Левит 4 - Библия удмурт кылын: Вуж Сӥзёнлэн канонэн юнматымтэ люкетъёсыз пыртэмын

4-тӥ ЛЮКЕТ

¹ Кузё-Инмар Моисейлы шуиз:

² «Израиль пиослы тазьы шу: ”Кин ке но Кузё-Инмарлэн кудӥзлы ке но курон-косонэзлы пумит янгышаса сьӧлыказ ке, лэсьтыны ярантэм ужез лэсьтӥз ке,

³ вӧйын зырӟыса пуктэм священник сьӧлыказ ке, калыкез но озьы сьӧлыке пыртӥз ке, соку со аслаз лэсьтэм сьӧлыкез понна сюро таза пудо пӧлысь шектэм ошпиез курбонлы мед ваёз, со сьӧлык понна Кузё-Инмарлы ваем курбон;

⁴ ошпизэ вӧсяськон скиниялэн ӧс дораз Кузё-Инмар азе мед ваёз, ошпиезлэн йыр вылаз кизэ мед поноз, собере Кузё-Инмар азьын сое мед вандоз;

⁵ вӧйын зырӟыса пуктэм [дун-чылкыт пуктонэн пуктэм] священник ошпилэсь вирзэ мед кутоз но вӧсяськон скиния пушкы мед пыртоз,

⁶ священник чиньызэ вире мед веттоз но Кузё-Инмар азьын вӧсяськон интылэн катанчиез вылэ сизьым пол вир мед пазьгоз;

⁷ [Ошпилэсь] вирзэ священник Кузё-Инмар азе, вӧсяськон скиния пушкысь ческыт зыно ӵындытон курбон сётон ӝӧклэн сюръёсыз вылэ, мед поноз, нош кылемзэ ошпи вирез вӧсяськон скинияе пырон дорын сылӥсь тылын сутӥськись курбон сётон ӝӧклэн выжыяз мед кисьтоз;

⁸ сьӧлыклэсь мозмытскон понна курбонлы ваем ошпилэн пушкысьтыз вань кӧйзэ мед поттоз, вань пуш кӧйзэ, пушказ люкаськем кӧйзэ,

⁹ кыксэ ик пекляоссэ, соос вылысь, саур (макес) вылысь кӧйзэ, мус бордысь кӧй пуйыез но; тае со пекляосын валче мед ваёз,

¹⁰ тупаса улонлы сӥзем курбон ошпи пушкысь кадь та пушкысь но кӧй люкетъёс ваемын мед луозы; священник соосты тылын сутӥськись курбон сётон ӝӧк вылын сутоз.

¹¹ Нош ошпилэсь кузэ, вань сӥльзэ, йырзэ, пыдъёссэ, пуштӥрлыкъёссэ, сӥтьсюлъёссэ,

¹² ошпилэсь вань кылем люкетсэ станлэн сьӧраз, пень кисьтон азе, чылкыт интые мед поттоз но ӝуась писъёс вылын сое мед сутоз; пень кисьтан интыын со сутэмын мед луоз.

¹³ Нош вань израиль калык янгышен сьӧлыказ ке, но со уж калыклэн син азьысьтыз ватӥськемын ке, Кузё-Инмарлэн курон-косонъёсызлы пумит маке лэсьтӥз ке, кулэтэм-ярантэм уж лэсьтӥз ке, янгыш луоз,

¹⁴ лэсьтэм сьӧлыксы тодмо луиз ке, соку соос сюро таза пудо пӧлысь вань калыклэн нимыныз сьӧлык понна курбонлы ошпиез мед сётозы, сое вӧсяськон скиния азе мед ваёзы;

¹⁵ калыклэн тӧроосыз Кузё-Инмар азьын ошпилэн йыр вылаз кизэс мед понозы но Кузё-Инмар азьын сое мед вандозы.

¹⁶ Вӧйын зырӟыса пуктэм священник ошпилэсь вирзэ вӧсяськон скиния пушкы мед пыртоз,

¹⁷ священник [ошпилэн] вир пӧлаз чиньызэ мед веттоз но Кузё-Инмар азьын [вӧсяськон интыысь] катанчи вылэ сизьым пол вир мед пазьгоз,

¹⁸ [ческыт зыно ӵындытон] курбон сётон ӝӧклэн сюръёсыз вылэ вирез мед поноз – Кузё-Инмар азьын, вӧсяськон скиния пушкын, нош кылемзэ вирзэ вӧсяськон скинияе пырон дорысь тылын сутӥськись курбон сётон ӝӧклэн выжыяз мед кисьтоз;

