Левит 27 - Библия удмурт кылын: Вуж Сӥзёнлэн канонэн юнматымтэ люкетъёсыз пыртэмын

27-тӥ ЛЮКЕТ

¹ Кузё-Инмар Моисейлы тазьы вераз, тазьы шуиз:

² «Израиль пиослы тазьы вераса шу: кин тынад дунъетэдъя лулзэ Кузё-Инмар дорын ужаны сӥзьыса сётэ,

³ кызь аресысен куатьтон аресозь вуэм пиосмурт тынад пуктэм дунъетэдъя витьтон азвесь сӥкль луыны кулэ, вӧсяськон скинияысь сӥкльлэн секталаеныз мертаса;

⁴ кышномурт понна пуктэм дунъетэд куамын сӥкль луыны кулэ;

⁵ вить аресысен кызь аресозь вуэм пиосмуртлы тынад дунъетэд кызь сӥкль луыны кулэ, нош кышномуртлы – дас сӥкль;

⁶ нош одӥг толэзьысен вить аресозь вуэм пи понна тынад дунъетэд вить азвесь сӥкль мед луоз, нош таӵе арлыдъем ныл понна тынад дунъетэд куинь азвесь сӥкль мед луоз;

⁷ куатьтон но солэсь бадӟымгес арлыдо пиосмурт понна тынад дунъетэд дас вить азвесь сӥкль мед луоз, нош кышномурт понна – дас сӥкль.

⁸ Нош со куанер ке, тынад дунъетэдъя сётыны уг ке быгаты, соку сое священниклы мед возьматозы, священник сое мед дунъялоз: кыл сётӥсь муртлэн кӧня тырыны кужымез вань, сое лыдэ басьтыса, священник сое мед дунъялоз.

⁹ Нош Кузё-Инмарлы сӥзем пудо курбонлы вайыны ярамон ке, мае сёто Кузё-Инмарлы, со ваньмыз дун-чылкыт луыны кулэ:

¹⁰ сое вошъяны-берыкъяны кулэ ӧвӧл, ӟечсэ уродэныз воштоно ӧвӧл яке уродзэ ӟеченыз воштоно ӧвӧл; нош кин ке пудоез пудоен ик воштӥз ке, кыкез ик пудоез святыня луоз.

¹¹ Нош Кузё-Инмарлы сӥземез кырсь пудо ке, кудзэ Кузё-Инмарлы курбон уг сёто, соку со пудоез священниклы возьматыны ваёно,

¹² священник дунъялоз: умой-а, урод-а со; священниклэн сётэм дунъетэзъя луыны кулэ;

¹³ кин ке сое берен, дун тырыса, басьтыны ӧдъя ке, тынад пуктэм дунъетэд вӧзы витетӥ люкетсэ эшшо мед ватсалоз на.

¹⁴ Кин ке аслэсьтыз корказэ Кузё-Инмарлэн святой ваньбурез пӧлы сётэ ке, священник дунъет сётыны кулэ: ӟеч-а со, урод-а со, – кызьы священник дунъялоз, озьы ик луоз;

¹⁵ сӥзиськем мурт аслэсьтыз корказэ берен басьтыны малпаз ке, тынад дунъям дуныд вӧзы вить люкет азвесь мед ватсалоз на, соку та солэн коркаез луоз.

¹⁶ Аслаз бусыысьтыз аназэ кин ке но Кузё-Инмарлы сӥзиз ке, тон сое дунъя кизем юэз лыдэ басьтыса: одӥг хомер кизем йыды понна витьтон азвесь сӥкль тыроно;

¹⁷ юбилей арысен кутскыса кин ке но бусызэ сӥзе ке, тынад дунъетэдъя ик сое берен басьтон дуныз мед луоз;

¹⁸ юбилей ар бере кин аслэсьтыз бусызэ сӥзе, соку священник со понна тыроно азвесез, юбилей ар вуэмлэсь азьвыл аръёсты лыдэ басьтыса, лыдъяны кулэ, тынэсьтыд дунъям дундэ кулэстыны кулэ;

¹⁹ сӥзиськем мурт бусызэ берен басьтыны малпаз ке, со тынад дунъям дуныд вӧзы витетӥ люкетсэ азвесь мед ватсалоз на, соку со музъем со кие кылёз.

