош тӥ чакласькыса улэлэ; тӥледыз Мон понна судэ сётозы, сӥнагогаосын жугозы, кивалтӥсьёс, эксэйёс азе султытозы, соос азьын тӥ Мон сярысь тодытоды.

¹⁰ Азьвыл вань калыкъёс пӧлын Евангелие тодытэмын луыны кулэ.

¹¹ Тӥледыз кутыса нуыкузы, мар вералом шуыса, азьло ик эн сюлмаське, эн малпаське; со дыре тӥледлы мар сётӥськиз, сое ик вералэ: соку тӥ уд вералэ, Святой Дух вералоз уго.

¹² Братэз братсэ кутыса виыны сётоз, атаез – нылпиоссэ; нылпиос анай-атайёссылы пумит султозы но соосты виёзы.

¹³ Мынам нимы понна ваньмыз тӥледыз адӟемпотостэм карозы; нош пумозяз чидам мурт – утиськоз.

¹⁴ Даниил пророк пыр верам юрӟым куашканэз адӟиды ке, кытын сылыны уг яра – лыдӟись мурт мед валалоз, – соку Иудея музъеме учырамъёс гурезьёсы мед пегӟозы.

¹⁵ Нош липет йылэ учырам мурт, коркам пырыса марме ке но басьто шуыса, отысь медаз васькы.

¹⁶ Бусые учырам мурт но, дӥськутме басьто шуыса, берен медаз ни берытскы.

¹⁷ Кайгу луоз со нуналъёсы нуны ваёноослы, нуны нонтӥсьёслы!

¹⁸ Вӧсяськелэ, пегӟоно нуналды толалтэ медаз учыра шуыса.

¹⁹ Со нуналъёсы сыӵе куректон луоз, кыӵеез Инмарлэн дуннеез кылдытэм дырысеныз туннэ нуналозь ӧй на вал, уз но луы.

²⁰ Кузё-Инмар со нуналъёсыз ӧй ке вакчиятысал, одӥг улэп мурт но ӧй утиськысал; но Аслэсьтыз быръем адямиоссэ утён понна Кузё-Инмар вакчиятӥз со нуналъёсыз.

²¹ Соку тӥледлы кин ке но ”тани татын Христос” яке ”тӥни отын” шуиз ке, эн оскелэ.

²² Соку султозы пӧяськись христосъёс, ӧрекчи пророкъёс, паймымон тодметъёс но паймымон ужъёс лэсьтыса, луиз ке, быръем муртъёслэсь но визьзэс туганы соос тыршозы.

²³ Нош тӥ утиськелэ; тани Мон тӥледлы ваньзэ тае азьвыл ик верай.

²⁴ Со нуналъёсы, со куректон-курадӟонъёс бере, шунды пеймытомоз, толэзь но аслэсьтыз югытсэ уз сёты ни,

²⁵ инмысь кизилиос усёзы, ин кужымъёс вырӟозы.

²⁶ Соку пилемъёс вылын быдӟым кужымен, пиштӥсь данлыкен лыктӥсь Адями Пиез адӟозы.

²⁷ Соку Со Аслэсьтыз Кылчинъёссэ ыстоз но дуннелэн ньыль палысьтыз, музъем пумысь но, ин пумысь но Аслэсьтыз быръем адямиоссэ люкалоз.

²⁸ Смоквапулэсь адӟем каре: улвайёсыз небӟыса, куар поттыны кутско ке, гужем матын ни шуыса тодӥськоды.

²⁹ Озьы ик тӥ но, та тодметъёслэсь быдэсмемзэс адӟиды ке, тодэлэ, матэ, ӧс выжые, вуиз ини шуыса.

³⁰ Зэм ик тӥледлы верасько: та выжы бырытозь, ваньмыз но та луоз.

³¹ Ин но музъем бырозы, нош Мынам кылъёсы уз быре.

³² Нош со нуналэз, со часэз, Атай сяна, Инмысь Кылчинъёс но, Пи но, нокин но уг тоды.

³³ Эскериське, сак улэ, вӧсяськелэ, уд тодӥське уго, ку со дыр вуоз.

³⁴ Юртсэ ляльчиосызлы утьыны кельтыса, котькудзылы уж сётыса, капка возьмасьлы сак луыны косыса, сюрес вылэ потӥсь муртлы со укша.

³⁵ Озьыен, сак улэ, уд тодӥське уго, ку бертоз коркалэн кузёез – ӝыт-а яке уйшор уе-а, атасъёс чоръяны кутскыку-а яке ӵукна-а;

³⁶ шӧдтэк шорысь бертыса, изён дыръяды со тӥледыз медаз пумита.

³⁷ Нош мае верасько тӥледлы, верасько ваньмызлы: сак улэлэ».