Левит 25 - Библия удмурт кылын: Вуж Сӥзёнлэн канонэн юнматымтэ люкетъёсыз пыртэмын

25-тӥ ЛЮКЕТ

¹ Сӥнай гурезьысен Кузё-Инмар Моисейлы тазьы вераз, тазьы шуиз:

² «Израиль пиослы тазьы ялыса шу: Мынам тӥледлы сётоно музъемам вуиды ке, соку Кузё-Инмарлэн субботаяз музъем шутэтскыны кулэ;

³ куать ар ӵоже бусы вылад кизь, куать ар ӵоже виноградлэсь вайёссэ вандылы; будэтэм емышсэс бича,

⁴ нош сизьыметӥ араз музъемлэн шутэтскон субботаез мед луоз, Кузё-Инмарлэн субботаез: бусы вылад ю эн кизьы, виноградпудэдлэсь вайёссэ эн вандылы;

⁵ ана вылад мар кизьытэк ачиз потӥз ке, сое эн ара, вандылымтэ вайёсыд вылэ потэм виноград пурыосты эн бича – таиз ар мед луоз музъемлэн шутэтскон дырыз;

⁶ музъемлэн субботаез кыстӥськытозь ваньмыз та тӥледлы – тыныд но, тынад ляльчиедлы но, ляльчи кышномуртэдлы но, медоосыдлы но, тон доры улыны интыяськем муртъёсыдлы но – сиёнлы мыноз;

⁷ пудо-животэдлы но, музъем вылысьтыд пӧйшуръёслы но та будэм емышъёс сиыны яралозы.

⁸ Сизьым суббота аръёс аслыд лыдъя, сизьым арез сизьым пол йылэты – сизьым суббота аръёсад ньыльдон укмыс ар мед луоз;

⁹ сизьыметӥ толэзьлэн дасэтӥ [нуналаз] гумыен пелля, Чылкытатӥськон-сузяськон празднике быдэс музъем вылады гумыен пеллялэ;

¹⁰ витьтонэтӥ арез вӧсялэ, та музъемын улӥсь вань адямиослы эрик сётӥськомы шуыса ялэ: та тӥляд юбилейды мед луоз; котькудды но асьтэлэн люкет музъемады берытске, котькудды но асьтэлэн выжыды доры берытске.

¹¹ Витьтонэтӥ ар тӥляд юбилейды мед луоз: эн кизе, мар ас понназ ӝужаз-будӥз ке, сое эн аралэ, вандылымтэ виноград вайёсы потэм мульыосты эн бичалэ,

¹² уго та юбилей: тӥ понна со святой ар мед луоз; бусыды мар будэтӥз, сое сие.

¹³ Юбилей аре ваньды асьтэлэн люкет музъемады берытске.

¹⁴ Мардэ ке но матысь муртэдлы вузад яке мар ке но матысь муртэдлэсь басьтӥд ке, огдэс огды вӧсь эн каре;

¹⁵ юбилей бере ортчем аръёслэсь лыдзэс санэ басьтыса, тон матысь муртэдлэсь октӥськыса-басьяськыса улыны кулэ; музъемлэсь будэтэм емышсэ октон аръёслэсь лыдзэс санэ басьтыса, со тыныд вузаны кулэ;

¹⁶ трос аръёс кылё ке, дунзэ будэты; нош ӧжыт аръёс кылё ке, дунзэ кулэсты, уго кылем аръёс дыръя музъемлэсь поттоно емышсэ со тыныд вуза.

¹⁷ Огдэс огды унь-мань эн каре, Инмаредлэсь кышка, уго Мон Кузё-Инмар, тӥляд Инмарды.

¹⁸ Мынэсьтым пуктон-косонъёсме быдэсъялэ, законъёсме уте, быдэсъялэ соосты, соку музъем вылын каньылэн, кышкатэк улоды;

¹⁹ соку музъем емышсэ сётоз но, кӧттэс тырымон сиёды, соку музъем вылады каньылэн, кышкатэк улоды.

²⁰ Шуиды ке: ”Сизьыметӥ аре мар сиыса ми уломы, куке ми ум но кизе, емышъёсмес, ю-няньмес ум но октэ-калтэ?”

