Левит 7 - Библия удмурт кылын: Вуж Сӥзёнлэн канонэн юнматымтэ люкетъёсыз пыртэмын

7-тӥ ЛЮКЕТ

¹ «Тани янгыш уж понна курбон сётонлэн законэз: та быдӟым святыня;

² янгыш уж понна сётӥськись курбон пудоез вандыны кулэ тылын сутӥськись курбон пудоез вандон интыын ик, солэн вирыныз курбон сётон ӝӧкез котыр ласянь пазяны кулэ;

³ курбонлы пудо вайись солэсь вань кӧйзэ, кӧй люкаськон пуйызэ, пуш кӧйзэ вайыны кулэ,

⁴ кыксэ ик пекляоссэ, соос вылысь, саур (макес) вылысьтыз кӧйзэ, мус бордысь кӧй люкаськон пуйызэ; тае со пекляосын валче мед висъялоз;

⁵ священник тае курбон сётон ӝӧк вылын, Кузё-Инмарлы сӥзьыса, мед сутоз: та янгыш уж понна сётӥськись курбон.

⁶ Священникъёс выжыысь вань пиосмуртъёс тае сиыны быгато; сое святой интыын сиёно: та быдӟым святыня.

⁷ Сьӧлык понна курбон сётонлэн но янгыш уж понна курбон сётонлэн законэз одӥг кадь: курбон пудолэсь сӥльзэ басьтоз со священник, кин, со пудоез курбон сётыса, курбон вайись муртэ сьӧлыклэсь сузя.

⁸ Священник кинлэсь ке пудозэ, тылын сутыса, курбон сётэ ке, кузэ священниклы сётыны кулэ.

⁹ Гурын пыжыса ваем вань салам нянез, горшокын яке таба вылын дасям сиёнэз, соосты курбон сётӥсь священник басьтоз.

¹⁰ Вӧйын сураса пыжем салам няньёс, вӧйтэк пыжемъёсыз но Ааронлэн вань пиосызлы, соизлы но, таизлы но, сётэмын луыны кулэ.

¹¹ Тани тупаса улонлы сӥзем Кузё-Инмарлы вайиськись курбон сётонлэн законэз:

¹² кин тау карыны сое вае, соку тау карон курбон вӧзы вӧйын сураса пыжем юмал нянь, вӧйын зырам куарнянь вайыны кулэ, эшшо вӧйын сурам чабей пызь, вӧйын сураса пыжем нянь;

¹³ тау карыса тупаса улонлы сӥзем курбон сётыку, куарнянь сяна, чырсатыса пыжем салам нянь мед ваёз;

¹⁴ вань салам курбонъёсыз пӧлысь кудзэ ке но огзэ Кузё-Инмар доры вылэ ӝутыны мед ваёз: со – тупаса улонлы сӥзьыса ваем пудолэн вирыныз пазясь священниклы сётоно люкет;

¹⁵ тау карыса тупаса улонлы сӥзем курбон пудолэсь сӥльзэ ваён нуналэ ик сиёно, солэсь кылем люкетсэ ӵукнаозьлы кельтыны уг яра.

¹⁶ Нош кин ке сӥзиськыса яке аслаз ӟеч мылкыдыныз курбон сётыны вае ке, солэсь курбон сӥльзэ ваем нуналэ ик сиёно, мукетаз нуналэ но солэсь кылем люкетсэ сиыны яра,

¹⁷ нош курбон пудолэсь кылем сӥльзэ, куинетӥ нуналозьлы кылиз ке, тыл вылын сутоно;

¹⁸ нош тупаса улонлы сӥзем курбон сӥлез куинетӥ нуналэ но сиизы на ке, соку со курбон ярамон уз луы; кин сое вайиз, солы ӟечлы уз гожтӥськы: та саптаськон, кин ке сое сииз ке, со мурт сьӧлыкез ас вылаз нуоз;

¹⁹ та сӥль борды кырсь маке йӧтӥськиз ке, сое сиыны уг яра, сое тылын сутоно, нош чылкыт сӥлез котькудӥз чылкыт мурт сиыны быгатэ;

²⁰ кыӵе ке но адями саптаськем дыръяз Кузё-Инмарлы ваем тупаса улонлы сӥзем курбон сӥлез сииз ке, со адями ас калыкез пӧлысь быдтэмын луоз;

²¹ кыӵе ке адями кыӵе ке кырсь маке борды – адямилэн кырсез борды яке кырсь пудо борды, яке котькыӵе кырсь нюж кыстӥськыса ветлӥсь борды – йӧтӥськиз ке, собере Кузё-Инмарлы ваем тупаса улонлы сӥзем курбон сӥлез сииз ке, со адями ас калыкез пӧлысь быдтэмын луоз».