²⁰ Нош со, дун тырыса, бусызэ берен ӧз ни ке басьты, со бусыез мукет муртлы вузазы ке, сое берен басьтыны уг ни луы:

²¹ юбилей аре со бусы сое басьтӥсьлэн киулысьтыз кошкоз но Кузё-Инмарлэн святой ваньбурез луоз, кыл сётыса сӥзиськем мактал; священниклэн киулаз со сётэмын луоз.

²² Нош кин ке но аслэсьтыззэ ӧвӧл, басьтэмзэ музъемез Кузё-Инмарлы сӥзиз ке,

²³ соку священник солэсь дунзэ, юбилей арозь кылем дырез лыдэ басьтыса, лыдъяны кулэ; кӧня тыр басьтэм бусыез дунъямын луиз, со дунэз со нуналэ ик та адями, Кузё-Инмарлы сётӥськись святой салам-кузьым та шуыса, сётыны кулэ;

²⁴ нош юбилей арын бусы музъемзэ вузам муртлэн кияз нош ик вуоз.

²⁵ Вань дунъёсыд вӧсяськон скинияысь сӥкльлэн секталаеныз мертаса сётэмын мед луозы, одӥг сӥкльын кызь гера луыны кулэ.

²⁶ Пудо пӧлысь нырысь вордскемъёссэ нокин но Кузё-Инмарлы медаз сӥзьы, малы ке шуоно нырысь вордскемъёс сӥзьытэк но Кузё-Инмарлы сётэмын луыны кулэ: ош-а со, сюро векчи пудо-а со, – соос Кузё-Инмарлэн.

²⁷ Нош нырысь вордскемез кырсь пудоос пӧлысь ке, соку кузёез сое, тынэсьтыд дунъям дундэ тырыса, аслыз басьтыны кулэ, со вӧзы витетӥ люкетсэ ватсаны кулэ на; кузёез сое, дун тырыса, аслыз ӧз ке басьты, соку сое тынад дунъям дуныдъя ик вузано.

²⁸ Нош кыл сётыса вань сӥзиськемъёсыз, адямилэн аслаз ваньбурез пӧлысь кыл сётон пыр сӥзиськыса Кузё-Инмарлы сётэмъёсыз, – адямиез-а, пудоез-а, аслэсьтыз бусызэ-а со сӥзиз, – сое вузаны уг яра, берен но басьтыны уг яра: кыл сётыса вань сӥзиськемъёс – со Кузё-Инмарлэн быдӟым святыняез;

²⁹ адямилэн кыл сётыса сӥзиськемъёсыз, дун тырыса, берен уг ни басьтӥсько – соос быдтэмын луыны кулэ.

³⁰ Музъемлэн поттэм вань емышезлэн дасэтӥ люкетэз, музъемысь кидысъёслэн но, писпуысь емышъёслэн но дасэтӥ люкетсы – со Кузё-Инмарлэн: со – Кузё-Инмарлэн святыняез;

³¹ кин ке но аслэсьтыз дасэтӥ люкетсэ, дун тырыса, берен басьтыны мылкыд кариз ке, солэн дуныз вӧзы витетӥ люкетсэ мед ватсалоз на.

³² Сюро таза пудо пӧлысь, сюро векчи пудо пӧлысь дасэтӥ люкетэз, ваньмыз, мар потэ пудоос лыдъяку пудо возьмасьлэн бодыез пыр, котькудзэ дасэтӥ пудоез Кузё-Инмарлы сӥзёно;

³³ копаськыса-эскерыса улоно ӧвӧл, ӟеч-а, урод-а со, вошъяны но сое кулэ ӧвӧл; кин ке но сое воштӥз ке, воштэм пудоез но, воштосэз но святыня луозы; дун тырыса, соосты берен басьтыны уг ни луы».

³⁴ Та Кузё-Инмарлэн Сӥнай гурезьысен Моисейлы сӥзьыса израиль пиослы сётэм курон-косонъёсыз.