²¹ Куатетӥ аре тӥ вылэ Мон бакель каронме ысто, соку тӥ доры куинь арлы тырмымон емышъёс вуозы;

²² тямысэтӥ араз музъемдэс кизёды, нош укмысэтӥ арозь вужзэ емыштэс сиёды – та арлэн емышез вуытозь вужзэ ик сиёды.

²³ Пырак ӵожелы музъемез вузаны уг яра, со Мынам музъеме: тӥ сьӧрлось лыктэм калык, Мон доры улыны лыктэмъёс;

²⁴ котькытын тӥляд люкетлы сюрем музъемды вылын вузам музъемез, дун тырыса, берен басьтыны лэзе.

²⁵ Агай-выныд начармыса музъемзэ вузано луиз ке, соку солэн матысь ӵыжы-выжыез лыктыса агай-вынызлэсь вузам музъемзэ, дун тырыса, берен мед басьтоз;

²⁶ со понна нокин но ӧз ни ке быгаты солэсь вузам музъемзэ, дун тырыса, берен басьтыны, но солэн аслаз тырмыт ваньбурез луиз ке, музъемзэ берен басьтыны коньдон шедьтӥз ке,

²⁷ вузам дырысеныз та дырозь кӧня ар ортчиз мед лыдъялоз но вузам муртэзлы кылем аръёс понна дунзэ мед берыктоз, аслаз юртаз-ераз со нош ик пырыны быгатоз;

²⁸ кӧня кулэ берыктыны сое солэн киыз ӧз ке шедьты, соку солэн вузам люкетэз басьтӥсьлэн кияз кылёз, юбилей арозь, нош юбилей аре со азьвыл кузёезлы берыктэмын луоз но, со нош ик аслаз юртаз-ераз улыны пыроз.

²⁹ Кин ке но борддорен котыртэм городысь улон корказэ вузаз ке, вузам бере ар ортчытозь сое берен басьтыны луэ: ар куспын сое берен басьтыны луэ;

³⁰ нош со быдэс ар куспын берен басьтэмын ӧз ке луы, соку борддорен котыртэм городысь корка пыраклы басьтӥсь киулэ кылёз, выжыысь выжыос ӵожелы, юбилей аре но солэн киулысьтыз уз ни кошкы.

³¹ Нош борддорен котыртымтэ гуртъёсысь коркаосты ана музъемен оградэ пыртыны луоз: соосты [котькыӵе дыре но], дун тырыса, берен басьтыны луэ, юбилей аре соос кошко басьтӥсь киысь.

³² Нош левитъёслэсь городъёссэс, соослэн киулазы сётэм городъёсысь коркаосты, левитъёс котьку но берен басьтыны быгато;

³³ нош левитъёс пӧлысь кин ке но вузам корказэ, дун тырыса, берен ӧз ке басьты, соку соослэн городысьтызы вузам корка юбилей аре азьвыл кузёезлы берыктэмын луоз, уго левитъёслэн городъёсысьтызы коркаос соослэн басьтэм люкетсы израиль пиос пӧлын улэ;

³⁴ соослэн городъёссы котырысь бусыосты но вузаны уг яра, малы ке шуоно соос пумтэм вапумъёс ӵожелы соослэн киулазы сётэмын.

³⁵ Тынад агай-выныд куанермиз ке, тон дорын начаре кылиз ке, тон солы юрттӥськы, – сьӧрлось улыны лыктэм мурт-а со, улыны интыяськем мурт-а со, – тонэн валче мед улоз;

³⁶ тон солэсь барыш, мултэссэ но эн басьты, Инмаредлэсь кышкаса ул; [Мон Кузё-Инмар,] агай-выныд тонэн валче мед улоз;

³⁷ азвесьтэ солы барыш басьтыны эн сёт, аслыд пайда басьтон понна няньдэ но эн сёты.

³⁸ Мон тӥляд Инмарды Кузё-Инмар, Кин тӥледыз Египет музъемысь поттӥз Ханаан музъемез тӥляд киулады сётон понна, тӥледлы Инмар луон понна.