²² Кузё-Инмар Моисейлы тазьы вераз, тазьы шуиз:

²³ «Израиль пиослы тазьы шу: ”Ошлэсь но, ыжлэсь но, кечлэсь но нокыӵе но кӧйзэ эн сиелэ.

²⁴ Кулэм пудолэсь, пӧйшуръёсын кесям пудолэсь кӧйзэ котькыӵе уже кутыны луэ, нош сое тӥ эн сие.

²⁵ Кин Кузё-Инмарлы курбон ваем пудолэсь кӧйзэ сииз ке, со адями ас калыкез пӧлысь быдтэмын луоз;

²⁶ асьтэлэн улон интыосады нокыӵе но вирез эн сие – тылобурдолэсь но, пудолэсь но вирзэ эн сие;

²⁷ нош кин ке кыӵе ке вирез сииз ке, со адями ас калыкез пӧлысь быдтэмын луоз”».

²⁸ Соку Кузё-Инмар Моисейлы тазьы вераз, тазьы шуиз:

²⁹ «Израиль пиослы тазьы шу: ”Кин, тупаса улонлы сӥзьыса, Кузё-Инмарлы курбон вае, со тупаса улонлы сӥзем курбонэзлэсь люкетсэ Кузё-Инмарлы саламлы мед ваёз;

³⁰ курбонэз со ас киыныз Кузё-Инмарлы вайыны кулэ: кӧез мӧляеныз валче [озьы ик мус бордысь кӧй люкаськон пуйыез] со вайыны кулэ, Кузё-Инмар азьын со мӧляез сэзъяса вайыны кулэ;

³¹ кӧез священник курбон сётон ӝӧк вылын сутоз, нош курбонлы сётэм пудолэсь мӧлязэ Ааронлы но солэн пиосызлы сётыны кулэ;

³² нош бурпал пельпумзэ тупаса улонлы сӥзем курбонъёсты пӧлысь священниклы вылэ ӝутонлы ваелэ.

³³ Аарон пиос пӧлысь кудзы ке тупаса улонлы сӥзем курбон пудолэсь вирзэ, кӧйзэ вае ке, солы люкетлы курбон пудолэсь бурпал пельпумзэ сёто;

³⁴ уго израиль пиослэсь тупаса улонлы сӥзьыса сётэм курбон пудооссылэсь сэзъяса вылэ ӝутонлы ваёно люкетсэс – мӧлязэс, пельпумзэс – Мон израиль пиослэсь Аарон священниклы но солэн пиосызлы пумтэм вапумъёс ӵожелы люкетлы сётӥсько”».

³⁵ Та Кузё-Инмарлы курбон ваем пӧлысь Ааронлы люкет, солэн пиосызлы люкет, – Кузё-Инмар азьын священник луыса ужаны-тыршыны кутскем нуналысен ик,

³⁶ таӵе люкетэз Кузё-Инмар, соосты вӧйын зырӟыса пуктэм нуналысен кутскыса, израиль пиослы сётыны косӥз. Та выжыысь выжые, пумтэм вапумъёс ӵожелы сётӥськем пуктон-косон.

³⁷ Тани тылын сутӥськись курбон пумысен, саламлы ваем нянь пумысен, сьӧлык понна, янгыш уж лэсьтэм понна курбон сётон пумысен, священнике пуктыку курбон сётон пумысен, тупаса улонлы сӥзем курбон сётон пумысен закон мар вера,

³⁸ та законэз Кузё-Инмар Сӥнай гурезьысен Моисейлы сётӥз, Сӥнай луоё кыр дуннеысен Со Моисей пыр израиль пиослы вераз, Кузё-Инмарлы кыӵе-мар саламъёс-кузьымъёс вайылыны кулэ.