¹⁹ ошпилэн пушкысьтыз вань кӧйзэ мед поттоз но курбон сётон ӝӧк вылын мед сутоз;

²⁰ та ошпиен озьы ик мед кароз, кызьы каро сьӧлык понна курбонлы сётэм ошпиен; озьы лэсьтыны кулэ соин, тазьы соосты сьӧлыклэсь сузялоз священник, соку соослэн сьӧлыксы куштэмын луоз;

²¹ станлэн сьӧраз ошпиез мед поттоз но азьвылзэ ошпиез кызьы сутӥз, тазэ но озьы ик мед сутоз. Таиз вань калыклэн (мерлыклэн) сьӧлыкез понна сётэм курбон.

²² Нош кивалтӥсь йыр Инмарезлэн Кузё-Инмарлэн курон-косонъёсызлы пумит янгышен сьӧлыказ ке, кулэтэм-ярантэм уж лэсьтӥз ке, со янгыше сюремын луоз.

²³ Лэсьтэм сьӧлыксэ со тодыны быгатӥз ке, соку со шектэм кечтакаез курбонлы мед ваёз.

²⁴ Кечтакалэн вылаз кизэ мед поноз но Кузё-Инмар азьын тылын сутӥськись курбонлы ваем пудоез вандон интыын сое мед вандоз: та сьӧлык понна сётэм курбон;

²⁵ священник сьӧлык понна сётэм курбон пудолэсь вирзэ, чиньыен басьтыса, тылын сутӥськись курбон сётон ӝӧклэн сюръёсыз вылэ поноз, нош кылемзэ вирзэ тылын сутӥськись курбон сётон ӝӧклэн выжыяз мед кисьтоз;

²⁶ вань кӧйзэ курбон сётон ӝӧк вылын мед сутоз, кызьы тупаса улонлы сӥзем курбон пудолэсь кӧйзэ суто, тазьы священник кивалтӥсь йырез сьӧлыкезлэсь сузялоз но, солэн сьӧлыкез куштӥськоз.

²⁷ Та музъем вылын калык пӧлысь кин ке но янгышен сьӧлыказ ке, Кузё-Инмарлэсь курон-косонъёссэ сӧрыса кыӵе ке но кулэтэм-ярантэм уж лэсьтӥз ке, янгыше сюроз,

²⁸ нош со аслэсьтыз лэсьтэм сьӧлыксэ тодӥз ке, соку со лэсьтэм сьӧлыкез понна курбон сётыны шектэм кечез мед ваёз,

²⁹ сьӧлык понна курбонлы ваем кечлэн йыр вылаз кизэ мед поноз но сьӧлык понна курбонлы ваем [кечез] тылын сутоно курбон пудо [вандон] интыын мед вандоз;

³⁰ священник солэсь вирзэ, чиньызэ веттыса, мед басьтоз но тылын сутӥськись курбон сётон ӝӧклэн сюръёсыз вылэ мед поноз, нош кылемзэ вирзэ курбон сётон ӝӧклэн выжыяз мед кисьтоз;

³¹ тупаса улонлы сӥзем курбон пудолэсь кызьы кӧйзэ окто, озьы ик талэсь но вань кӧйзэ мед октоз но, священник сое курбон сётон ӝӧк вылын мед сутоз, со Кузё-Инмар азьын ческыт зын поттоз; тазьы священник та адямиез сьӧлыклэсь сузялоз, солэн сьӧлыкез куштӥськоз.

³² Нош сьӧлык понна курбонлы ыж уллёысь кудзэ ке сётыны малпаз ке, шектэм мессэ мед ваёз,

³³ сьӧлык понна ваем курбон ыжлэн йыр вылаз кизэ мед поноз но сьӧлык понна курбонлы ваем пудоез тылын сутоно курбон пудоос вандон интыын мед вандоз;

³⁴ сьӧлык понна курбонлы ваем ыжлэсь вирзэ священник, чиньызэ веттыса, мед басьтоз но тылын сутӥськись курбон сётон ӝӧклэн сюръёсыз вылэ мед поноз, нош кылемзэ вирзэ курбон сётон ӝӧклэн выжыяз мед кисьтоз;

³⁵ тупаса улонлы сӥзем курбон пудолэсь кызьы кӧйзэ окто, озьы ик талэсь но вань кӧйзэ мед октозы но, священник сое курбон сётон ӝӧк вылын, Кузё-Инмарлы курбон карыса, мед сутоз; тазьы священник та адямиез лэсьтэм сьӧлыкезлэсь сузялоз, солэн сьӧлыкез куштӥськоз”».