³⁹ Агай-выныд куанермиз ке, тыныд вузамын луиз ке, сое ляльчиослэсь секытэсь ужъёссэс эн ужаты;

⁴⁰ тон дорын со медъяськем мурт кадь, улыны интыяськем мурт кадь мед улоз; юбилей ар вуытозь тон дорын мед ужалоз;

⁴¹ нош собере тон дорысь со мед кошкоз, ачиз но, нылпиосыз но соин ӵош мед кошкозы, аслаз выжыез доры мед берытскоз но атайёсызлэн юртазы-еразы нош ик улыны мед интыяськоз, –

⁴² малы ке шуоно соос Мынам ляльчиосы, Египет музъемысь Мон соосты поттӥ: соосты вузаны уг яра, кызьы вузало ляльчиосты;

⁴³ жугыса-тышкаса соосын эн кузёяськы, Инмаредлэсь кышка.

⁴⁴ Ляльчи пиед, ляльчи нылыд тон бордын мед улозы шуиськод ке, соку басьтэлэ асьтэлы тӥ котырын улӥсь калыкъёс пӧлысь ляльчи пиосты, ляльчи нылъёсты;

⁴⁵ нош озьы ик тӥ пӧлын улыны интыяськемъёслэсь нылпиоссэс тӥ, дун тырыса, ляльчие басьтыны быгатоды, тӥ пӧлын улӥсь соослэн выжыысьтызы потэм муртъёсты но, кудъёсыз тӥляд музъемады вордӥськизы ни; соос тӥляд асьтэлэн ваньбурды луо ини;

⁴⁶ асьтэ бере соосты нылпиостылы ваньбурез музэн сётыны быгатӥськоды; пумтэм вапумъёс ӵоже соосты ляльчиын возе. Нош агай-вынъёсыныды, израиль пиосын, жугыса-тышкаса эн кузёяське.

⁴⁷ Сьӧрлось лыктэм муртлэн яке тӥ пӧлы улыны интыяськем муртлэн ваньбурез люкаськиз ке, нош аслад агай-выныд со азьын начармиз ке, тон доры улыны интыяськем муртлы ляльчие вузаськиз ке, яке со улыны интыяськемлэн выжыысьтыз кинлы ке но ляльчие вузаськиз ке,

⁴⁸ вузам бере сое, дун тырыса, мозмытыны луэ; агай-вынъёсыз пӧлысь кин ке но сое, дун тырыса, мозмытыны кулэ,

⁴⁹ яке солэн бадӟым агаез, яке бадӟым агаезлэн пиез сое, дун тырыса, мозмытыны кулэ, яке ӵыжы-выжыосыз, улыез-бечеез пӧлысь кин ке но сое, дун тырыса, мозмытыны кулэ; нош аслаз ваньбурез люкаськиз ке, ачиз, дун тырыса, мозмытскыны быгатоз.

⁵⁰ Ассэ вузам арысен кутскыса юбилей ар вуытозь со дун тырыны кулэ сое басьтэм муртлы; ассэ вузам дунлэсь азвесьсэ со аслаз кузёезлы, аръёслэсь лыдзэс санэ басьтыса, тырыны кулэ; огдырлы медъяськем мурт кадь со кузёез дорын улыны кулэ;

⁵¹ ляльчи радын улонэз эшшо трос аръёс вань на ке, кылемзэ аръёсты лыдъяса-ӵотаса, со ассэ мозмытон понна кӧня азвесь тырыса со басьтэмын вал, со азвесь дунэз берыктыны кулэ.

⁵² Юбилей ар вуытозь ӧжыт аръёс кылемын ни ке, со лыдъяны кулэ, со аръёслэн лыдзыя ассэ мозмытон понна дун тырыны кулэ.

⁵³ Вань аръёс ӵоже со кузёез дорын медъяськем мурт кадь мед улоз; аслад син азяд сое жугыса-тышкаса, соин кузёяськыса улыны эн лэзь.

⁵⁴ Нош со таӵе амалэн мозмытскыны ӧз ке быгаты, соку юбилей арын со ачиз но, соин ӵош нылпиосыз но мозмытскозы,

⁵⁵ малы ке шуоно израиль пиос – со Мынам ляльчиосы; Мынам Египет музъемысь поттэм ляльчиосы. Мон Кузё-Инмар, тӥляд Инмарды».