Левит 9 - Библия удмурт кылын: Вуж Сӥзёнлэн канонэн юнматымтэ люкетъёсыз пыртэмын

9-тӥ ЛЮКЕТ

¹ Тямысэтӥ нуналэ Моисей Ааронэз, солэсь пиоссэ, Израильлэсь тӧрооссэ дораз ӧтчаз,

² Ааронлы со шуиз: «Ошъёс пӧлысь сьӧлыкъёс понна курбонлы сётыны аслыд ошпиез кут, тылын сутӥськись курбон сётыны такаез кут, кыксы но шектэмесь мед луозы, соосты Кузё-Инмар азе султыты;

³ израиль пиослы шу: ”Сьӧлык понна курбон сётыны кечтака вае, тылын сутӥськись курбон сётыны [така], одӥг аресъем ошпи, ыжпи вае, соос шектэмесь мед луозы,

⁴ тупаса улонлы сӥзем курбон сётыны ош, така вае. Ваньзэ тае Кузё-Инмар азьын курбон сётыны вае, вӧйын пыжем салам нянь но вае, уго туннэ Кузё-Инмар тӥледлы возьматскоз”».

⁵ Моисейлэсь косэмзэ вӧсяськон скиния азе вайизы, вань калык лыктӥз но Кузё-Инмар азе султӥз.

⁶ Соку Моисей шуиз: «Тани Кузё-Инмар ма лэсьтыны косӥз, соку тӥ дорын Кузё-Инмарлэн пиштӥсь данлыкез возьматскоз».

⁷ Соку Моисей Ааронлы шуиз: «Курбон сётон ӝӧк дуре султы но сьӧлык понна курбондэ сёт, тылын сутӥськись курбондэ сёт, астэ но, калыкез но сьӧлыкъёслэсь сузя, калыклэсь саламзэ-кузьымзэ курбонлы вай, кызьы Кузё-Инмар косӥз, озьы соосты сьӧлыкъёслэсь сузя».

⁸ Аарон курбон сётон ӝӧк дуре лыктӥз но аслаз сьӧлыкъёсыз понна ошпиез курбон сётӥз:

⁹ Аарон пиос солы курбон пудолэсь вирзэ сётӥзы, чиньызэ вире веттӥз но курбон сётон ӝӧклэн сюръёсыз вылэ вирез понӥз, нош кылемзэ вирез курбон сётон ӝӧклэн выжыяз кисьтӥз;

¹⁰ нош сьӧлык понна курбон сётэм пудолэсь кӧйзэ, пекляоссэ, мус бордысь кӧй пуйыез курбон сётон ӝӧк вылын сутӥз, кызьы Кузё-Инмар Моисейлы косон сётӥз;

¹¹ нош сӥльзэ но кузэ, стан сьӧры поттыса, тылын сутӥз.

¹² Тылын сутӥськись курбон пудо вандӥз, Аарон пиос солы курбон пудолэсь вирзэ сётӥзы; со вирын Аарон курбон сётон ӝӧкез котыр ласянь пазяз;

¹³ солы тылын сутӥськись курбон пудолэсь мугор люкетъёссэ, йырзэ вайизы но, соосты со курбон сётон ӝӧк вылын сутӥз,

¹⁴ нош пуш арбериоссэ, кукъёссэ миськиз но тылын сутӥськись курбонэн ӵош курбон сётон ӝӧк вылын сутӥз.

¹⁵ Калыклэсь салам-кузьымзэ курбон вайиз: сьӧлыкъёс понна курбон сётыны калыклэсь кечсэ кутыса вандӥз но азьвылзэ сямен ик сьӧлыкъёс понна курбон сётӥз.

¹⁶ Тылын сутӥськись курбон сётӥз, та ужез пуктон-косонъя быдэстӥз.

¹⁷ Салам нянез кияз кутӥз но курбон сётон ӝӧк вылын сутӥз, – ӵукна тылын сутӥськись курбон вӧзы вал таиз.

¹⁸ Калыклэсь ваем ошсэ, таказэ тупаса улонлы сӥзем курбонлы вандӥз; Аарон пиос солы курбон пудолэсь вирзэ сётӥзы, нош со курбон сётон ӝӧкез котыр ласянь вирен пазяз;

¹⁹ ош пушкысь кӧез, такалэн быж бордаз ошиськыса улӥсь кӧй пуйыез, озьы ик [пуш арбериос вылэ] люкаськем [кӧез], пекляоссэ но мус бордысь кӧй пуйызэ вайизы,

²⁰ кӧез мӧля вылэ понӥзы, собере Аарон кӧез курбон сётон ӝӧк вылын сутӥз;

²¹ нош ошен такалэсь мӧлязэс но бурпал пельпумзэс Аарон Кузё-Инмар азьын сэзъяса вылэ ӝутӥз, Моисей косэмъя лэсьтӥз.

²² Аарон, калык пала берыктӥськыса, киоссэ ӝутӥз, калыкез бакель кариз, сьӧлык понна курбонэз, тылын сутӥськись курбонэз, тупаса улонлы сӥзем курбонэз сётэмез бере со курбон сётон ӝӧк дорысь васькиз.

²³ Моисеен Аарон вӧсяськон скиния пушкы пыризы но потыса калыкез бакель каризы. Соку Кузё-Инмарлэн пиштӥсь данлыкез вань калыклы возьматскиз:

²⁴ Кузё-Инмар дорысь тыл потӥз но курбон сётон ӝӧк вылысь тылын сутӥськись курбонэз, кӧез сутӥз: тае адӟыса, вань калык шумпотэменыз черектӥськиз, ымныр вылаз выдӥз.